ଦେବଗଡ : ଅଜଣା ଦୁର୍ବୃତ୍ତଙ୍କ ଗୁଳି ମାଡରେ ଜଣେ ମହିଳା ଗୁରୁତର ଆହତ ହୋଇଛନ୍ତି। ଦେବଗଡ ଜିଲ୍ଲା ବାରକୋଟ ଥାନା ଅନ୍ତର୍ଗତ ସିଂହଶାଳ ଗ୍ରାମପଂଚାୟତ କଦୋଗୁଡା ଗ୍ରାମରେ ବୁଧବାର ରାତିରେ ଏଭଳି ଏକ ଅଭାବନୀୟ ଘଟଣା ଘଟିଛି। ଏହି ଗ୍ରାମର ରାଜେଶ ମହନ୍ତଙ୍କ ଘର ଭିତରେ ପଶି ଜଣେ ଅଜଣା ଦୁର୍ବୃତ୍ତ ଗୁଳି ମାଡ କରିଥିବା ବେଳେ ରାଜେଶଙ୍କ ପତ୍ନୀ ରୁକ୍ମୁଣୀ ମହନ୍ତ (୩୦) ଗୁରୁତର ଆହତ ହୋଇଛନ୍ତି। ରୁକ୍ମୁଣୀ ଘର ଭିତରେ ରୋଷେଇ କରୁଥିବା ବେଳେ କେହି ଜଣେ ହଠାତ ଘରକୁ ଆସି ଗୁଳିମାଡ କରି ଫେରାର ହୋଇଯାଇଥିବା ଜଣାପଡିଛି।
ଫଳରେ ରୁକ୍ମୁଣୀଙ୍କ ବାମ ଗୋଡରେ ଗୁରୁତର ଆଘାତ ଲାଗିଥିବା ବେଳେ ତାଙ୍କୁ ପରିବାର ଲୋକ ଉଦ୍ଧାର କରି ପ୍ରଥମେ ବାରକୋଟ ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ମାତ୍ର ଅବସ୍ଥା ଗୁରୁତର ହେବାରୁ ଜିଲ୍ଲା ମୂଖ୍ୟ ଚିକିତ୍ସାଳୟକୁ ନିଆ ଯାଇଥିବା ବେଳେ ସେଠାରୁ ବୁର୍ଲା ଡାକ୍ତରଖାନାକୁ ପଠାଇ ଦିଆଯାଇଛି। ଅନ୍ୟପଟେ ଗୁଳିମାଡ କରିଥିବା ଦୁର୍ବୃତ୍ତ ଜଣକ ମୁହଁରେ କପଡା ବାନ୍ଧିଥିବାରୁ ତାଙ୍କୁ କେହି ଚିହ୍ନି ପାରିନଥିଲେ। ତେବେ କେଉଁ କାରଣରୁ ଦୁର୍ବୃତ୍ତ ଜଣକ ଗୁଳିମାଡ କଲେ ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ଏନେଇ ବାରକୋଟ ଥାନା ପୁଲିସକୁ ଖବର ଦିଆଯାଇଥିବା ସୂଚନା ମିଳିଛି।
