ଭୁବନେଶ୍ୱର: ରାଜ୍ୟର ୨ଟି ପୃଥକ ସ୍ଥାନରେ ଆଜି ବଜ୍ରପାତ ଘଟି ୪ ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ତିନିଜଣ ମହିଳା ଥିବାବେଳେ ଜଣେ ୯ମ ଶ୍ରେଣୀ ଛାତ୍ର ଅଛନ୍ତି । ଏହାବ୍ୟତୀତ ୨ ଜଣ ଗୁରୁତର ହୋଇପଡିଛନ୍ତି। ଅନୁଗୋଳ ଜିଲ୍ଲାରେ ବଜ୍ରପାତ ଘଟି ୨ ଜଣ ମହିଳାଙ୍କର ମୃତ୍ୟୁ ଘଟିଥିବାବେଳେ କୋରାପୁଟ ଜିଲ୍ଲାରେ ମା’ ଆଉ ପୁଅଙ୍କର ମୃତ୍ୟୁ ଘଟିଛି।
ଅନୁଗୋଳ ଜିଲ୍ଲାରେ ବଜ୍ରପାତରେ ୨ ଜଣ ମହିଳାଙ୍କ ମୃତ୍ୟୁ ଘଟିଛି । ସେମାନେ ହେଲେ ସୁଷମା ବେହେରା ଓ ପେନି ବେହେରା। ଏଥିସହିତ ୨ ଜଣ ଆହତ ହୋଇଛନ୍ତି । ଆହତ ଦ୍ୱୟ ହେଲେ ଅଜୟ ବେହେରା ଓ କୁଆଁରୀ ବେହେରା। ଏମାନେ ସମସ୍ତେ ନାଲକୋ ଥାନା ଅନ୍ତର୍ଗତ ବଳରାମପ୍ରସାଦ ଗାଁର। ଏମାନେ କାଠ ସଂଗ୍ରହ କରି ଫେରୁଥିବା ବେଳେ ଗାଁ ପାଖ ଆସପଣ୍ଡ ପାଖରେ ବଜ୍ରପାତ ହୋଇଥିଲା। ସୁଷମା ଓ ପେନିଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ ଅଜୟ ଓ କୁଆଁରୀ ଆହତ ହୋଇଥିଲେ । ସେମାନଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି।
ଅନ୍ୟପକ୍ଷେ କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକର ଅଞ୍ଚଳା ଗାଁରେ ବଜ୍ରପାତରେ ଜଣେ ନବମ ଶ୍ରେଣୀ ଛାତ୍ର ଓ ତାଙ୍କ ମା’ଙ୍କର ମୃତ୍ୟୁ ଘଟିଛି । ମୃତକ ଦ୍ୱୟ ହେଲେ ଗାଁର ଲିଙ୍ଗରାଜ ହାଲବାଙ୍କ ପତ୍ନୀ ଦୁରୁବତୀ ଓ ପୁଅ ଦୀପକ । ଲିଙ୍ଗରାଜଙ୍କ ସହ ପତ୍ନୀ ଓ ପୁଅ ଜମିରେ କାମ କରୁଥିଲେ। ହେଲେ ବର୍ଷା ସହିତ ଘଡ଼ଘଡ଼ି ହେବାରୁ ଲିଙ୍ଗରାଜ ଜମିରୁ ଯାଇ ଏକ ସୁରକ୍ଷିତ ସ୍ଥାନରେ ଆଶ୍ରୟ ନେଇଥିଲେ। ହେଲେ ଦୁରୁବତୀ ଓ ଦୀପକ ସେଠାକୁ ଗଲା ବେଳେ ବଜ୍ରପାତ ହୋଇଥିଲା । ଲିଙ୍ଗରାଜଙ୍କ ଆଖି ସାମ୍ନାରେ ସେମାନଙ୍କ ଜୀବନ ଚାଲି ଯାଇଥିଲା। ସେମାନଙ୍କୁ ବୋରିଗୁମ୍ମା ଡାକ୍ତରଖାନାକୁ ଅଣାଯାଇଥିଲା। ତେବେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ।
ସୂଚନାଥାଉ କି, ଦୀପକ ଦଶମ ଶ୍ରେଣୀର ଛାତ୍ର ଥିଲେ । ସେ ପାଠ ପଢା ସହ ଚାଷ କାମରେ ବି ବାପାମା’ଙ୍କୁ ସହଯୋଗ କରୁଥିଲେ।
