ନବରଙ୍ଗପୁର: ମୋବାଇଲ ପାଇଁ ସାଙ୍ଗ ସାଜିଲା ସଇତାନ । ବନ୍ଧୁକୁ ପଥରରେ ଛେଚି ମାରିଦେଲା ସାଙ୍ଗ । ନବରଙ୍ଗପୁର ଜିଲ୍ଲା ରାଇଘର ଥାନା ଛତାବେଡା ଗାଁରେ ଘଟିଛି ଏଭଳି ଅଭାବନୀୟ ଘଟଣା । ମୋବାଇଲ ହଜିବାକୁ ନେଇ ଦୁଇ ସାଙ୍ଗଙ୍କ ମଧ୍ୟରେ ପ୍ରଥମେ ବଚସା ହୋଇଥିଲା । ପରବର୍ତ୍ତୀ ଘଟିଛି ନିର୍ମମ ହତ୍ୟା । ଅଭିଯୋଗ ଅନୁସାରେ ଗତ ୭ ତାରିଖରେ ଘନଶ୍ୟାମ ମାଝୀ ଓ ସୁକଲାଲ ରାଉତ ନିଶାସକ୍ତ ଅବସ୍ଥାରେ ଏକ ମୋବାଇଲ ହଜିବାକୁ କେନ୍ଦ୍ର କରି ଗଣ୍ଡଗୋଳ କରିଥିଲେ ।
ପରେ ସୁକଲାଲଙ୍କୁ ପଥରରେ ଆକ୍ରମଣ କରିଥିଲେ ଘନଶ୍ୟାମ । ଗୁରୁତର ଅବସ୍ଥାରେ ସେଠାରୁ ଘରକୁ ଚାଲିଯାଇଥିଲେ ସୁକଲାଲ । ତେବେ ଗତକାଲି ସନ୍ଧ୍ୟାରେ ତାଙ୍କର ମୃତ୍ୟୁ ହୋଇଛି । ଏନେଇ ଅଭିଯୋଗ ପରେ ଘନଶ୍ୟାମ ମାଝୀଙ୍କୁ ଗିରଫ କରିଛି ପୋଲିସ । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ସହିତ ତଦନ୍ତ ପୋଲିସ ତଦନ୍ତ କରିଛି । ହତ୍ୟା ପଛରେ ମୋବାଇଲ ହଜିବା ବିବାଦ ନାଁ ଆଉ କିଛି ରହିଛି ସେନେଇ ତଦନ୍ତ ଜାରି ରହିଛି ।
