ଭୁବନେଶ୍ବର: ଦୂରେଇ ଗଲେ ପ୍ରେମିକା ! ସହିପାରିଲେନି ବିଚ୍ଛେଦ ! ପ୍ରେମରେ ବିଫଳ ହେବା ପରେ ହାରିଲେ ଜୀବନ । ଦଶହରାରେ ଭୁବନେଶ୍ବରରେ ଯେତେବେଳେ ସବୁଠି ଥିଲା ସେଲିବ୍ରେସନର ମାହୋଲ, ସେତେବେଳେ ଜୀବନର ଶେଷ ନିଷ୍ପତ୍ତି ନେଇ ସାରିଥିଲେ ଇଂଜିନିୟର ରୋନିତ ଜେନା । କିଛି ଦିନ ଧରି ଦୁଶ୍ଚିନ୍ତାରେ ରହିବା ପରେ ଜୀବନରେ ପୂର୍ଣ୍ଣଚ୍ଛେଦ ଲଗାଇବାକୁ କରିଥିଲେ ଯୋଜନା । ମାଆଙ୍କୁ ସାଙ୍ଗରେ ଧରି ପୂଜା ମଣ୍ଡପ ବୁଲାଇଥିଲେ। ଘରେ ଆଇସକ୍ରିମ ବି ଖାଇଥିଲେ । ହେଲେ କିଏ ଜାଣିଥିଲା ଇଏ ଥିଲା ରୋନିତଙ୍କର ପରିବାର ସହ ଶେଷ ରାତି। କେହି କିଛି ଜାଣିବା ଆଗରୁ, ଆପାର୍ଟମେଣ୍ଟର ୮ମହଲା ଉପରୁ ଡେଇଁ ଜୀବନ ହାରିଥିଲେ ରୋନିତ ।
ଭୁବନେଶ୍ବର ଖାରବେଳ ନଗରର ଏକ ଆପାର୍ଟମେଣ୍ଟରେ ପରିବାର ସହ ରହୁଥିଲେ ୨୩ବର୍ଷୀୟ ରୋନିତ । ଶୁକ୍ରବାର ବ୍ରହ୍ମପୁରରୁ ଏକ ପରୀକ୍ଷା ଦେଇ ଫେରିଥିଲେ। ରାତିରେ ମାଆଙ୍କୁ ସାଙ୍ଗରେ ନେଇ ପୂଜା ମଣ୍ଡପ ବୁଲାଇଥିଲେ। ଶନିବାର ଆଉ କିଛି ମଣ୍ଡପ ବୁଲିବାକୁ ବି ଯୋଜନା ହୋଇଥିଲା। ଘରକୁ ଆସି ପରିବାର ସହ ମିଶି ଖାଇଥିଲେ । ସବୁକିଛି ଅନ୍ୟ ଦିନ ଭଳି ଥିଲା ବେଶ୍ ସାଧାରଣ । ତେବେ ବିଳମ୍ବିତ ରାତିରେ ରୋନିତ ମୋବାଇଲରେ ପ୍ରେମିକାଙ୍କ ସହ ଉଚ୍ଚସ୍ବରରେ କଥା ହୋଇଥିବା ଅଭିଯୋଗ ହୋଇଛି । ଏହାପରେ ଭୋର ୪ଟା ୨୨ରେ ସେ ଜୀବନ ହାରିଥିଲେ। ଆତ୍ମହତ୍ୟା ପୂର୍ବର ସିସିଟିଭି ଫୁଟେଜରେ ରୋନିତ ବିବ୍ରତ ହୋଇ ଏଣେ ତେଣେ ଚାଲୁଥିବା ଦେଖିବାକୁ ମିଳୁଛି । ପରେ ସେ ପଛପଟରୁ ଢଳି ପଡିଥିଲେ । ତଳେ ରୋନିତଙ୍କ ମୃତଦେହ ପଡିଥିବା ଦେଖି ପଡୋଶୀମାନେ ପରିବାର ଲୋକଙ୍କୁ ଜଣାଇଥିଲେ ।
