ଯୋଶୀମଠ ପ୍ରସଙ୍ଗରେ ଭ୍ରମ ସୃଷ୍ଟି କରୁଛନ୍ତି ସରକାରୀ ସଂସ୍ଥା : ଗଣମାଧ୍ୟମ ଓ ସୋସିଆଲ ମିଡିଆରେ ବୟାନବାଜି ଉପରେ ଲାଗିଲା ରୋକ୍ …

ନୂଆଦିଲ୍ଲୀ : ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ଗୋଟିଏ ଦିନ ପୂର୍ବରୁ ରିପୋର୍ଟ କରିଥିଲା ଯେ ଉତ୍ତରାଖଣ୍ଡର ଯୋଶୀମଠ ମାତ୍ର ୧୨ ଦିନ ମଧ୍ୟରେ ୫.୪ ସେମି ଦବିଯାଇଛି । ଏହା ପରେ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ପକ୍ଷରୁ ସରକାରୀ ବିଭାଗଗୁଡ଼ିକ ଉପରେ କେତେକ କଟକଣା ଜାରି କରାଯାଇଛି । ଏହା ମଧ୍ୟରେ ରହିଛି ଗଣମାଧ୍ୟମ ସହ କଥାବାର୍ତ୍ତା କରିବା ଓ ସୋସିଆଲ ମିଡିଆରେ କୌଣସି ତଥ୍ୟ ଜାରି କରିବା । ସରକାରୀ ବିଭାଗ ଓ ସଂସ୍ଥାଗୁଡ଼ିକ ନିଜ ନିଜ ଅନୁସାରେ ଏସବୁ ତଥ୍ୟର ବ୍ୟାଖ୍ୟା କରୁଥିବାରୁ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହେଉଛି । ଇସ୍ରୋକୁ ବି ଏ ସଂପର୍କିତ ତଥ୍ୟ ଜାରି କରିବା ଉପରେ କଟକଣା ଲଗାଯାଇଛି ।
ଏନଡିଏମଏ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ କେନ୍ଦ୍ର ଗୃହମନ୍ତ୍ରୀଙ୍କ ଅଧ୍ୟକ୍ଷତାରେ ଜାନୁଆରୀ ୧୨ ରେ ଅନୁଷ୍ଠିତ ଏକ ବୈଠକରେ ଏହି ପ୍ରସଙ୍ଗଉପରେ ଆଲୋଚନା କରାଯାଇଥିଲା। “ଏହା ଦେଖାଯାଇଛି ଯେ ବିଭିନ୍ନ ସରକାରୀ ଅନୁଷ୍ଠାନ ସୋସିଆଲ ମିଡିଆ ପ୍ଲାଟଫର୍ମରେ ବିଷୟବସ୍ତୁ ସମ୍ବନ୍ଧୀୟ ତଥ୍ୟ ପ୍ରକାଶ କରିବା ସହିତ ପରିସ୍ଥିତିର ନିଜସ୍ୱ ବ୍ୟାଖ୍ୟା ସହିତ ଗଣମାଧ୍ୟମ ସହିତ କଥାବାର୍ତ୍ତା କରୁଛନ୍ତି। ଏହା କେବଳ ପ୍ରଭାବିତ ବାସିନ୍ଦାଙ୍କ ମଧ୍ୟରେ ନୁହେଁ ବରଂ ଦେଶର ନାଗରିକମାନଙ୍କ ମଧ୍ୟରେ ମଧ୍ୟ ଦ୍ୱନ୍ଦ୍ୱ ସୃଷ୍ଟି କରୁଛି ।”

ଯୋଶୀମଠ ଧସିବା ପ୍ରସଙ୍ଗରେ ସରକାର ଏକ ବିଶେଷଜ୍ଞ ଗୋଷ୍ଠୀ ଗଠନ କରିଛନ୍ତି ଓ ଏହି ଗୋଷ୍ଠୀର ଚୂଡ଼ାନ୍ତ ରିପୋର୍ଟ ନ ଆସିବା ପର୍ଯ୍ୟନ୍ତ ଗଣମାଧ୍ୟମ କିମ୍ବା ସୋସିଆଲ ମିଡିଆ ପ୍ଲାଟଫର୍ମର କୌଣସି ବୟାନ ନ ଦେବାକୁ ଏନଡିଏମଏ ନିର୍ଦ୍ଦେଶ ଦେଇଛନ୍ତି ।