ହିଞ୍ଜିଳିକାଟୁ : ବୁଧବାର ଅପରାହ୍ନରେ ହିଞ୍ଜିଳି ଥାନା ତଥା ୫୯ ନଂ ଜାତୀୟ ରାଜପଥ ଶ୍ୟାମଳାଇ ଛକ ନିକଟରେ ଭାରସାମ୍ୟ ହରାଇ ଏକ ଧାନ ବୋଝେଇ ଟ୍ରକ (ଏପି୦୫ ଡବ୍ଳ୍ୟୁ ୨୨୪୪) ରାସ୍ତା ପ୍ବାର୍ଶ୍ବକୁ ଓଲଟି ପଡିଛି । ଦୁର୍ଘଟଣାରେ ୩ ଜଣ ସାମାନ୍ୟ ଆହତ ହୋଇଥିବା ଜଣାପଡ଼ିଛି। ଦୁର୍ଘଟଣା ପରେ ଘଟଣା ସ୍ଥଳରୁ ଟ୍ରକ୍ ଚାଳକ ଫେରାର ହୋଇଯାଇଥିବା ଜଣାପଡିଛି।
ପ୍ରକାଶ ଯେ, ବୁଧବାର ଅପରାହ୍ନରେ ବ୍ରହ୍ମପୁର ଠାରୁ ଆସିକା ଅଭିମୁଖେ ଯାଉଥିବା ଏକ ଧାନ ବୋଝେଇ ଟ୍ରକ ସମ୍ମୁଖକୁ ଶ୍ୟାମଳାଇ ଛକ ନିକଟରେ ଏକ ମୋଟର ସାଇକେଲ ଆସିଯାଇଥିଲା। ଟ୍ରକ ଚାଳକ ହଠାତ୍ ବାମ ପଟକୁ ଗାଡି ବୁଲାଉଥିବା ବେଳେବେଳେ ଜଣେ ଯୁବକ ଟ୍ରକ୍ ସମ୍ମୁଖ ଭାଗକୁ ଆସିଯାଇଥିଲେ । ଟ୍ରକ୍ ଚାଳକ ଜଣଙ୍କ ଯୁବକଙ୍କୁ ବଞ୍ଚାଇବାକୁ ଯାଇ ଭାରସାମ୍ୟ ହରାଇବାରୁ ଟ୍ରକଟି ରାସ୍ତା ପାର୍ଶ୍ବକୁ ଓଲଟି ପଡ଼ିଥିଲା। ଦୂର୍ଘଟଣାରେ ସଂପୃକ୍ତ ଯୁବକଙ୍କ ସହ ବାଇକ୍ ଚାଳକ ଓ ସାଥି ସାମାନ୍ୟ ଆହତ ହୋଇଥିବା ଜଣାପଡ଼ିଛି। ଖବର ପାଇ ହିଞ୍ଜିଳି ପୁଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି।
