କୋଲକାତା: ପଶ୍ଚିମବଙ୍ଗର ମାଲଦା ଜିଲ୍ଲାର ମୋଥାବାରୀରେ ଦୁଇ ଦଳ ମଧ୍ୟରେ ବିବାଦ ବନ୍ଦ କରିବାକୁ ଯାଇଥିବା ତୃଣମୂଳ କଂଗ୍ରେସର ଜଣେ ନେତାଙ୍କୁ ହତ୍ୟା କରାଯାଇଛି | ମଙ୍ଗଳବାର ଦିନ ଏହି ଘଟଣା ଘଟିଥିଲା, ଯେତେବେଳେ ଉଚ୍ଚ ଶବ୍ଦରେ ଗୀତ ବଜାଇବା ନେଇ ଦୁଇ ଗୋଷ୍ଠୀ ମଧ୍ୟରେ ଝଗଡା ହୋଇଥିଲା। ମୃତକ ଜଣକ ହେଉଛନ୍ତି ତୃଣମୂଳ କଂଗ୍ରେସ ନେତା ଅଫଜାଲ ମୋମିନ (୬୫) । ଏହି ଘଟଣାରେ ପୁଲିସ ପନ୍ଦର ଜଣଙ୍କୁ ଅଟକ ରଖିଛି। ପୁଲିସର ସୂଚନାନୁସାରେ, ମଙ୍ଗଳବାର ସକାଳେ ପଠାନପାରା ଗାଁର ଏକ ଦଳ ପିକନିକ୍ କରି ମଣ୍ଡଳପାରା ଗ୍ରାମରୁ ଫେରୁଥିବାବେଳେ ଜୋରରେ ସଙ୍ଗୀତ ବଜାଉଥିଲେ। ଏହାକୁ ସ୍ଥାନୀୟ ନେତା ଅଫଜାଲ ମୋମିନ ଏବଂ ଅନ୍ୟ ଗ୍ରାମବାସୀ ବିରୋଧ କରିଥିଲେ। ଏହା ପରେ ଏକ ଝଗଡା ହୋଇଥିଲା। ମୋମିନ ଏବଂ ଅନ୍ୟ କେତେକ ଲୋକ ଏଥିରେ ହସ୍ତକ୍ଷେପ କରି ଏହି ମାମଲାକୁ ଶାନ୍ତ କରିଥିଲେ। ଏହା ପରେ ମଙ୍ଗଳବାର ଅପରାହ୍ନରେ ବହୁ ସଂଖ୍ୟକ ପଠାନପାରା ବାସିନ୍ଦା ଆକ୍ରମଣ କରିବାକୁ ମଣ୍ଡଳପାରା ଗ୍ରାମରେ ପହଞ୍ଚିଥିଲେ |
ଆଉ ସେମାନଙ୍କୁ ବୁଝାଇବାକୁ ମୋମିନ ସାମ୍ନାକୁ ଆସିଥିବାବେଳେ ତାଙ୍କୁ ଆକ୍ରମଣ କରାଯାଇଥିଲା। ସେ ଚେତା ହରାଇବା ପରେ ଗ୍ରାମବାସୀ ମୋମିନଙ୍କୁ ମାଲଦା ମେଡିକାଲ କଲେଜ ହସ୍ପିଟାଲକୁ ନେଇଥିଲେ, ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା | ମୋମିନଙ୍କ ପୁଅ ଜାହାଙ୍ଗୀର ଅଲିଙ୍କ ଅନୁଯାୟୀ ତାଙ୍କ ପିତାଙ୍କର ହୃଦ ସମସ୍ୟା ଥିଲା। କିଛି ଯୁବକ ଡିଜେ ଅତ୍ୟଧିକ ଜୋରରେ ବଜାଉଥିବାରୁ ସେ ଏହାକୁ ବିରୋଧ କରିଥିଲେ, କିନ୍ତୁ ତାଙ୍କୁ ଆକ୍ରମଣ କରାଯାଇଥିଲା ଓ ତାଙ୍କର ମୃତ୍ୟୁ ହୋଇଥିଲା। ମାଲଦା ପୁଲିସ ଅଧୀକ୍ଷକ ପ୍ରଦୀପ ଯାଦବ କହିଛନ୍ତି ଯେ ଦୁଇ ଗୋଷ୍ଠୀ ମଧ୍ୟରେ ଗୀତ ବଜାଇବା ନେଇ ବିବାଦ ଲାଗି ରହିଥିଲା। ମୋମିନ ଏହି ଝଗଡା ବନ୍ଦ କରିବାକୁ ଚେଷ୍ଟା କରିଥିଲେ। ଏହି ସମୟରେ ତାଙ୍କୁ ଆକ୍ରମଣ କରାଯାଇଥିଲା | ଏହି ଘଟଣାରେ ୧୫ ଜଣଙ୍କୁ ଅଟକ ରଖାଯାଇଛି ଓ ସେମାନଙ୍କୁ ପଚରାଉଚରା କରାଯାଉଛି।
