ପଟ୍ଟାମୁଣ୍ଡାଇ : ବିଦ୍ୟାଳୟ ପରିସରରେ ଛାତ୍ରଙ୍କୁ ଛୁରାମାଡ଼ । ଆହତ ଛାତ୍ର ମେଡିକାଲରେ ଭର୍ତ୍ତି । କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ତେଲେଙ୍ଗା ବସନ୍ତ ପଞ୍ଚାୟତ ନୋଡାଲ ହାଇସ୍କୁଲରେ ଘଟିଛି ଘଟଣା । ମଧ୍ୟାହ୍ନ ଭୋଜନ ବିରତି ସମୟରେ ଘଟିଛି ଘଟଣା ।
ସୂଚନା ଅନୁସାରେ, କ୍ଲାସ୍ ଚାଲିଥିବା ବେଳେ ଜଣେ ଛାତ୍ରଙ୍କ ହାତ ଅନ୍ୟଜଣେ ଛାତ୍ରଙ୍କ ମୁଣ୍ଡରେ ବାଜିଥିଲା । ଏହାକୁ ନେଇ ଉଭୟ ଛାତ୍ରଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ସ୍କୁଲ ଶିକ୍ଷକ ଆସି ଉଭୟଙ୍କୁ ଆଟକାଇଥିଲେ । ପରେ ମଧ୍ୟାହ୍ନ ଭୋଜନ ସମୟରେ ଉଭୟଙ୍କ ମଧ୍ୟରୁ ଜଣେ ଛାତ୍ର ଘରକୁ ଯାଇ ଏକ ଛୁରୀ ଆଣି ଅନ୍ୟଜଣେ ଛାତ୍ରଙ୍କୁ ଆକ୍ରମଣ କରିଥିଲେ । ଗୁରୁତର ଛାତ୍ରଙ୍କୁ ସ୍ଥାନୀୟ ଉପ ଚିକିତ୍ସାକେନ୍ଦ୍ରରେ ଭର୍ତ୍ତି କରାଯାଇଛି ।
ତେବେ ଘଟଣା ସମ୍ପର୍କରେ ପ୍ରତିକ୍ରିୟା ରଖି ଶିକ୍ଷକ ସୁଶାନ୍ତ କୁମାର ଦାସ କୁହନ୍ତି, ଖାଇସାରିବା ସମୟରେ ସେମାନଙ୍କ ପରସ୍ପର ଭିତରେ କଣ ହୋଇଛି,ବହୁତ ପିଲା ଏକାଠି ଥିଲେ । ଏହି ସମୟରେ ଘର ନିର୍ମାଣ ପାଇଁ ଯେଉଁ ବାଲି ଗଦା ହୋଇଛି ସେଠାରେ ଖେଳିବା ସମୟରେ ଏଭଳି ଗଣ୍ଡଗୋଳ ହୋଇଛି । ଆମେ କେବେ ଛୁରୀ ସ୍କୁଲରେ ଦେଖିନଥିଲୁ ସେ ଯେଉଁଥିରେ ଆକ୍ରମଣ କରିଛି ତାହା ଛୁରା ନୁହେଁ ତାହା କତୁରୀର ଏକ ଅଂଶ ।
