ଭୁବନେଶ୍ୱର: ଗତକାଲି ଖୋର୍ଦ୍ଧା ବାଣପୁର ବ୍ଲକ୍ ପରିଷରରେ ଅମାନବୀୟ ଘଟଣା ଘଟାଇଥିବା ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଅଭିଯୋଗରେ ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ବିଜେଡି ସରକାରଙ୍କୁ ଟାର୍ଗେଟ କରିଛନ୍ତି। ଆଜି ଏକ ସାମ୍ବାଦୀକ ସମ୍ମିଳନୀକୁ ସମ୍ବୋଧିତ କରି ପାତ୍ର ଅଭିଯୋଗ କରିଛନ୍ତି ଯେ ଜଗଦ୍ଦେବ ଜଣେ ଅଭ୍ୟାସଗତ ଅପରାଧୀ ଏବଂ ତାଙ୍କର ଏହି କାର୍ଯ୍ୟ ଗଣତନ୍ତ୍ରର ଷଡଯନ୍ତ୍ରଠାରୁ କମ୍ ନୁହେଁ। ଏହି ଘଟଣାରେ ପ୍ରାୟ ୨୨ ଜଣ ଲୋକ ଏକାଧିକ ଆହତ ହୋଇଛନ୍ତି।
‘ବିଧାୟକ ମତଦାନକୁ ପ୍ରଭାବିତ କରି ସମଗ୍ର ଗଣତାନ୍ତ୍ରିକ ପ୍ରକ୍ରିୟାକୁ ଭଣ୍ଡୁର କରିବାକୁ ଚେଷ୍ଟା କରୁଥିଲେ। ତାଙ୍କର ଏହି କାର୍ଯ୍ୟ କେବଳ ନିରାଶାରୁ ବାହାରିଥିଲା ଏବଂ ସେ ସେମାନଙ୍କ ଉପରେ କାର ଚଳାଇ ମହିଳା କାର୍ଯ୍ୟକର୍ତ୍ତାଙ୍କୁ ହତ୍ୟା କରିବାକୁ ଚେଷ୍ଟା କରିଥିଲେ । ଗଣତନ୍ତ୍ରକୁ ହତ୍ୟା କରିବା ଉଦ୍ୟମ ବ୍ୟତୀତ ଏହା ଆଉ କିଛି ନୁହେଁ ବୋଲି ସେ କହିଛନ୍ତି।
ଏହି ଘଟଣାକୁ ନିନ୍ଦା କରି ବରିଷ୍ଠ ବିଜେପି ନେତା ଅଭିଯୋଗ କରିଛନ୍ତି ଯେ ତାଙ୍କର ଅହଂକାରୀ ଆଚରଣ ଏବଂ କାର୍ଯ୍ୟକଳାପ ଯୋଗୁଁ ଚିଲିକା ବିଧାୟକଙ୍କୁ ‘ବାହୁବଲୀ ବିଧାୟକ’ ମଧ୍ୟ କୁହାଯାଉଥିଲା। ତେବେ ‘ବିଭିନ୍ନ ପ୍ରକାରର ହିଂସା ସହ ଜଡିତ ହୋଇଥିଲେ ମଧ୍ୟ ପ୍ରଶାନ୍ତ ଜଗଦେବଙ୍କୁ କାହିଁକି ବିଜେଡିରୁ ବହିଷ୍କାର କରାଯାଇ ନାହିଁ? ତାଙ୍କୁ ଦଳରେ ସମସ୍ତ ଗୁରୁତ୍ୱ ଦିଆଯାଉଥିଲା ଏବଂ ପୁନର୍ବାର ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ମଧ୍ୟ ପ୍ରସ୍ତୁତ କରାଯାଇଥିଲା ବୋଲି ସମ୍ବିତ ପ୍ରଶ୍ନ କରିଛନ୍ତି।
ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ ‘ଜଗଦ୍ଦେବଙ୍କୁ ନିଲମ୍ବନ ଏକ ଡ୍ରାମା ଛଡା ଆଉ କିଛି ନୁହେଁ କାରଣ ସେ ରାଜ୍ୟରେ ନିର୍ବାଚନ ସମୟରେ ବିଜେଡିର ରାଜନୈତିକ ବୈଠକରେ ଯୋଗ ଦେଇଥିଲେ। ଆମେ ପଚାରିବାକୁ ଚାହୁଁଛୁ କାହିଁକି ବିଜେଡି ଜଗଦେବଙ୍କୁ ବହିଷ୍କାର କଲା ନାହିଁ? ତାଙ୍କ ବିରୋଧରେ କଠୋର କାର୍ଯ୍ୟନୁଷ୍ଠାନ ଦାବି କରୁଛୁ ବୋଲି ସମ୍ବିତ କହିଛନ୍ତି।
