କଟକ : ରଣକ୍ଷେତ୍ର ପାଲଟିଲା କଲେଜ ପରିସର । ବିଗିଡ଼ିଲା ଶୈକ୍ଷିକ ବାତାବରଣ । କୌଣସି କାରଣକୁ ନେଇ କଟକ ରାଜବଗିଚା ସ୍ଥିତ ସିଟି କଲେଜରେ ଏକ ନିର୍ଦ୍ଧିଷ୍ଟ ଗୋଷ୍ଠୀ କଲେଜରେ ପଢ଼ୁଥିବା ଯୁକ୍ତ ୨ ଛାତ୍ରଙ୍କୁ ମରଣାସ୍ତ୍ରରେ ଆକ୍ରମଣ କରିଥିବା ଅଭିଯୋଗ ଆଣିଛନ୍ତି ଛାତ୍ରଛାତ୍ରୀ ।
କିଛି ଅଣ ଛାତ୍ର ପ୍ରତ୍ୟେକ ଦିନ ନିଶାଶକ୍ତ ଅବସ୍ଥାରେ କଲେଜ ଛାତ୍ରୀଙ୍କୁ କମେଣ୍ଟ ମାରିବା ସହ ଅସଦାଚରଣ ସହ ନିଶା ସେବନ କରିବାକୁ ବାଧ୍ୟ କରୁଥିଲେ। ସେମାନଙ୍କୁ ବିରୋଧ କରିବାରୁ ମରଣାନ୍ତକ ଆକ୍ରମଣ କରିଥିବା ଅଭିଯୋଗ କରିଛନ୍ତି କଲେଜ ଛାତ୍ର । ଘଟଣାର ଖବର ପାଇଁ ବାଦାମବାଡ଼ି ଥାନା ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା ।
ଉଭୟ ଗୋଷ୍ଠୀର ଛାତ୍ରଛାତ୍ରୀଙ୍କୁ କଲେଜକୁ ଆଣି ପଚରା ଉଚରା କରିବା ସହ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲ ପଠାଇଥିଲା ପୋଲିସ । ଅନ୍ୟପଟେ ଇଂଜ୍ୟୁରି ରିପୋର୍ଟକୁ ଅପେକ୍ଷା କରାଯାଇଛି । ପଡ଼ିଆରେ ଗୋଷ୍ଠୀ ସଂଘର୍ଷର ଭିଡିଓର ଅନୁଧ୍ୟାନ କରାଯାଉଥିବା ବେଳେ ଛାତ୍ରଛାତ୍ରୀ, କଲେଜ୍ କର୍ତ୍ତୃପକ୍ଷଙ୍କୁ ପଚରା ଉଚରା ଜାରି ରହିଥିବା ସୂଚନା ଦେଇଛି ପୋଲିସ । ତେବେ ଘଟଣାକୁ ନେଇ ଥାନାରେ କୌଣସି ଲିଖିତ ଅଭିଯୋଗ ହୋଇନାହିଁ । ପୋଲିସ ପକ୍ଷରୁ ଏକ ଷ୍ଟେସନ୍ ଡାଏରୀ କରାଯାଇଥିବା ସୂଚନା ରହିଛି ।
