ଲକ୍ଷ୍ନୌ: ସାରା ଦେଶରେ ଇଲେକ୍ଟ୍ରିକ କାର୍ ବ୍ୟବହାରକୁ ନେଇ ଲୋକଙ୍କୁ ପ୍ରୋତ୍ସାହିତ କରିବାକୁ ସରକାର ବିଭିନ୍ନ ସ୍ତରରେ ଚେଷ୍ଟା କରୁଛନ୍ତି। ବର୍ତ୍ତମାନ ଉତ୍ତରପ୍ରଦେଶର ଯୋଗୀ ଆଦିତ୍ୟନାଥ ସରକାର ମଧ୍ୟ ଏଥିପାଇଁ ଏକ ନୂତନ ଇଲେକ୍ଟ୍ରିକ ଯାନ ନୀତି-୨୦୨୨ କୁ ଅନୁମୋଦନ କରିଛନ୍ତି। ସରକାର ଏହି ନୀତିକୁ ୩ଡି କରିଛନ୍ତି। ଏଠାରେ ୩ଡିର ଅର୍ଥ ହେଉଛି ଏହି ନୀତି ଦ୍ବାରା ୩ଟି ଭିନ୍ନ ଲକ୍ଷ୍ୟ ହାସଲ କରିବା। ପ୍ରଥମଟି ହେଉଛି ନୂତନ ଇଲେକ୍ଟ୍ରିକ ଯାନ କିଣିବାରେ ସରକାର କ୍ରେତାଙ୍କୁ ବିପୁଳ ରିହାତି ପ୍ରଦାନ କରିବେ, ଦ୍ବିତୀୟରେ ରାଜ୍ୟରେ ଇଲେକ୍ଟ୍ରିକ ଯାନ ତିଆରିକୁ ଉତ୍ସାହିତ କରିବ, ଯାହାଦ୍ୱାରା ସେମାନଙ୍କର ମୂଲ୍ୟ ହ୍ରାସ ପାଇବ। ତୃତୀୟଟି ହେଉଛି ଚାର୍ଜିଂ ଷ୍ଟେସନ୍ କିମ୍ବା ବ୍ୟାଟେରୀ ସ୍ୱାପିଂ ସେଣ୍ଟର ପ୍ରତିଷ୍ଠା କରୁଥିବା ଲୋକଙ୍କୁ ସରକାର ଅନେକ ରିହାତି ପ୍ରଦାନ କରିବେ।
ଉତ୍ତରପ୍ରଦେଶ ସରକାରଙ୍କ ନୂତନ ନୀତି ଅନୁଯାୟୀ ଯଦି ଜଣେ ବ୍ୟକ୍ତି ୟୁପିରେ ଏକ ନୂତନ ଇଲେକ୍ଟ୍ରିକ ଯାନ କିଣନ୍ତି ତେବେ ତାଙ୍କୁ ରିହାତି ମିଳିବ। ଏହି ରିହାତି ଇଲେକ୍ଟ୍ରିକ୍ ୨ଚକିଆ ଯାନ, ୩ଚକିଆ ଯାନ, କାର୍ ଏବଂ ବସ୍ କିଣିଲେ ଦିଆଯିବ। ରାଜ୍ୟରେ କିଣାଯାଇଥିବା ଇଲେକ୍ଟ୍ରିକ ଯାନଗୁଡ଼ିକୁ କାରଖାନା ମୂଲ୍ୟ ଉପରେ ସରକାର ୧୫ପ୍ରତିଶତ ସବସିଡି ପ୍ରଦାନ କରିବେ।
ସେହି ଅନୁଯାୟୀ, ରାଜ୍ୟରେ କିଣାଯାଇଥିବା ପ୍ରଥମ ୨ଲକ୍ଷ ଇଲେକ୍ଟ୍ରିକ ଦୁଇ ଚକିଆ ଯାନରେ ଗାଡି ପିଛା ୫୦୦୦ଟଙ୍କା ରିହାତି ମିଳିବ। ଏଥି ସହିତ ସରକାର ପ୍ରାରମ୍ଭିକ ୫୦,୦୦୦ ଇଲେକ୍ଟ୍ରିକ ତିନି ଚକିଆ ଯାନ ଉପରେ ୟୁନିଟ୍ ପିଛା ୧୨,୦୦୦ ଟଙ୍କା ରିହାତି ପ୍ରଦାନ କରିବେ। ଇଲେକ୍ଟ୍ରିକ୍ କାର୍ କିଣିବା କ୍ଷେତ୍ରରେ, ପ୍ରଥମ ୨୫,୦୦୦ କାର୍ କ୍ରେତାଙ୍କୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ରିହାତି ମିଳିବ।
ଇଲେକ୍ଟ୍ରିକ୍ ବସ୍ କିଣିବା ଉପରେ ମଧ୍ୟ ସରକାର ଏକ ବଡ଼ ରିହାତି ଘୋଷଣା କରିଛନ୍ତି। ରାଜ୍ୟରେ ପ୍ରାରମ୍ଭିକ ୪୦୦ ଇଲେକ୍ଟ୍ରିକ୍ ବସ୍ ଉପରେ ୨୦ଲକ୍ଷ ଟଙ୍କା ପର୍ଯ୍ୟନ୍ତ ସବସିଡି ଦିଆଯିବ ବୋଲି ସରକାର କହିଛନ୍ତି।
