ନୂଆଦିଲ୍ଲୀ : ଦିଲ୍ଲୀର ତଥାକଥିତ ଅବକାରୀ ନୀତି ଦୁର୍ନୀତି ଘଟଣାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ୱିତୀୟ ସପ୍ଲିମେଣ୍ଟାରୀ ଚାର୍ଜଶିଟ ଦାଖଲ କରିଛି। ଏଥିରେ ଆପ୍ ସାଂସଦ ସଞ୍ଜୟ ସିଂହ ଓ ରାଘବ ଚଡ୍ଡାଙ୍କ ନାଁ ରହିଛି। ସପ୍ଲିମେଣ୍ଟାରୀ ଚାର୍ଜଶିଟରେ ଏମାନଙ୍କ ନାଁ ରହିଥିଲେ ମଧ୍ୟ ଦୁଇ ସାଂସଦଙ୍କୁ ଘଟଣାର ଅଭିଯୁକ୍ତ ଭାବେ ଦର୍ଶାଯାଇ ନାହିଁ। ଚାର୍ଜଶିଟ୍ରେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପର ମୁଖ୍ୟ ଅରବିନ୍ଦ କେଜ୍ରିୱାଲଙ୍କ ସମେତ ରାଘବ ଓ ସଞ୍ଜୟଙ୍କ ନାଁ ରହିଥିବାରୁ ଏହାକୁ ନେଇ ହଇଚଇ ସୃଷ୍ଟି ହୋଇଛି।
ଏହି ଘଟଣାରେ ଗିରଫ ହୋଇଥିବା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଘରେ ଗୋଟିଏ ବୈଠକ ହୋଇଥିଲା। ଏହି ବୈଠକରେ ନୂଆ ଅବକାରୀ ନୀତି ଲାଗୁ କରିବାକୁ ନିଷ୍ପତ୍ତି ହୋଇଥିଲା। ଏହି ବୈଠକରେ ରାଘବ ଚଡ୍ଡା ଯୋଗ ଦେଇଥିବା ଘଟଣାର ଜଣେ ସାକ୍ଷୀ ମତ ରଖିଥିଲେ। ଏହି ଆଧାରରେ ତାଙ୍କ ନାଁକୁ ଚାର୍ଜଶିଟରେ ସାମିଲ କରାଯାଇଛି।
ମନୀଷ ସିସୋଦିଆଙ୍କ ପୂର୍ବତନ ସଚିବ ସି ଅରବିନ୍ଦ ତଦନ୍ତକାରୀ ସଂସ୍ଥାକୁ ଦେଇଥିବା ବୟାନ ଆଧାରରେ ରାଘବ ଚଡ୍ଡାଙ୍କ ନାଁ ଚାର୍ଜଶିଟରେ ଉଲ୍ଲେଖ କରାଯାଇଛି। ସି ଅରବିନ୍ଦଙ୍କ କହିବା କଥା ଯେ ଉକ୍ତ ବୈଠକରେ ପଞ୍ଜାବର ଅବକାରୀ କମିଶନର ବରୁଣ ରୋଜାମ, ଘଟଣାର ଅଭିଯୁକ୍ତ ବିଜୟ ନାଏର ଓ ପଞ୍ଜାବ ଅବାକାରୀ ବିଭାଗର ଅନେକ ଅଧିକାରୀ ମଧ୍ୟ ସାମିଲ ହୋଇଥିଲେ।
କିଛି ଦିନ ତଳେ ଇଡି ଆଉ ଏକ ସପ୍ଲିମେଣ୍ଟାରୀ ଚାର୍ଜଶିଟ୍ ଦିଲ୍ଲୀ ସିବିଆଇ କୋର୍ଟରେ ଦାଖଲ କରିଥିଲା। ଏଥିରେ ପ୍ରଥମଥର ପାଇଁ ମନୀଷ ସିସୋଦିଆଙ୍କୁ ଘଟଣାର ଅଭିଯୁକ୍ତ ଭାବେ ଦର୍ଶାଯାଇଥିଲା।
୨୦୨୧-୨୨ରେ ଦିଲ୍ଲୀ ସରକାର ଲାଗୁ କରିଥିବା ନୂଆ ଅବକାରୀ ନୀତିରେ କିଛି ନିର୍ଦ୍ଦିଷ୍ଟ ମଦ ବ୍ୟବସାୟୀଙ୍କୁ ଫାଇଦା ଦେବାକୁ ବ୍ୟବସ୍ଥା କରିଥିବା ଅଭିଯୋଗ ହୋଇଥିଲା। ଏଥିପାଇଁ ବ୍ୟାପକ ଲାଞ୍ଚ କାରବାର ମଧ୍ୟ ହୋଇଥିବା କୁହାଯାଉଛି।
ଇଡି ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ ଓ ସିସୋଦିଆଙ୍କ ଉପରେ ସାଂଘତିକ ଅଭିଯୋଗ ଲଗାଇଛି। କେଜ୍ରିୱାଲଙ୍କ ମାନସ ସନ୍ତାନ ହେଉଛି ଏହି ନୂଆ ଅବକାରୀ ନୀତି। ସେ ଓ ସିସୋଦିଆ ମିଳିତ ଭାବେ ଅବାକାରୀ ନୀତିକୁ ଲାଗୁ କରିଥିଲେ। ଘଟଣାରେ ଗିରଫ ହୋଇଥିବା ବିଜୟ ନାଏରଙ୍କୁ ସବୁଠାରୁ ଅଧିକ ଫାଇଦା ମିଳିଥିବା ଇଡି କହିଛି।
କେନ୍ଦ୍ରୀୟ ଏଜେନ୍ସି ଆହୁରି ଅଭିଯୋଗ କରିଛି ଯେ ବିଆରଏସ୍ ନେତ୍ରୀ କେ କବିତା ଘଟଣାର ଅଭିଯୁକ୍ତ ତଥା ମଦ ବ୍ୟବସାୟୀ ସମୀର ମହେନ୍ଦ୍ରୁଙ୍କୁ ମଧ୍ୟ ୨୦୨୨ରେ ଭେଟିଥିଲେ। ଏହି ବୈଠକରେ ଘଟଣାର ଅନ୍ୟ ଅଭିଯୁକ୍ତମାନେ ମଧ୍ୟ ସାମିଲ ଥିଲେ। କବିତାଙ୍କୁ ଛାଡ଼ି ଅନ୍ୟମାନଙ୍କୁ ଗିରଫ କରାଯାଇଛି।
