କଟକ : ଆଜି ଓଡିଶାର ହଜାର ବର୍ଷର କଟକ ସହରର ଐତିହାସିକ ବାରବାଟି ଷ୍ଟାଡିୟମରେ ପୁରୁଷ ହକି ବିଶ୍ୱକପ୍ ରଙ୍ଗାରଙ୍ଗ ଉତ୍ସବ ସହିତ ଆରମ୍ଭ ହୋଇଛି। ଏହି ପ୍ରତିଯୋଗିତାର ଉଦଘାଟନୀ ସମାରୋହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ର ସୂଚନା ଓ ପ୍ରସାରଣ ଏବଂ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର, ଏଫ୍ଆଇଏଚ୍ ସଭାପତି ତାୟାବ ଇକ୍ରାମ, ହକି ଇଣ୍ଡିଆର ସଭାପତି ଦିଲ୍ଲୀପ ତିର୍କି ଏବଂ ଜାତୀୟ ତଥା ଆନ୍ତର୍ଜାତୀୟ ଖେଳାଳି ତଥା ପ୍ରତିନିଧୀମାନେ ଯୋଗ ଦେଇଥିଲେ।
ଷ୍ଟାଡିୟମରେ ଦର୍ଶକଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ ଅଂଶଗ୍ରହଣକାରୀଙ୍କୁ ସ୍ୱାଗତ କରିଥିବା ବେଳେ ବିଶ୍ୱକପ ଆୟୋଜନ ପାଇଁ ଓଡିଶାକୁ ଦେଇଥିବା ସମସ୍ତ ସହାୟତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଭାରତ ସରକାରଙ୍କୁ ଧନ୍ୟବାଦ ଜଣାଇଛନ୍ତି।କେନ୍ଦ୍ର ମନ୍ତ୍ରୀ ଶ୍ରୀ ଠାକୁର ଖେଳାଳି ଏବଂ ପ୍ରତିନିଧୀଙ୍କୁ ସ୍ୱାଗତ କରିବା ସହ କହିଛନ୍ତି ଯେ ପୁରୁଷ ହକି ବିଶ୍ୱକପ ଆୟୋଜନ ଭାରତ ପାଇଁ ଏକ ମହତ୍ ମୁହୂର୍ତ୍ତ। ଦୀର୍ଘ ଦିନରୁ ଭାରତ ହକିର ପ୍ରମୁଖ ଦାବିଦାର ହୋଇ ଆସୁଥିବା ଦର୍ଶାଇ ହକି କିମ୍ବଦନ୍ତୀ ମେଜର ଧ୍ୟାନଚାନ୍ଦ ସ୍ୱାଧୀନତା ପୂର୍ବରୁ ହକିରେ ସମ୍ମାନଜନକ ଅଲିମ୍ପିକ ସ୍ୱର୍ଣ୍ଣ କପକୁ ଦେଶକୁ କିପରି ତିନିଥର ଉପହାର ଦେଇଛନ୍ତି ତାହା ଉପରେ ମନ୍ତ୍ରୀ ଶ୍ରୀ ଠାକୁର କହିଥିଲେ ଯେ ସ୍ୱାଧୀନତା ପରେ ହକି କିମ୍ବଦନ୍ତୀ ବଲବୀର ସିଂ ଭାରତକୁ ବିଜୟୀ କରାଇଥିଲେ।
ସେ କହିଛନ୍ତି ଯେ ହକି ସମେତ ଦେଶରେ ଖେଳ ଏବଂ ଖେଳାଳିଙ୍କୁ ପ୍ରୋତ୍ସାହିତ କରିବା ପାଇଁ ଭାରତ ସରକାର ଯଥାସମ୍ଭବ ଉଦ୍ୟମ କରୁଥିବା ବେଳେ ରାଜ୍ୟଗୁଡିକ ମଧ୍ୟ ବହୁ ଅବଦାନ ରଖିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜଣେ କ୍ରୀଡା ପ୍ରେମୀ ବୋଲି ଦର୍ଶାଇ ମନ୍ତ୍ରୀ କହିଛନ୍ତି ଯେ ତାଙ୍କ ନେତୃତ୍ୱରେ ଭାରତ କୋଭିଡି ମହାମାରୀର କଠିନ ସମୟରେ ମଧ୍ୟ ଭାରତୀୟ ହକି ଦଳକୁ ସମସ୍ତ ସମର୍ଥନ ଯୋଗାଇ ଦିଆଯାଇଥିଲା ଯାହା ଦ୍ୱାରା ୨୦୨୨ ଟୋକିଓ ଅଲିମ୍ପିକରେ ଭାରତ ବ୍ରୋଞ୍ଜ ଜିତିଥିଲା। କେବଳ ଓଡିଶା ନୁହେଁ ସମଗ୍ର ଦେଶକୁ ବିଶ୍ୱ ସ୍ତରୀୟ ହକି ଷ୍ଟାଡିୟମ ଉପହାର ଦେଇଥିବାରୁ ସେ ମୁଖ୍ୟମନ୍ତ୍ରୀ ତଥା ଓଡିଶା ସରକାରଙ୍କୁ ଧନ୍ୟବାଦ ଜଣାଇଛନ୍ତି। ଉଭୟ ରାଜଧାନୀ ଭୁବନେଶ୍ୱର ଏବଂ ରାଉରକେଲାରେ ଶୁକ୍ରବାର ଠାରୁ ଆରମ୍ଭ ହେବାକୁ ଥିବା ହକି ପୁରୁଷ ବିଶ୍ୱକପରୁ ଇତିହାସ ସୃଷ୍ଟି କରିବାକୁ ସେ ଉତ୍ସାହୀ ଦର୍ଶକଙ୍କୁ ଆହ୍ୱାନ ଦେଇଥିଲେ।
