ଦାରିଙ୍ଗବାଡି,୧୭/୪ : ଦାରିଙ୍ଗବାଡିରେ ଧୁମ୍ଧାମରେ ଶ୍ରୀରାମ ନବମୀ ପାଳନ କରାଯାଇଛି। ଏହି ଅବସରରେ ଶିଵ ମନ୍ଦିର ପରିସରରେ ଏକତ୍ରିତ ହୋଇ ସାମୁହିକ ହନୁମାନ ଚାଳିଶା ପାଠ କରାଯିବା ସହ ସେଠାରୁ ମଟର ସାଇକେଲ ଶୋଭାଯାତ୍ରା ବାହାରିଥିଲା। ଶତାଧିକ ଶ୍ରୀରାମଭକ୍ତ ଦାରିଙ୍ଗବାଡି ସମେତ ସିମନବାଡି ଓ କିରିକୁଟି ପଞ୍ଚାୟତ ପର୍ଯ୍ୟନ୍ତ ପ୍ରାୟ ୨୦ କିଲୋମିଟର ବାଇକ ଶୋଭାଯାତ୍ରାରେ ଯାଇଥିଲେ। ସେହିପରି ପ୍ରଭୁ ଶ୍ରୀରାମଙ୍କ ପରମ ଭକ୍ତ ହନୁମାନଙ୍କୁ ମଧ୍ୟ ପୂଜାର୍ଚ୍ଚନା ସହ ଚାଳିଶା ପାଠ କରାଯାଇଛି। କାର୍ଯ୍ୟକ୍ରମକୁ ଶ୍ରୀରାମ ନବମୀ ମହୋତ୍ସବ ସମିତି (ଦାରିଙ୍ଗବାଡି ) ପକ୍ଷରୁ ଆୟୋଜନ କରାଯାଇଥିବା ବେଳେ ବିଶ୍ୱହିନ୍ଦୁ ପରିଷଦ,ବଜରଙ୍ଗ ଦଳ ସମେତ ବିଭିନ୍ନ ହିନ୍ଦୁ ସଂଗଠନ ଓ ଅଞ୍ଚଳବାସୀ ବିଶେଷ କରି ଯୁବପିଢ଼ି ଏଥିରେ ସାମିଲ ହୋଇ ଶ୍ରୀରାମଙ୍କୁ ସ୍ମରଣ କରିଥିଲେ। ଶାନ୍ତି ଶୃଙ୍ଖଳାର ସହ ଏହି ଶୋଭାଯାତ୍ରା କରାଯାଇଥିବା ବେଳେ ଆଇନ ଶୃଙ୍ଖଳାର ତଦାରଖ ପାଇଁ ଦାରିଙ୍ଗବାଡି ଆଇଆଇସି ଆନନ୍ଦ ଚନ୍ଦ୍ର ପାତ୍ର ନିଜେ ପାଟ୍ରୋଲିଂ କରିଥିଲେ।
