ଭୁବନେଶ୍ୱର : ପଞ୍ଚାୟତ ନିର୍ବାଚନରେ ପୂର୍ବତନ ମନ୍ତ୍ରୀ ଅଞ୍ଜଳି ବେହେରା ପରାସ୍ତ ହୋଇଛନ୍ତି । ସମିତିସଭ୍ୟ ନିର୍ବାଚନରେ ସେ ବହୁ ଭୋଟରେ ହାରି ଯାଇଛନ୍ତି । ଅଧ୍ୟକ୍ଷ ହେବା ଲକ୍ଷ୍ୟ ନେଇ ସେ ସମିତି ସଭ୍ୟ ପ୍ରାର୍ଥୀ ହୋଇଥିଲେବି ପରାଜୟର ସାମ୍ନା କରିଛନ୍ତି । ହିନେ୍ଦାଳ ବ୍ଲକର ଗିରିଧାରୀ ପ୍ରସାଦ ପଞ୍ଚାୟତରୁ ସେ ସମିତିସଭ୍ୟ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ । ଯେଉଁ ଆସନ ସଂରକ୍ଷିତ ରହିଥିଲା ।
ଶ୍ରୀମତୀ ବେହେରାଙ୍କ ବାପା ସ୍ୱର୍ଗତ ତ୍ରିନାଥ ନାୟକ ତିନି ଥର ବିଧାନସଭାକୁ ନିର୍ବାଚିତ ହେବା ସହ ମନ୍ତ୍ରୀ ମଧ୍ୟ ଥିଲେ । ପରେ ସେ ମଧ୍ୟ ହିିନ୍ଦୋଳ ଆସନରୁ ୨୦୦୦ରୁ ୨୦୧୪ ପର୍ଯ୍ୟନ୍ତ ବିଜେଡ଼ି ବିଧାୟିକା ଥିଲେ । ପ୍ୟାରୀମୋହନ ମହାପାତ୍ରଙ୍କ ସହ ଲିଙ୍କ ଓ ମଧ୍ୟରାତ୍ର ଷଡ଼ଯନ୍ତ୍ର କାରଣରୁ ତାଙ୍କୁ ଦଳରୁ କୋଣଠେସା କରି ଦିଆଯାଇଥିଲା । ଶେଷରେ ସେ ବାଧ୍ୟ ହୋଇ ବିଜେଡ଼ି ଛାଡ଼ି ବିଜେପିରେ ଯୋଗ ଦେଇଥିଲେ ।
୨୦୨୪ରେ ବିଧାୟିକା ଭାବେ ନିର୍ବାଚନ ଲଢିବାକୁ ସେ ଆଶା ରଖିଥିଲେ । ତେବେ ଏଥର ହିନେ୍ଦାଳ ବ୍ଲକ ଅଧ୍ୟକ୍ଷା ହେବା ଲକ୍ଷ୍ୟରେ ସେ ନିର୍ବାଚନ ମଇଦାନକୁ ଓହ୍ଲାଇଥିଲେ ।
