ହିଞ୍ଜିଳିକାଟୁ : ସୋମବାର ରାତିରେ ହିଞ୍ଜିଳି ପୁଲିସ ଜଣେ ଯୁବତୀଙ୍କ ଝୁଲନ୍ତା ମୃତଦେହକୁ ଉଦ୍ଧାର କରିଛି । ମୃତକା ଜଣଙ୍କ ହେଲେ ହିଞ୍ଜିଳିକାଟୁ ପୌରାଞ୍ଚଳ କଲେଜରୋଡ ଅଞ୍ଚଳର ଆଲିଶା ସାହୁ(୧୯) । ପ୍ରକାଶ ଯେ, ଯୁବତୀ ଜଣଙ୍କ ପ୍ରତିଦିନ ପରି ସୋମବାର ରାତ୍ରଭୋଜନ ସାରି ଶୋଇବା ପାଇଁ ରୁମକୁ ଯାଇଥିଲେ । ପରିବାର ଲୋକେ ଖାଇସାରି ଝିଅକୁ ଡାକିଥିଲେ ମଧ୍ୟ କୌଣସି ଉତ୍ତର ମିଳିନଥିଲା । ପରେ ପରିବାର ଲୋକେ କବାଟ ଭାଙ୍ଗି ଦେଖିଲା ବେଳକୁ ଆଲିଶା ଘରର ପଙ୍ଖାରେ ଓଢଣୀ ଲଗାଇ ଆତ୍ମହତ୍ୟା କରିଥିଲେ । ପରିବାର ଲୋକେ ଝିଅକୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ସେଠାରେ ଡାକ୍ତର, ଯୁବତୀଙ୍କୁ ମୃତ ଘୋଷଣା କରିଥିଲେ । ଘଟରା ନେଇ ଯୁବତୀଙ୍କ ବାପା ସ୍ୱରାଜ୍ୟ ସାହୁ ହିଞ୍ଜିଳି ଥାନାରେ ଅଭିଯୋଗ କରିଥିଲେ । ଅଭିଯୋଗ ଭିତ୍ତରେ ହିଞ୍ଜିଳି ଥାନାରେ କେସ ନଂ- ୨୨/୨୪ରେ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ଜବତ କରିଛି । ମଙ୍ଗଳବାର ମୃତଦେହ ବ୍ୟବଛେଦ ସକାଶେ ବ୍ରହ୍ମପୁର ଇଙ୍ଗ ଡାକ୍ତରଖାନାକୁ ପଠାଇଛି । ବ୍ୟବଛେଦ ପରେ ଶବକୁ ପରିବାର ଲୋକଙ୍କୁ ହସ୍ତାନ୍ତର କରିଛି । ଆତ୍ମହତ୍ୟାର ପ୍ରକୃତ କାରଣ ଜଣାପଡିନଥିବା ବେଳେ ପ୍ରେମଜନିତ କାରଣରୁ ଯୁବତୀ ଜଣଙ୍କ ଆତ୍ମହତ୍ୟା କରିଥିବା ପ୍ରାଥମିକ ଅନୁସନ୍ଧାନରୁ ଜଣାପଡିଛି ।
