ଭୁବନେଶ୍ବର : ବାତ୍ୟା ‘ଦାନା’ ଯୋଗୁ ଭଦ୍ରକ, ବାଲେଶ୍ଵର ଏବଂ କେନ୍ଦ୍ରାପଡ଼ା ଆଦି ୩ଟି ଜିଲା ବହୁମାତ୍ରାରେ କ୍ଷତିଗ୍ରସ୍ତ ହୋଇଛି। ଏହି ବାତ୍ୟା ଯୋଗୁ ଯେଉଁ ପରିମାଣରେ କ୍ଷୟକ୍ଷତି ହେବ ବୋଲି ଆକଳନ କରାଯାଇଥିଲା ତାହା ହୋଇନାହିଁ। କାରଣ ସ୍ଥଳଭାଗ ଛୁଇଁବା ବେଳକୁ ବାତ୍ୟାର ପ୍ରଭାବ ହ୍ରାସ ପାଇଯାଇଥିଲା। ଯେଉଁଥିପାଇଁ ଅଧିକ ମାତ୍ରାରେ କ୍ଷୟକ୍ଷତି ହୋଇ ନ ଥିଲା।
ତେବେ ବାତ୍ୟାର ପ୍ରଭାବ ହ୍ରାସ ପାଇବାର କାରଣ ପଛରେ ରହିଛି ୨ଟି ଆଣ୍ଟି ସାଇକ୍ଲୋନିକ ସର୍କୁଲେସନ ବା ଗୁରୁଚାପ। ଦୁଇ ପାର୍ଶ୍ବରେ ଦୁଇଟି ଗୁରୁଚାପ ସୃଷ୍ଟି ହେବା ଫଳରେ ବାତ୍ୟାର ତୀବ୍ରତା କମିଯାଇଥିଲା ବୋଲି ଭାରତୀୟ ପାଣିପାଗ ବିଭାଗ(ଆଇଏମଡି) ପକ୍ଷରୁ କୁହାଯାଇଛି। ଏହା ସହିତ ବାତ୍ୟା ସ୍ଥଳଭାଗ ଛୁଇଁଥିବା ଅଞ୍ଚଳରେ ୨୦୯ ବର୍ଗ କିଲୋମିଟର ପରିବ୍ୟାପ୍ତ ହେନ୍ତାଳ ବଣ ରହିଥିଲା। ଯେଉଁଥିପାଇଁ ବାତ୍ୟା ଯୋଗୁ ପ୍ରଥମ ଆଘାତ ଏହି ହେନ୍ତାଳ ବଣ ସହିଥିଲା। ସମୁଦ୍ର ଜୁଆରକୁ ହେନ୍ତାଳବଣ ବାଧା ଦେଇଥିଲା।
ବିଶେଷକରି ଦୁଇଟି ଆଣ୍ଟି ସାଇକ୍ଲୋନିକ ସର୍କୁଲେସନ ସୃଷ୍ଟି ହୋଇ ନ ଥିଲେ, ବାତ୍ୟା ପୂର୍ବରୁ ଯେଉଁ ବର୍ଷା ସୃଷ୍ଟି ହୋଇଥିଲା ତାହା ଅଧିକାଂଶ ଜିଲାକୁ ବ୍ୟାପିଯାଇଥାନ୍ତା। ଏହି ଦୁଇଟି ଗୁରୁଚାପ ମଧ୍ୟରୁ ଗୋଟିଏ ଆରବ ସାଗର ଉପରେ ସୃଷ୍ଟି ହୋଇଥିଲା। ଫଳରେ ବାତ୍ୟା ‘ଦାନା’ର ଉତ୍ତର-ଉତ୍ତରପଶ୍ଚିମ ପଟୁ ଶୁଷ୍କ ପବନ ସ୍ଥଳଭାଗକୁ ଅଗ୍ରସର ହୋଇଥିଲା। ସେହିପରି ବାତ୍ୟାର ପୂର୍ବ ପାର୍ଶ୍ବରେ ଅନ୍ୟ ଏକ ଗୁରୁଚାପ କ୍ଷେତ୍ର ସୃଷ୍ଟି ହୋଇ ସ୍ଥଳଭାଗକୁ ପବନ ବହିଥିଲା। ଦୁଇ ପାର୍ଶ୍ବରୁ ଗୁରୁଚାପ ବାତ୍ୟାକୁ ପ୍ରତିରୋଧ କରିଥିଲା। ଏପରି ହୋଇ ନ ଥିଲେ ମଧ୍ୟ ଓଡ଼ିଶାରେ ପ୍ରବଳ ବର୍ଷା ବିତ୍ପାତ ସୃଷ୍ଟି ହୋଇଥାନ୍ତା। ବାତ୍ୟାର ପବନ ଅଧିକ ଅଞ୍ଚଳକୁ ପ୍ରବେଶ କରି ବ୍ୟାପକ କ୍ଷୟକ୍ଷତି ଘଟାଇଥାନ୍ତା ବୋଲି ଆଇଏମଡି ବୈଜ୍ଞାନିକ ଉମା ଶଙ୍କର ଦାସ ଗଣମାଧ୍ୟମକୁ ସୂଚନା ଦେଇଥିଲେ। ଆଣ୍ଟି ସାଇକ୍ଲୋନିକ ସର୍କୁଲେସନ ହିଁ ବାତ୍ୟାକୁ ପ୍ରତିରୋଧ କରିଥିଲା। ଯାହାଫଳରେ କେବଳ ବାଲେଶ୍ଵର, ଭଦ୍ରକ ଏବଂ ମୟୂରଭଞ୍ଜରେ ପ୍ରବଳ ବର୍ଷା ହୋଇଥିଲା ବୋଲି ପାଣିପାଗ ବିଶେଷଜ୍ଞ ମତ ଦେଇଛନ୍ତି।
