ଭୁବନେଶ୍ୱର : ପ୍ରଥମେ ଅନ୍ଲାଇନ୍ ପ୍ରେମ, ତା’ ପରେ ମୋବାଇଲରେ ଅନ୍ତରଙ୍ଗ ଫଟୋ ଉତ୍ତୋଳନ କରି ପ୍ରେମିକା ସହିତ ଧୋକ୍କାଦେଇ ପ୍ରେମିକ ଗିରଫ ହୋଇଛି । ଏଭଳି ଧୋକ୍କାବାଜ୍ ପ୍ରେମିକକୁ ଇନଫୋଭ୍ୟାଲି ଥାନା ପୁଲିସ ଗିରଫ କରି କୋର୍ଟ ଚାଲାଣ କରିଛି । ଏହି ଯୁବକ ଜଣକ ହେଉଛନ୍ତି ଅନୁଗୁଳ ଜିଲ୍ଲା ହନ୍ଦପା ଅଞ୍ଚଳର ଅନମୋଲ ଦୁବେ ଓରଫ ପିକୁନ୍ (୨୧) ।
ପ୍ରକାଶ ଯେ ଯାଁଳା ଅଞ୍ଚଳର ଜଣେ ଯୁବତୀଙ୍କ ସହିତ ୩ ବର୍ଷହେବ ଅନମୋଲ ଦୁବେଙ୍କ ସହ ପ୍ରେମ ସମ୍ପର୍କରେ ରହିଥିଲେ । ସେମାନେ ଫୋନ୍ ମାଧ୍ୟମରେ କଥାବାର୍ତ୍ତା ହେଉଥିବାରୁ ସେମାନଙ୍କ ମଧ୍ୟରେ ଅନ୍ତରଙ୍ଗତା ବଢ଼ିଥିଲା । ଏହାର ସୁଯୋଗ ନେଇ ଅନମୋଲ ସମ୍ପୃକ୍ତ ଯୁବତୀଙ୍କୁ ଅଶ୍ଳୀଳ ଭିଡିଓ କଲ୍ କରିବାକୁ କହିଥିଲେ । ଯୁବତୀ ଜଣକ କଥା ରଖି ଉକ୍ତ କଲ୍ କରିବା ସମୟରେ ପୀଡ଼ିତାଙ୍କ ଅଜାଣତରେ ଅଭିଯୁକ୍ତ ଅଶ୍ଳୀଳ ଭିଡିଓ କଲ୍କୁ ତାଙ୍କର ମୋବାଇଲ ସ୍କ୍ରିନ୍ ରେକର୍ଡ କରିନେଇଥିଲେ । ପରବର୍ତ୍ତୀ ସମୟରେ ଅନମୋଲ ତାଙ୍କ ସହିତ ଶାରୀରିକ ସମ୍ପର୍କ ରଖିବା ପାଇଁ କହିବାରୁ ଯୁବତୀ ଜଣକ ସମ୍ପୂର୍ଣ୍ଣ ଭାବରେ ମନା କରିଦେଇଥିଲେ । ଏଥିପାଇଁ ସେ ତାଙ୍କୁ ବାରମ୍ବାର ଚାପ ପକାଇବାରୁ ସେ ଅତିଷ୍ଠ ହୋଇ ଅନମୋଲର ମୋବାଇଲ ନମ୍ବରକୁ ତାଙ୍କର ଫୋନ୍ରେ ବ୍ଲକ୍ରେ ପକାଇ ଦେଇଥିଲେ । ଏହି କାରଣରୁ ସେ ଯୁବତୀଙ୍କ ଉପରେ ରାଗିଯାଇଥିଲେ ଏବଂ ପ୍ରତିଶୋଧ ପରାୟଣ ହୋଇ ଯୁବତୀଙ୍କ ନାମରେ ଏକ ନକଲି ଇନଷ୍ଟାଗ୍ରାମ ଆଇଡି ତିଆରି କରିଥିଲେ । ଏହି ନକଲି ଆଇଡିରେ ପୀଡ଼ିତାଙ୍କର ପୂର୍ବରୁ ରଖିଥିବା ଅଶ୍ଳୀଳ ଫଟୋ ଏବଂ ଭିଡିଓ ସବୁକୁ ପୋଷ୍ଟ କରିଥିଲେ । ଧୋକାବାଜ ପ୍ରେମିକ ଏପରି କରିବା ଦ୍ୱାରା ଏନେଇ ଯୁବତୀ ଜଣକ ତାଙ୍କର ପରିବାରବର୍ଗ ଏବଂ ସମ୍ପର୍କୀୟଙ୍କୁ ଜଣାଇଥିଲେ । ଏହି କାରଣ ହେତୁ ସେ ବାଧ୍ୟ ହୋଇ ତାଙ୍କ ବିରୁଦ୍ଧରେ ଆଇନଗତ ଦୃଢ କାର୍ଯ୍ୟାନୁଷ୍ଠାନ ନିଆଯିବା ପାଇଁ ଇନଫୋଭ୍ୟାଲି ଥାନାରେ ଲିଖିତ ଅଭିଯୋଗ କରିଥିଲେ । ଇନ୍ଫୋଭ୍ୟାଲି ଥାନା ପୁଲିସ ଯୁବତୀଙ୍କ ଅଭିଯୋଗ ଭିତ୍ତିରେ କାର୍ଯ୍ୟାନୁଷ୍ଠାନ ନେଇ ଗତକାଲି ଅନମୋଲକୁ ଗିରଫ କରି କରି ତଦନ୍ତ ପାଇଁ ଥାନାକୁ ଆଣିଥିଲେ । ତଦନ୍ତ ସମୟରେ ଅଭିଯୁକ୍ତ ନିଜର ଦୋଷ ସ୍ୱୀକାର କରିଥିଲେ । ଆଜି ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି ।
