ହିଞ୍ଜିଳିକାଟୁ : ହିଞ୍ଜିଳି ଥାନା ଗୋପିନାଥପୁର ଗ୍ରାମରେ ଶନିବାର ସକାଳେ ନିଆଁ ଲଗାଇ ଧାନଫସଲ ନଷ୍ଟ କରିଥିବା ନେଇ ହିଞ୍ଜିଳି ଥାନାରେ ଅଭିଯୋଗ ହୋଇଛି । ଘଟଣା ନେଇ ଜମି ମାଲିକ ହିଞ୍ଜିଳି ଥାନା ଗୋପିନାଥପୁର ଗ୍ରାମର ଏମ. ଦିଲ୍ଲିପ କୁମାର ହିଞ୍ଜିଳି ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଭିତ୍ତିରେ ହିଞ୍ଜିଳି ଥାନାରେ କେସ ନଂ- ୩୧/୨୪ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଚଳାଇଛି । ଅଭିଯୋଗ ପ୍ରକାରେ, ଗୋପିନାଥପୁର ଗ୍ରାମରଦିଲ୍ଲିପ ଶନିବାର ସକାଳେ ଜଣେ ସର୍ମ୍ପକୀୟଙ୍କୁ ବ୍ରହ୍ମପୁର ରେଳ ଷ୍ଟେସନରେ ଛାଡି ଗ୍ରାମକୁ ଫେରୁଥିଲେ । ଫେରିବା ସମୟରେ ନିଜ ଧାନଫସଲରେ ନିଆଁ ଲାଗିଥିବା ଦେଖିବାକୁ ପାଇଥିଲେ । ଜମି ନିକଟକୁ ଯାଇ ଦେଖିବା ବେଳେ ସେହି ଗ୍ରାମର ପି. ଶିବରାମ, ଜମି ନିକଟରୁ ଦୌଡି ପଳାଉଥିବା ଦେଖିଥିଲେ । ପୂର୍ବ ଶତୃତାକୁ କେନ୍ଦ୍ର କରି ଶିବରାମ , ତାଙ୍କ ଧାନଫସଲରେ ନିଆଁ ଲଗାଇଥିବା ନେଇ ଅଭିଯୋଗ ପତ୍ରରେ ଦର୍ଶାଇଛନ୍ତି । ଖବର ପାଇ ଅଗ୍ନିଶମ ବାହିନୀ କର୍ମଚାରୀ ମାନେ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ନଷ୍ଟ ହୋଇଥିବା ଧାନ ଫସଲର ଆନୁମାନିକ ମୂଲ୍ୟ ୩୦ ହଜାରରୁ ଉର୍ଦ୍ଧ୍ୱ ଟଙ୍କା ହେବ ବୋଲି ଜଣାପଡିଛି ।
