ଭୁବନେଶ୍ବର: ପଦ୍ମପୁର ଉପନିର୍ବାଚନ ଫଳାଫଳ ନେଇ ବିରୋଧୀ ଦଳ ନେତା ଜୟନାରାୟଣ ମିଶ୍ର ଶନିବାର ବିସ୍ଫୋରକ ବୟାନ ଦେଇଛନ୍ତି। ବିଜେଡିର ବିଜୟ ପଛରେ ରାଜନୈତିକ ଡିଲ୍ ହୋଇଥିଲା ବୋଲି ସେ କହିଛନ୍ତି। ବିଜେଡି ପ୍ରଚାରରେ ଯିବା ପୂର୍ବରୁ କଂଗ୍ରେସ ସହିତ ଡିଲ୍ କରିଥିଲା। ଭୁବନେଶ୍ବରରେ କଂଗ୍ରେସର ନେତୃତ୍ବ ସହିତ ଏହି ଡିଲ୍ ହୋଇଥିଲା। କଂଗ୍ରେସର ଭୋଟ୍ ସ୍ଥାନାନ୍ତରିତ ପ୍ରତିଶ୍ରୁତି ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଚାର ପାଇଁ ପଦ୍ମପୁର ଯାଇଥିଲେ। ତେବେ ଜୟନାରାୟଣଙ୍କ ଅଭିଯୋଗ ପରେ ବିଜେଡି କୌଣସି ପ୍ରତିକ୍ରିୟା ଦେଇନାହିଁ। ଏବାଦରେ କଂଗ୍ରେସ ମଧ୍ୟ କିଛି କହି ନାହିଁ।
ଏହା ପୂର୍ବରୁ ବିରୋଧୀ ଦଳ ନେତା ଶ୍ରୀ ମିଶ୍ର କହିଥିଲେ ଯେ, ଅର୍ଥବଳ, ବାହୁବଳ ଓ ସରକାରୀ କଳ ଜରିଆରେ ପଦ୍ମପୁରରେ ବିଜେଡି ନିର୍ବାଚନ ଜିତିଛି। କିନ୍ତୁ ୨୦୨୪ରେ ପଦ୍ମପୁରରେ ପୁଣିଥରେ ବିଜେପି ଜିତିବ। ଆଗାମୀ ଦିନରେ ବିଜେପି ପୂରା ଓଡ଼ିଶାରେ ଭଲ ପ୍ରଦର୍ଶନ କରିବ। ୧୪୭ ବିଧାନସଭା ଆସନ ଉପରେ ବିଜେପି ଫୋକସ କରୁଛି । ୨୦୨୪ ନିର୍ବାଚନରେ ଦୁଇ ତୃତୀୟାଂଶ ଆସନ ସହ ସରକାର ଗଢିବୁ।
ଅନ୍ୟପଟରେ ୨୦୨୪ ସାଧାରଣ ନିର୍ବାଚନରେ ବିଜେଡି ୧୨୫ରୁ ଅଧିକ ଆସନରେ ବିଜୟ ହେବ ବୋଲି ଭଟଲି ବିଧାୟକ ସୁଶାନ୍ତ ସିଂ ବୟାନ ଦେଇଛନ୍ତି। ସୁଶାନ୍ତଙ୍କ ବୟାନ ଉପରେ ଜୟନାରାୟଣ ମିଶ୍ର ଜବାବ ରଖିଛନ୍ତି। ସେ କହିଛନ୍ତି ଯେ, ରାଜନୈତିକ ଦଳ ଭାବେ ମିଶନ ନେଇ ଆଗକୁ ବଢିବା କିଛି ନୂଆ କଥା ନୁହେଁ। କିନ୍ତୁ ୨୦୨୪ରେ ବିଜେଡିର ଅବସ୍ଥା କଣ ହେବ ତାହା ଜାଣିପାରିବେ। ମିଶନ ୧୨୫ କହିବାକୁ ପଇସା ଦେବାକୁ ପଡୁନାହିଁ।
