ଭୁବନେଶ୍ୱର : ଗିରଫ ହେଲେ କୋଟିପତି ଇଡକୋ ବାବୁ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଇଡକୋ ଜୁନିୟର ମ୍ୟାନେଜର ବିଜୟ କୁମାର ଉଦୟସିଂହୁଙ୍କୁ ଗିରଫ କଲା ଭିଜିଲାନ୍ସ । ଭୁବନେଶ୍ୱରରେ ବିଜୟ କୁମାର ଉଦୟସିଂହଙ୍କର ରହିଛି ୩ କୋଟି ୨୨ ଲକ୍ଷ ଟଙ୍କାର ଚାରି ମହଲା ଘର। ଘରର ଗେଟରେ ପ୍ରବେଶ କରିବା ମୁସ୍କିଲ । କାରଣ ସବୁ ଏଠି ଚାଲେ ସେନସରରେ । ରିମୋଟରେ ଗେଟ୍ ଖୋଲେ ଆଉ ବନ୍ଦ ହୁଏ । ବିଜୟ କୁମାର ଉଦୟସିଂଙ୍କ ଘର ଭିତର ଡିଜାଇନ୍ ଦେଖି ତାଜୁବ୍ ହୋଇଯାଇଥିଲା ଭିଜିଲାନ୍ସ । ଯୁଆଡେ ଦେଖିବ ସିଆଡେ ଲାଗିଛି ଇମ୍ପୋର୍ଟ ହୋଇଥିବା ଉପକରଣ । ଡ୍ରଇଂ ରୁମ୍ ଠାରୁ ବେଡ ରୁମ୍ ସବୁଠି ସେନ୍ସର ଲକିଂ । ତାରି ଭିତରେ ରହିଛି ଲକର । ଯେଉଁଥିରୁ ୪ ଲକ୍ଷ ୫୦ ହଜାର ଟଙ୍କା ଓ ବିପୁଳ ପରିମାଣର ସୁନା ଗହଣା ଜବତ ହୋଇଥିଲା ।
ଖାଲି ସେତିକି ନୁହେଁ ବାବୁଙ୍କ ଏହି ଆଲିଶାନ ବଙ୍ଗଳାରେ ୩୨ଟି ଫ୍ୟାନ ଓ ୧୨ଟି ଏସି ଲାଗିଥିଲା । ବାଥରୁମରେ ଜାପାନ ଟେକ୍ନୋଲୋଜିର ଟାଇଲ ଠାରୁ ଆରମ୍ଭ କରି ପ୍ୟାନ । ଏହି କୋଟିପତି ବାବୁଙ୍କ ଘରୁ ମିଳିଥିଲା ୨୦ରୁ ଅଧିକ ବ୍ୟାଙ୍କ୍ ଆକାଉଣ୍ଟ ଓ ଏଟିଏମ୍ କାର୍ଡ । ସେପଟେ ଘର ଭିତରେ ଏମିତି କିଛି ଇଲୋକ୍ଟ୍ରୋନିକ୍ସ ଲକର ରହିଛି, ଯାହାକୁ ଖୋଲିପାରିନାହିଁ ଭିଜିଲାନ୍ସ ।
ଏହା ସହ ପୁରୀ ବାଲୁଖଣ୍ଡ ମୌଜାରେ ରହିଛି ଫ୍ଲାଟ। ଭୁବନେଶ୍ୱରର ପ୍ରାଇମ ଲୋକେସନରେ ରହିଛି ଦୁଇଟି ପ୍ଲଟ। ଖୋର୍ଦ୍ଧାରେ ରହିଛି ଗୋଟିଏ ପ୍ଲଟ। ୫୫ ଲକ୍ଷ ୫୦ ହଜାର ଟଙ୍କାର ବ୍ୟାଙ୍କ ଜମା ରହିଛି। ଗୋଟିଏ ଫୋର୍ଡ ଇକୋ ସ୍ପୋର୍ଟସ କାର ସହିତ ତିନୋଟି ବାଇକ ମଧ୍ୟ ରେଡ୍ ବେଳେ ଜବତ ହୋଇଥିଲା। ବିଜୟ କୁମାର ଉଦୟସିଂହଙ୍କ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଘର ଓ କାର୍ଯ୍ୟାଳୟ ସମେତ ଏକକାଳୀନ ୬ଟି ସ୍ଥାନରେ ରେଡ କରିଥିଲା ଭିଜିଲାନ୍ସ ।
