ଖାଇବାକୁ ନଦେବାରୁ ଆକ୍ରମଣ ମଦ୍ୟପ ପୁଅର କାତି ଚୋଟରେ ବାପା ଗୁରୁତର…

ହିଞ୍ଜିଳିକାଟୁ, ତା ୨୭/୫(): ଖାଇବାକୁ ନଦେବାରୁ ଜଣେ ମଦ୍ୟପ ପୁଅ ନିଜ ବାପାଙ୍କୁ କାତିରେ ଆକ୍ରମଣ କରିଛି। ଏଭଳି ଏକ ଘଟଣା ରବିବାର ସନ୍ଧ୍ୟାରେ ହିଞ୍ଜିଳି ଥାନା ବଳରାମପୁର ଗ୍ରାମରେ ଦେଖିବାକୁ ମିଳିଛି। ମଦ୍ୟପ ପୁଅର କାତି ଚୋଟରେ ବୃଦ୍ଧ ବାପା ଜଣଙ୍କ ଗୁରୁତର ଆହତ ହୋଇଛନ୍ତି। ଆହତ ଜଣଙ୍କ ହେଲେ ହିଞ୍ଜିଳି ଥାନା ବଳରାମପୁର ଗ୍ରାମର ଅଭିମନ୍ୟୁ ଦାସ। ଆହତ ବୃଦ୍ଧଙ୍କ ଅଭିଯୋଗ ଭିତ୍ତିରେ ହିଞ୍ଜିଳି ଥାନାରେ କେସ ନଂ – ୫୦୩/୨୪ ରେ ଏକ ମାମଲା ରୁଜୁ କରି ରବିବାର ବିଳମ୍ବିତ ରାତିରେ ଆକ୍ରମଣକାରୀ ପୁଅ ସୁଶାନ୍ତ ଦାସଙ୍କୁ ଗିରଫ କରିବା ସହ ଆକ୍ରମଣରେ ବ୍ୟବହୃତ ଲୁହା କାତିକୁ ଜବତ କରିଛି। ଗିରଫ ସୁଶାନ୍ତଙ୍କୁ ସୋମବାର କୋର୍ଟ ଚାଲାଣ କରାଯାଇଥିବା ଥାନା ଆଇଆଇସି ଶ୍ରୀନିବାସ ସେଠି କହିଛନ୍ତି।
ପୁଲିସ ସୂତ୍ରରୁ ପ୍ରକାଶ ଯେ, ପ୍ରତିଦିନ ପରି ରବିବାର ଦିନ ବୃଦ୍ଧ ଅଭିମନ୍ୟୁ ଦିନ ମଜୁରିଆ ଭାବେ କାମ କରି ସନ୍ଧ୍ୟାରେ ଘରକୁ ଫେରିଥିଲେ । ସନ୍ଧ୍ୟାରେ ସୁଶାନ୍ତ ପ୍ରଚୁର ମଦ୍ୟପାନ କରି ଘରକୁ ଫେରିବା ପରେ ସୁଶାନ୍ତ, ତାଙ୍କ ବାପାଙ୍କୁ ଖାଇବା ପାଇଁ ମାଗିଥିଲେ। ବୃଦ୍ଧ ଜଣଙ୍କ ଉତକ୍ଷିପ୍ତ ହୋଇ ନିଜେ ରୋଜଗାର କରି ଖାଇବା ପାଇଁ କହିଥିଲେ। ଏଭଳି କରୁଣ ବୟସରେ ବାପା ରୋଜଗାର କରି ଯୁବ ପୁଅକୁ ଖାଇବାକୁ ଦେବାକୁ ଅସମର୍ଥ ବୋଲି କହିବାରୁ ସୁଶାନ୍ତ ମଦ ନିଶାରେ ଚୁର ହୋଇ ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ଘରେ ଥିବା ଏକ ଲୁହା କାତିରେ ବାପା ଅଭିମନ୍ୟୁଙ୍କ ମୁଣ୍ଡକୁ ଆକ୍ରମଣ କରିଥିଲେ। ଆକ୍ରମଣରେ ବୃଦ୍ଧ ଜଣଙ୍କ ଗୁରୁତର ଆହତ ହୋଇ ଜୀବନ ଭୟରେ ବାହାରକୁ ଚାଲିଆସିଥିଲେ। ବାହାରକୁ ଆସି କିଛି ଦୂରରେ ଚେତା ଶୁନ୍ୟ ହୋଇ ତଳେ ପଡି ଯାଇଥିଲେ । ଗ୍ରାମର କିଛି ଲୋକ ବୃଦ୍ଧଙ୍କୁ ଉଦ୍ଧାର କରି ହିଞ୍ଜିଳି ଥାନାକୁ ଆଣିଥିଲେ। ପୁଲିସ ଗୁରୁତର ବୃଦ୍ଧଙ୍କୁ ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଚିକିତ୍ସିତ ପରେ ବୃଦ୍ଧ ଜଣଙ୍କ ହିଞ୍ଜିଳି ଥାନାରେ ଅଭିଯୋଗ କରିଥିଲେ।