ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି), ଆୟକର ବିଭାଗ, ସିବିଆଇ ଭଳି କେନ୍ଦ୍ରୀୟ ଏଜେନ୍ସିଙ୍କ ଚଢ଼ାଉକୁ ନେଇ ଏବେ ରାଜନୀତି ଜୋର ଧରିଛି | ନିକଟରେ ଛତିଶଗଡର ରାୟପୁରରେ କଂଗ୍ରେସ ମହାଧିବେଶନର ତିନି ଦିନ ପୂର୍ବରୁ ଇଡି ପକ୍ଷରୁ ଚଢ଼ାଉ କରାଯାଇଥିଲା | ଗତକାଲି ଇଡି କଂଗ୍ରେସ ନେତାଙ୍କ ସମେତ ମୋଟ ୧୩ ଜଣଙ୍କ ଘରେ ଚଢ଼ାଉ କରିଥିଲା। ଏହି ମାମଲା କୋଇଲା ଦୁର୍ନୀତି ସହ ଜଡିତ ହୋଇଥିବାବେଳେ କଂଗ୍ରେସ ଏହି ଚଢ଼ାଉ ପଛରେ ରାଜନୀତି ଥିବାର କହିଛି | ଚଢ଼ାଉକୁ ନେଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ କହିଥିଲେ ଯେ ଗତ ୯ ବର୍ଷ ମଧ୍ୟରେ ୯୫ ପ୍ରତିଶତ ଚଢ଼ାଉ କେବଳ ବିରୋଧୀ ଦଳର ନେତାଙ୍କ ଉପରେ କରାଯାଇଥିଲା ଏବଂ ସେମାନଙ୍କ ମଧ୍ୟରୁ ଅଧିକାଂଶ କଂଗ୍ରେସର। ତେବେ ଆଜି ଆମେ ଆପଣଙ୍କ ସାମ୍ନାରେ ଇଡି ଚଢ଼ାଉ ବାବଦରେ ଏକ ତଥ୍ୟ ଦେବାକୁ ଯାଉଛୁ | ୨୦୧୪ ରୁ ଜୁଲାଇ ୨୦୨୨ ପର୍ଯ୍ୟନ୍ତ ହୋଇଥିବା ଚଢ଼ାଉର ସମ୍ପୂର୍ଣ୍ଣ ବିବରଣୀ ରହିଛି | ୨୦୧୪ ମସିହାରେ ମୋଦୀ ସରକାର କେନ୍ଦ୍ରକୁ ଆସିବା ପରେ ଜୁଲାଇ ୨୦୧୨ ପର୍ଯ୍ୟନ୍ତ ମୋଟ ୬୪୮ଟି ଚଢ଼ାଉ କରାଯାଇଥିଲା, ଯେଉଁଥିରେ ଟାର୍ଗେଟରେ ବିରୋଧୀ ନେତା ଥିଲେ । ଯଦି ଆମେ ୨୦୧୪ ରୁ ଜୁଲାଇ ୨୦୨୨ ପର୍ଯ୍ୟନ୍ତ ଏହି ଆକଳନକୁ ଦେଖିବା, ୮୦ ଜଣ କଂଗ୍ରେସ ନେତାଙ୍କ ଉପରେ ଇଡି ଚଢ଼ାଉ କରିଥିଲା |
କଂଗ୍ରେସ ପରେ ମମତା ବାନାର୍ଜୀଙ୍କ ପାର୍ଟି ତୃଣମୂଳ କଂଗ୍ରେସ (ଟିଏମସି) ନେତାଙ୍କ ଘରେ ସର୍ବାଧିକ ଚଢ଼ାଉ କରାଯାଇଥିଲା । ୪୧ଜଣ ଟିଏମସି ନେତାଙ୍କ ଘରେ ଇଡି ଚଢ଼ାଉ କରିଥିବାବେଳେ ତିନି ନମ୍ବରରେ ମେହବୁବା ମୁଫତିଙ୍କ ପାର୍ଟି ପିପୁଲ୍ସ ଡେମୋକ୍ରାଟିକ୍ (ପିଡିପି) ଏବଂ ଚତୁର୍ଥ ନମ୍ବରରେ ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ନାମ ରହିଛି । ଜୁଲାଇ ୨୦୨୨ରେ ଅର୍ଥ ରାଷ୍ଟ୍ର ମନ୍ତ୍ରୀ ପଙ୍କଜ ଚୌଧୁରୀ ରାଜ୍ୟସଭାରେ ଏକ ପ୍ରଶ୍ନର ଲିଖିତ ଉତ୍ତରରେ କହିଥିଲେ ଯେ ୨୦୧୪ ରୁ ୨୦୨୨ ପର୍ଯ୍ୟନ୍ତ କେବଳ ଇଡି ୩୦୧୦ ଚଢ଼ାଉ କରିଥିଲା। ଯଦି ଏହାକୁ ୨୦୦୪ ରୁ ୨୦୧୪ ପର୍ଯ୍ୟନ୍ତ କରାଯାଇଥିବା ଚଢ଼ାଉ ସହିତ ତୁଳନା କରାଯାଏ, ତେବେ ଏହା ୨୭ ଗୁଣ ଅଧିକ | ୨୦୦୪ ରୁ ୨୦୧୪ ପର୍ଯ୍ୟନ୍ତ, ଇଡି କେବଳ ୧୧୨ଟି ସର୍ଚ୍ଚ ଅପରେସନ୍ କରିଥିଲା | ମନି ଲଣ୍ଡରିଂ ଆକ୍ଟ ପରେ, ୯ ବର୍ଷରେ, ଇଡି ସମୁଦାୟ ୧୧୨ଟି ସର୍ଚ୍ଚ ଅପରେସନ୍ ଏବଂ ୫୩୪୬.୧୬କୋଟି ମୂଲ୍ୟର ସମ୍ପତ୍ତି ଆଟାଚ କରିଥିଲା | ବର୍ତ୍ତମାନ ୨୦୧୪ ରୁ ୨୦୨୨ ପର୍ଯ୍ୟନ୍ତ ଆକଳନକୁ ଦେଖନ୍ତୁ | ଏହି ସମୟରେ, ଇଡି ସମୁଦାୟ ୩୦୧୦ ସର୍ଚ୍ଚ ଅପରେସନ୍ କରିଥିଲା | ଏହି ଚଢ଼ାଉ ସମୟରେ, ଇଡି ୯୯,୩୫୬ କୋଟି ଟଙ୍କା ମୂଲ୍ୟର ସମ୍ପତ୍ତି ଆଟାଚ କରିଥିଲା |
