ତେଲକୋଇ, ୨୯/୦୯: ଦୁର୍ଘଟଣାକୁ ନେଇ ଉତ୍ତେଜନା ଆଉ ତାପରେ ରାସ୍ତା ରୋକ । ଏଭଳି ଘଟଣା ଦେଖିବାକୁ ମିଳିଛି ତେଲକୋଇ ଥାନା ୪୯ ନମ୍ବର ଜାତୀୟ ରାଜପଥର ଜଗମୋହନପୁର ଛକ ଠାରେ । ଦିନ ସାଢେ ୧୨ଟା ସମୟରେ ଜଗମୋହନପୁର ଛକରେ ଗୋଟିଏ ଆଇରନ ବୋଝେଇ ଟ୍ରକ ପାଲଲହଡା ପଟୁ ଦୃତଗତିରେ ଆସୁଥିବା ବେଳେ ଏକ ବାଇକ୍କୁ ଧକ୍କା ଦେଇଥିଲା । ଜଙ୍କପାଣି ପଟୁ କାଳିଆହତା ପଞ୍ଚାୟତ କାଟେଣି ଗାଁର ଭିକାରୀ ଚରଣ ଦେହୁରୀ ବାଇକ୍ରେ ନିଜ ଶାଶୂଙ୍କୁ ନେଇ ତେଲକୋଇ ମେଡିକାଲକୁ ଯାଉଥିବା ସମୟରେ ଟ୍ରକଟି ତାଙ୍କ ବାଇକକୁ ଧକ୍କା ଦେଇ ୧୦୦ ମିଟର ଘୋଷାଡି ନେଇଥିଲା । ଫଳରେ ଘଟଣା ସ୍ଥଳରେ ଭିକାରୀଙ୍କ ମୃତ୍ୟୁ ଘଟିଥିଲା ଏବଂ ତାଙ୍କ ଶାଶୂ ମଲ୍ଲି ଗୁରୁତର ହୋଇ ପଡିଥିଲେ।
ଗୁରୁତର ଅବସ୍ଥାରେ ମଲ୍ଲୀଙ୍କୁ ତେଲକୋଇ ମେଡିକାଲରେ ଭର୍ତ୍ତି କରାଯାଇଛି । ଏଘଟଣାକୁ ନେଇ ଉତ୍ତେଜନା ସୃଷ୍ଟି ହେବା ସହ ୪୯ ନମ୍ବର ଜାତୀୟ ରାଜପଥକୁ ଅବରୋଧ କରାଯାଇଛି । ରାସ୍ତାର ଦୁଇ ପାର୍ଶ୍ଵରେ ଶତାଧିକ ଗାଡ଼ି ଛିଡା ହୋଇରହିଛି । ଦୋକାନ ବଜାର ମଧ୍ୟ ବନ୍ଦ ରହିଛି । ରାସ୍ତାରେ ସ୍ପିଡ ବ୍ରେକ୍ ଲଗାଯିଵା ସହ ମୃତକଙ୍କ ପରିବାରକୁ କ୍ଷତି ପୂରଣ ନଦେବା ଯାଏଁ ମୃତଦେହ ଉଠିବାକୁ ଦିଆଯିବ ନାହିଁ ବୋଲି ଆନ୍ଦୋଳନକାରୀ ପ୍ରକାଶ କରିଥିବା ବେଳେ ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି ।
