ନୂଆଦିଲ୍ଲୀ: ଅଭିନେତ୍ରୀ ଅନୁଷ୍କା ଶର୍ମା ଏକ ବର୍ଦ୍ଧିତ ଟିକସ ନୋଟିସ ବିରୋଧରେ ବମ୍ବେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ୨୦୧୨-୧୩ ଏବଂ ୨୦୧୩-୧୪ ବର୍ଷ ପାଇଁ ସେଲ୍ସ ଟ୍ୟାକ୍ସ (ବିକ୍ରୟ କର)ର ଡେପୁଟି କମିଶନରଙ୍କ ପକ୍ଷରୁ ତାଙ୍କୁ ଦିଆଯାଇଥିବା ଦୁଇଟି ନୋଟିସକୁ ଚ୍ୟାଲେଞ୍ଜ କରି ଅଭିନେତ୍ରୀ ବମ୍ବେ ହାଇକୋର୍ଟରେ ଏକ ଯାଚିକା ଆଗତ କରିଛନ୍ତି। ବମ୍ବେ ହାଇକୋର୍ଟର ବିଚାରପତି ଜଷ୍ଟିସ୍ ନୀତୀନ ଜାମଦାର ଏବଂ ଜଷ୍ଟିସ୍ ଅଭୟ ଆହୁଜାଙ୍କୁ ନେଇ ଗଠିତ ଖଣ୍ଡପୀଠ ଗୁରୁବାର ତାଙ୍କ ଆବେଦନକୁ ବିଚାର ପାଇଁ ଗ୍ରହଣ କରି ଏହାର ଉତ୍ତର ଦେବାକୁ ବିକ୍ରୟ କର ବିଭାଗକୁ ନିର୍ଦ୍ଦେଶ ଦେଇଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ଫେବୃଆରି ୬ରେ ହେବ।
ଅନୁଷ୍କା ଶର୍ମା ଅଦାଲତଙ୍କୁ ବିକ୍ରୟ ଟିକସ ବିଭାଗର ଆଦେଶ ବାତିଲ କରିବାକୁ ଅନୁରୋଧ କରିଛନ୍ତି। ସେ ଯୁକ୍ତି କରିଛନ୍ତି ଯେ ଟିକସ ଅଧିକାରୀମାନେ ତାଙ୍କୁ ଜଣେ ଅଭିନେତା କିମ୍ବା ପ୍ରଦର୍ଶନକାରୀଙ୍କ ପାଇଁ ପ୍ରଯୁଜ୍ୟ ହାର ଅପେକ୍ଷା ଅଧିକ ହାରରେ ଟିକସ ଆକଳନ କରିଛନ୍ତି। ଅନୁଷ୍କା ଶର୍ମା ଯୁକ୍ତି କରିଛନ୍ତି ଯେ ସେ ତାଙ୍କ ଏଜେଣ୍ଟ ୟଶରାଜ ଫିଲ୍ମସ ଏବଂ ନିର୍ମାତା ଏବଂ ଇଭେଣ୍ଟ ଆୟୋଜକଙ୍କ ସହ ତ୍ରପାକ୍ଷିକ ଚୁକ୍ତିନାମାର ଏକ ଅଂଶ ଭାବରେ ସେ ଚଳଚ୍ଚିତ୍ର ଏବଂ ପୁରସ୍କାର ସମାରୋହରେ ଅଭିନୟ କରିଥିଲେ।
ତଥାପି, ତାଙ୍କୁ ଜଣେ ଚଳଚ୍ଚିତ୍ର ଅଭିନେତା ଭାବରେ ନୁହେଁ ବରଂ ପୁରସ୍କାର କାର୍ଯ୍ୟକ୍ରମର ଆଙ୍କର୍ ପାଇଁ ଟିକସ ଦେବାକୁ ନୋଟିସ ଜାରି ହୋଇଥିବା ସେ ଦର୍ଶାଇଛନ୍ତି। ତାଙ୍କୁ ୨୦୧୨-୧୩ରେ ୧.୨ କୋଟି ଟିକସ ଦେବାକୁ କୁହାଯାଇଥିଲା ଏବଂ ଏହାର ପରବର୍ଷ, ସେ ୧.୬ କୋଟିର ଟିକସ ଦେବାକୁ ଆଉ ଏକ ନୋଟିସ ପାଇଥିଲେ।
କ୍ରିକେଟର ବିରାଟ କୋହଲିଙ୍କୁ ବିବାହ କରିଥିବା ଅନୁଷ୍କା ଶର୍ମା ‘ପିକେ’, ‘ରବ ନେ ବନା ଦି ଯୋଡି’, ‘ସୁଲତାନ’ ଏବଂ ‘ଜିରୋ’ ଭଳି ଚଳଚ୍ଚିତ୍ରରେ ଅଭିନୟ କରିଛନ୍ତି।
