ତାଇପେଇ : ଚୀନପଟୁ ବିପଦ ବଢୁଥିବାରୁ ତାଇଓ୍ବାନ ସରକାର ନିଜ ଦେଶର ସାମରିକ ବାହିନୀକୁ ଆହୁରି ଶକ୍ତିଶାଳୀ କରିବାକୁ ଉଦ୍ୟମ ଆରମ୍ଭ କରିଦେଇଛନ୍ତି ।ଏହି କ୍ରମରେ ଦେଶରେ ବାଧ୍ୟତାମୂଳକ ସାମରିକ ସେବା ସମୟକୁ ୪ ମାସରୁ ୧ ବର୍ଷକୁ ବୃଦ୍ଧି କରାଯାଇଛି । ଅର୍ଥାତ ପୂର୍ବରୁ ଦେଶର ଯୁବକମାନଙ୍କୁ ୪ ମାସ ସାମରିକ ସେବାରେ ଯୋଗ ଦେବା ବାଧ୍ୟତାମୂଳକ ଥିବାବେଳେ ଏବେ ସେମାନଙ୍କୁ ୧ ବର୍ଷ ପାଇଁ ସେନାରେ କାମ କରିବାକୁ ପଡ଼ିବ । ଆସନ୍ତା ୨୦୨୪ରୁ ଏହା ଲାଗୁ ହେବ ବୋଲି ରାଷ୍ଟ୍ରପତି ସାଇ ଇଙ୍ଗ-ୱେନ୍ ମଙ୍ଗଳବାର ଘୋଷଣା କରିଛନ୍ତି।
ଦ୍ୱୀପର ପ୍ରତିରକ୍ଷାକୁ ସୁଦୃଢ଼ କରିବା ବିଷୟରେ ଆଲୋଚନା କରିବାକୁ ସେ ଡକାଇଥିବା ଏକ ଜାତୀୟ ସୁରକ୍ଷା ବୈଠକ ପରେ ସାଇ କହିଛନ୍ତି ଯେ ତାଇୱାନ ଶାନ୍ତି ଚାହୁଁଛି କିନ୍ତୁ ନିଜକୁ ରକ୍ଷା କରିବାରେ ସକ୍ଷମ ହେବା ଆବଶ୍ୟକ।
“ଯେପର୍ଯ୍ୟନ୍ତ ତାଇୱାନ ଶକ୍ତିଶାଳୀ ରହିଛି, ଏହା ସମଗ୍ର ବିଶ୍ୱରେ ଗଣତନ୍ତ୍ର ଏବଂ ସ୍ୱାଧୀନତାର କେନ୍ଦ୍ର ରହିବ, ଏବଂ ଏହା ଯୁଦ୍ଧକ୍ଷେତ୍ରରେ ପରିଣତ ହେବ ନାହିଁ,” ବୋଲି ସେ କହିଛନ୍ତି ।
ସାଇ ଆହୁରି ମଧ୍ୟ କହିଛନ୍ତି ଯେ ଚୀନ ତରଫରୁ ବଢୁଥିବା ସାମରିକ ବିପଦର ମୁକାବିଲା ପାଇଁ ବର୍ତ୍ତମାନର ସାମରିକ ବ୍ୟବସ୍ଥା ପର୍ଯ୍ୟାପ୍ତ ନୁହେଁ, ବିଶେଷକରି ଯଦି ଚୀନ ତାଇଓ୍ବାନ ଉପରେ ହଠାତ ଆକ୍ରମଣ ଆରମ୍ଭ କରେ, ତାହାର ମୁକାବିଲା କରିବାକୁ ତାଇଓ୍ବାନ ସେନା ଅକ୍ଷମ । ଏଣୁ ସେନାକୁ ଆହୁରି ଶକ୍ତିଶାଳୀ କରିବାର ଆବଶ୍ୟକତା ଜରୁରୀ ହୋଇପଡ଼ିଛି ।
