ପଦ୍ମପୁର : ୬୯ତମ ସମବାୟ ମହୋତ୍ସବରେ ରାଜ୍ୟରେ ଦ୍ବିତୀୟ ସ୍ଥାନ ଅଧିକାର କଲା ପଦ୍ମପୁର ଲ୍ୟାମ୍ପ୍ସ। ଓଡ଼ିଶା ସରକାରଙ୍କ ତରଫରୁ ଭୁବନେଶ୍ୱରରେ ଅନୁଷ୍ଠିତ ରାଜ୍ୟସ୍ତରୀୟ ୬୯ତମ ନିଖିଳ ଭାରତ ସମବୟ ସପ୍ତାହ ପାଳନ ଅବସରରେ ରାୟଗଡା ଜିଲ୍ଲାର ପଦ୍ମପୁର ଲ୍ୟାମ୍ପ୍ସ ରାଜ୍ୟ ସ୍ତରରେ ଦ୍ୱତୀୟ ସ୍ଥାନ ହାସଲ କରିଛି।
ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ସମବାୟ ବିଭାଗ ମନ୍ତ୍ରୀ ଅତନୁ ସବ୍ୟସାଚୀ ନାୟକ ପଦ୍ମପୁର ଲ୍ୟାମ୍ପ୍ସ ସଭାପତି ତଥା କେସିସି ନିର୍ଦେଶକ ବୃନ୍ଦାବନ ଶବର ଏବଂ ଲ୍ୟାମ୍ପ୍ସ ନିର୍ଦେଶକ ଦୁର୍ଗା ପ୍ରସାଦ ସାହୁଙ୍କୁ ମାନପତ୍ର ସହ ଟ୍ରଫି ପ୍ରଦାନ କରିଥିଲେ। ଏହି ସଫଳତା ପାଇଁ ପଦ୍ମପୁର ଅଞ୍ଚଳର ସମସ୍ତ ଚାଷୀଭାଇ, ତହସିଲ ଏବଂ ଯୋଗାଣ ଅଧିକାରୀ, କୃଷି ବିଭାଗ, ଲ୍ୟାମ୍ପ୍ସ ଏବଂ କେସିସି ବ୍ୟାଙ୍କର ସମସ୍ତ କର୍ମଚାରୀ ଅକ୍ଳାନ୍ତ ପରିଶ୍ରମ ତଥା ସମସ୍ତ ନିର୍ଦେଶକଙ୍କ ଆନ୍ତରିକ ସହଯୋଗ ଓ ସାମୂହିକ ଚେଷ୍ଟା ଯୋଗୁଁ ଆଜି ପଦ୍ମପୁର ଲ୍ୟାମ୍ପ୍ସ ଏହି ସଫଳତାରେ ପହଞ୍ଚି ପାରିଛି ବୋଲି କେସିସି ନିର୍ଦେଶକ ବୃନ୍ଦାବନ ଶବର ମତବ୍ୟକ୍ତ କରିଥିଲେ। ଆଗାମୀ ଦିନରେ କିପରି ସମସ୍ତ ଚାଷୀ ଆହୁରି ଅଧିକ ଲ୍ୟାମ୍ପ୍ସ ମାଧ୍ୟମରେ ସରକାରଙ୍କ ସମସ୍ତ ସୁବିଧା ସୁଯୋଗ ପାଇ ପାରିବେ ଏବଂ ସଶକ୍ତ କୃଷକ ଓଡ଼ିଶା ଗଠନରେ ମୁଖ୍ୟ ଭୂମିକା ନେଇପାରିବେ ସେଥିପାଇଁ ସମସ୍ତେ ମିଳିମିଶି ସଂଗ୍ରାମ ଜାରୀ ରଖିବା ବୋଲି ଲ୍ୟାମ୍ପ୍ସ ନିର୍ଦେଶକ ଦୁର୍ଗା ପ୍ରସାଦ ସାହୁ କହିଥିଲେ।
