ଦାରିଙ୍ଗବାଡ଼ି :୯/୧୨, ଦାରିଙ୍ଗବାଡ଼ି ଠାରେ ବାଘାଜ୍ୟୋତିନ ଯୁବକସଂଘ ପକ୍ଷରୁ ଜିଲ୍ଲା ସ୍ତରୀୟ ଭଳିବଲ ଟୁର୍ଣ୍ଣାମେଣ୍ଟ ହିଲ୍ ଭିୟୁ କପ୍-୨୦୨୨ ଆୟୋଜନରେ ଟୁର୍ଣ୍ଣାମେଣ୍ଟ ଉଦଘାଟିତ ହୋଇଯାଇଛି । ଏଥିରେ କନ୍ଧମାଳ ଜିଲ୍ଲା ସହିତ ଗଂଜାମ, ଗଜପତି ଓ କଳାହାଣ୍ଡି ଜିଲ୍ଲାର ୧୬ଟି ଭଳିବଲ ଦଳ ପ୍ରତିଯୋଗିତାରେ ଖେଳିବା ପାଇଁ ଅଂଶ ଗ୍ରହଣ କରିବାର କାର୍ଯ୍ୟକ୍ରମ ରହିଛି । ଏହି ଖେଳ ସପ୍ତାହ ଧରି ଚାଲି ଆସନ୍ତା ୧୫.୧୨.୨୦୨୨ ତାରିଖରେ ଫାଇନାଲ ଖେଳ ହୋଇ ଉଦଯାପିତ ହେବାନେଇ ଆୟୋଜନ କମିଟିର ପରିଚାଳକ କାଳିପ୍ରସାଦ ମିଶ୍ର ସୂଚନା ଦେଇଛନ୍ତି । ଏହି ଉଦଘାଟନ କାର୍ଯ୍ୟକ୍ରମରେ ଅତିଥି ଭାବେ ଦାରିଙ୍ଗବାଡ଼ି ସମିତି ଅଧ୍ୟକ୍ଷ ଶୁଶାନ୍ତ କୁମାର ପ୍ରଧାନ, ଜିଲ୍ଲା ପରିଷଦ ସଭ୍ୟ ରଞ୍ଜନ କୁମାର ପ୍ରଧାନ ଓ ଦାରିଙ୍ଗବାଡ଼ି ରୋମାନ କ୍ୟାଥଲିକ ଚର୍ଚ୍ଚ ମୁଖ୍ୟ ଯାଜକ ମୁକୁନ୍ଦ ବଲିଆରସିଂ ଯୋଗଦେଇ ଖେଳର ଶୁଭାରମ୍ଭ କରି ଖେଳାଳି ମାନଙ୍କୁ ଉତ୍ସାହିତ କରିଥିଲେ । ବାଘାଜ୍ୟୋତିନ ଯୁବକସଂଘର ସଭାପତି ରୁବା ପ୍ରଧାନ ଓ ସଂପାଦକ କିରଣ ପ୍ରଧାନ ଏହି ସମସ୍ତ ଆୟୋଜନର ନେତୃତ୍ବ ନେଉଥିଲା ବେଳେ କାଳିପ୍ରସାଦ ମିଶ୍ର ଏହାର ପରିଚାଳକ ଭାବେ କାର୍ଯ୍ୟ ନିର୍ବାହ କରୁଛନ୍ତି । ଆଜି ସୁପର ସିକ୍ସ ଭଳିବଲ ଦଳ ସହ ଫରେଷ୍ଟ ସିକ୍ସ ଦଳର ଖେଳକୁ ଅତିଥି ମାନେ ଦର୍ଶକଙ୍କ ପାଇଁ ଲୋକାର୍ପଣ କରିଥିଲେ । ଖେଳରେ ସୁପର ସିକ୍ସ ଦଳ ଫରେଷ୍ଟ ସିକ୍ସ ଦଳକୁ ହରାଇ ବିଜୟୀ ହୋଇଥିଲେ । ସେହିଭଳି ଆଜି ଅପରାହ୍ନରେ ରାଇଜିଙ୍ଗ ଷ୍ଟାର ସହିତ ଡ଼ିପୁମାହା ଭଳିବଲ ଦଳ ସହ ଖେଳ ହୋଇଥିଲା । ଏଥିରେ ଡ଼ିପୁମାହା ଦଳ ରାଇଜିଙ୍ଗ ଷ୍ଟାର ଦଳକୁ ହରାଇ ବିଜୟୀ ହୋଇଥିଲେ । ରେଫେରି ଭାବେ ଅଜିତ ପ୍ରଧାନ ଯୋଗଦେଇ ଖେଳକୁ ପରିଚାଳନା କରିଥିଲେ ।
