ଚିକିଟୀ : ବ୍ରହ୍ମପୁର ପୋଲିସ ଜ଼ିଲ୍ଲା ର କେ ନୂଆଗାଁ ଥାନା ଓ ଜରଡ଼ା ଥାନା ରେ ଦୀର୍ଘ ଦିନ ହେଲା ଚୋରି ଅନବରତ ଚାଲି ଆସୁଥିବା ବେଳେ ଗତ ଶନିବାରରେ ଜରଡ଼ା ପୋଲିସ ଓ ନୂଆଗାଁ ଥାନା ପୋଲିସ ମିଳିତ ଭାବରେ ଏକ ଚୋରି ଗ୍ୟାଙ୍ଗ କୁ କାବୁ କରିପାରିଛି l ଏହି ଗ୍ୟାଙ୍ଗ ର କିଛି ସଦସ୍ୟକୁ ଜରଡ଼ା ପୋଲିସ ପିଛା କରି କେଲୁଆ ଛକ ନିକଟରେ ଥିବା ଏକ ପୋଖରୀ ନିକଟରେ କାବୁ କରିଥିଲେ l କାବୁ କରିଥିବା ଚୋର ମାନଙ୍କୁ ଦୀର୍ଘ ସମୟ ଧରି ପଚରା ଉଚରା କରିବା ପରେ ଅନ୍ୟ ମାନଙ୍କ ନାମ ବାହାର ହୋଇଥିବା ପୋଲିସ ପ୍ରକାଶ କରିଥିଲେ l ପରେ ପରେ ପୋଲିସ ଅନ୍ୟ ଚୋର ମାନଙ୍କୁ କାବୁ କରିବା ସକାଶେ ଚେଷ୍ଟା କରି ଶେଷରେ ଜଣେ ନାବାଳକ ଙ୍କ ସହ ଅନ୍ୟ ମାନଙ୍କୁ କାବୁ କରିବାରେ ସଫଳ ହୋଇଥିଲେ l ଏମାନେ ହେଲେ ଚିକିଟୀ ଓ ପାତ୍ରପୁର ବ୍ଲକ ଅଞ୍ଚଳର ଝଗଡା ଗ୍ରାମର ଅଲେଖ ନାଇକ, ତୁମ୍ବା ଶରଦାପୁର ଗ୍ରାମର ଦୁର୍ଗା ବାଗ ସିଂ, ଚନ୍ଦନ ଦଳାଇ, ଚିଲାଡୀ ଗ୍ରାମର ବି. ଦୀପକ ଓ ଅନ୍ୟ ଜଣେ ନାବାଳକ କୁ କାବୁ କରି ଗତ କାଲି ଅର୍ଥାତ ରବିବାରରେ ଚାରିଜଣ କୁ କୋର୍ଟ ଚାଲାଣ କରିଥିବା ବେଳେ ନାବାଳକକୁ ଅଟକ ରଖିଥିବା ସୂଚନା ମିଳିଛି। ଏମାନେ ଗତ ନଭେମ୍ବର ୨୭ ତାରିଖରେ ପାତ୍ରପୁର ର କାନାଡ଼ା ବ୍ୟାଙ୍କ, ନଭେମ୍ବର ୨୯ରେ କଳବାଡ ପଞ୍ଚାୟତ ଅଫିସଓ ଡିସେମ୍ବର ୧୩ ତାରିଖରେ ପାଣ୍ଡ୍ରି ଗ୍ରାମ ର ଗୋଟିଏ ମୋବାଇଲ ଦୋକାନ ରେ ଚୋରି କରି ପୋଲିସ ଆଖିରେ ଧୂଳି ଦେଇ ଫେରାର ହୋଇଯାଇଥିଲେ l ଅଭିଯୁକ୍ତଙ୍କୁ କାବୁ କରିବା ପରେ ଏମାନଙ୍କ ଠାରୁ ୪ଟୀ ସିପିୟୁ,୧ଲାପଟପ, ଗୋଟିଏ କମ୍ପୁଟର ଡିସପ୍ଲେ,ଗୋଟିଏ ଟିଭି ସହ ଗୋଟିଏ ମୋଟର ସାଇକେଲ,ସ୍କୁଟି,ସହ ଲୁହା କଟର ମଧ୍ୟ ଜବତ କରିଥିଲେ l ଦୀର୍ଘ ଦିନ ହେଲା ସମଗ୍ର ଅଞ୍ଚଳରେ ପୋଲିସର ଶିଥିଳତା ଓ ରାତ୍ରି ପେଟ୍ରୋଲିଂ ର ଅଭାବ ହେତୁ ଏଭଳି ଘଟଣା ଘଟୁଥିବା ସହ ଚୋର ମାନେ କକୁଆ ଭୟ ସୃଷ୍ଟି କରୁଥିବା ସାଧାରଣରେ ଚର୍ଚ୍ଚା ଜୋର ଧରୁଛି l
