ବଲାଙ୍ଗୀର: ବଲାଙ୍ଗୀର ଯୋଗାଣ ବିଭାଗର ଦାୟିତ୍ୱ ନେବା ଦିନଠାରୁ ବଡ଼ ବାବୁଙ୍କ ହାକିମାତି। ସବୁ ସୌଜନ୍ୟତା ଭୁଲି, ଯାହାକୁ ଯା ଇଚ୍ଛା କହିଯାଉଥିଲେ। ବ୍ୟବହାର ବଦଳରେ ଦୁର୍ବ୍ୟହାର ଦେଉଥିଲେ। ଏଥିରୁ ବାଦ ପଡୁନଥିଲେ ମହିଳା କର୍ମଚାରୀ। ସହିବାର ସୀମା ଟପିଗଲା। ଜିଲ୍ଲାପାଳଙ୍କ ପାଖରେ ଅଭିଯୋଗ ଦାଖଲ କରିଲେ କାର୍ଯ୍ୟାଳୟର ମହିଳା କର୍ମଚାରୀ।
ଯୋଗାଣ ବିଭାଗର ବାବୁ ନିର୍ଯ୍ୟାତନା ଦେବା ସହ ଦୁର୍ବ୍ୟବହାର କରୁଥିବା ନେଇ ତାଙ୍କ ଅଧସ୍ତନ ମହିଳା କର୍ମଚାରୀ ଲିଖିତ ଆକାରରେ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିବା ଘଟଣା ଏବେ ସହରରେ ଚର୍ଚ୍ଚାର ବିଷୟ ହୋଇଛି।
ମିଳିଥିବା ସୂଚନା ଅନୁସାରେ, ବଲାଙ୍ଗୀର ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ମୀର ରାଜା ଅଲ୍ଲୀଙ୍କ ନିର୍ଯ୍ୟାତନା ଅସହ୍ୟ ହେବା ପରେ କାର୍ଯ୍ୟାଳୟରେ ହୋହାଲ୍ଲା ହୋଇଥିଲ । ବଡପାଟିରେ ତୁତୁ ମେମେଁ ଯାଏଁ କଥା ଯାଇଥିଲା। ପରେ ମହିଳା କର୍ମଚାରୀ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ଅଭିଯୋଗ ଦାଖଲ କରିଥିଲେ। ଅଭିଯୋଗପତ୍ରରେ ସେ ଜଣାଇଛନ୍ତି, ଯୋଗାଣ ବିଭାଗର ବାବୁ ଜଣକ କାର୍ଯ୍ୟରେ ଯୋଗଦେବା ଦିନଠାରୁ ମୋତେ ଦୁର୍ବବହାର କରୁଛନ୍ତି । ତାଙ୍କ କଥାରେ ମୋତେ ଯୌନ ନିର୍ଯାତନା ଦିଅନ୍ତି। ଅସହ୍ୟ ହେବା ପରେ ଲିଖିତ ଭାବେ ଜଣାଇଛି। ଜିଲ୍ଲାପାଳ କାର୍ଯ୍ୟାନୁଷ୍ଠାନ ନ ନେଲେ ସେ ଏଫଆଇଆର ଦେବେ ବୋଲି ଜଣାଇଛନ୍ତି। ଜିଲ୍ଲାପାଳ ଅନୁପସ୍ଥିତ ଥିବାରୁ ସେ ଷ୍ଟେନୋଙ୍କ ଚାମ୍ବରରେ ବସି କାନ୍ଦି କାନ୍ଦି ଲିଖିତ ଆକାରରେ ଜଣାଇଥିଲେ।
ଜିଲ୍ଲାପାଳଙ୍କ ନିକଟକୁ କଥା ପହଞ୍ଚିବା ପରେ ସେ ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ମୀର ରାଜା ଅଲ୍ଲୀଙ୍କୁ ଜିଲ୍ଲାପାଳ ପଚରାଉଚରା କରିଛନ୍ତି। ଏ ସଂପର୍କରେ ଜିଲ୍ଲାପାଳ କହିଛନ୍ତି, ତଦନ୍ତ ଚାଲିଛି। ପ୍ରମାଣ ମିଳିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
