ବ୍ରହ୍ମପୁର: ସ୍ୱାମୀକୁ ଜେଲ୍ରୁ ମୁକୁଳାଇବାକୁ ପ୍ରଲୋଭନ ଦେଖାଇ ସ୍ତ୍ରୀକୁ ଦୁଷ୍କର୍ମ ଅଭିଯୋଗ । ସଂପୃକ୍ତ ମାମଲାରେ ଗୋସାଇଁନୂଆଗାଁ ଥାନା ଅଞ୍ଚଳର ତୋଫାନ୍ ପରିଡ଼ାକୁ ଗିରଫ କରି କୋର୍ଟ ଚାଲାଣ କରିଛି ଟାଉନ୍ ଥାନା ପୁଲିସ । ଜାମିନ୍ ନାମଞ୍ଜୁର ହେବା ପରେ ତାଙ୍କୁ ଜେଲ୍ ହାଜତକୁ ପଠାଇଦିଆଯାଇଛି ।
ପୁଲିସ ସୂଚନା ପ୍ରକାରେ କବିସୂର୍ଯ୍ୟନଗର ଅଞ୍ଚଳର ଜଣେ ମହିଳାଙ୍କ ସ୍ୱାମୀ କିଛି ମାସ ହେଲା କୌଣସି ଏକ ମାମଲାରେ ଗିରଫ ହୋଇ ଜେଲ୍ରେ ଅଛନ୍ତି ।
ମହିଳା ଟାଉନ୍ ଥାନା ଅଞ୍ଚଳରେ ରହୁଥିବା ବେଳେ ତୋଫାନ୍ କୌଣସି ପ୍ରକାରେ ତାଙ୍କ ସହ ଯୋଗାଯୋଗରେ ଆସିଥିଲେ। ମହିଳାଙ୍କୁ ପ୍ରଲୋଭିତ କରିଥିଲେ ଏବଂ ସେ ଜଣେ ପ୍ରଭାବଶାଳୀ ବ୍ୟକ୍ତି କହି ତାଙ୍କ ସ୍ୱାମୀଙ୍କୁ ଜେଲ୍ରୁ ମୁକୁଳାଇବେ ବୋଲି କହିଥିଲେ । ମହିଳାଙ୍କ ସହ ସମ୍ପର୍କ ବଢ଼ାଇଥିଲେ ତୋଫାନ୍ । ମହିଳାଙ୍କୁ ବିବାହ କରିବାକୁ ସେ ପ୍ରତିଶ୍ରୁତି ଦେଇଥିଲେ । ଶାରୀରିକ ସମ୍ପର୍କ ରଖିବା ପରେ ମହିଳାଙ୍କୁ ଦେଖାଦେଇନଥିଲେ ତୋଫାନ୍ । ମହିଳା ଯୋଗାଯୋଗ କରିବାକୁ ଚେଷ୍ଟା କରି ବିଫଳ ହେବା ପରେ ଟାଉନ୍ ଥାନାର ଦ୍ୱାରସ୍ଥ ହୋଇଥିଲେ । ଟାଉନ୍ ଥାନା ପୁଲିସ ଅଭିଯୋଗକୁ ଆଧାର କରି ତୋଫାନ୍କୁ ଗିରଫ କରି କୋର୍ଟ ଚାଲାଣ କରିଛି ।
