ଛାତ୍ରୀଙ୍କ ମୋବାଇଲ ଫୋନ ଛଡାଇନେବାରୁ ଯୁବକଙ୍କୁ ମାଡ, ଥାନା ରେ ଅଟକ
ହିଞ୍ଜିଳିକାଟୁ, ୯ା୮(): ଏକତରଫା ପ୍ରେମ କରିବା ସହ ଜୋର ଜବରଦସ୍ତି ଛାତ୍ରୀଙ୍କୁ ପ୍ରେମର ସ୍ୱୀକୃତି ଦେବାକୁ ବାଧ୍ୟ କରିବା ଏବଂ ଏଥିରେ ବିଫଳ ହେବାରୁ ଛାତ୍ରୀଙ୍କ ମୋବାଇଲ ଝାମ୍ପି ନେବା ଯୁବକଙ୍କୁ ମହଙ୍ଗା ପଡିଛି । ଘଟଣା ସ୍ଥଳରେ ଉପସ୍ଥିତ ଲୋକେ ଯୁବକଙ୍କୁ ଉତ୍ତମ ମଧ୍ୟମ ଦେବା ପରେ ସଂପୃକ୍ତ ଯୁବକଙ୍କୁ ଥାନାରେ ଜିମା ଦେଇଛନ୍ତି । ଏଭଳି ଏକ ଘଟଣା ଶୁକ୍ରବାର ହିଞ୍ଜିଳିକାଟୁ ବସ୍ ଟର୍ମିନାଲ ପରିସରରେ ଦେଖିବାକୁ ମିଳିଛି । ଗତ କିଛି ଦିନ ଧରି ହିଞ୍ଜିଳିକାଟୁ ବସ୍ ଟର୍ମିନାଲ ପରିସର ରୋଡ ରୋମିଓ ମାନଙ୍କ ପାଇଁ ଆଡ୍ଡାସ୍ଥଳି ପାଲଟିଥିବା ଦେଖିବାକୁ ମିଳିଛି । ନିକଟସ୍ଥ ଅଞ୍ଚଳରୁ ହିଞ୍ଜିଳିକାଟୁ ସହରକୁ ଶିକ୍ଷା ଅଧ୍ୟୟନ ସକାଶେ ଆସୁଥିବା କିଛି ଛାତ୍ରୀଙ୍କୁ ରୋଡ ରୋମିଓ ମାନେ ଅଶ୍ଳୀଳ ଇଙ୍ଗିତ କରିବା ସହ କମେଣ୍ଟ ମରାକୁ କେନ୍ଦ୍ର କରି ପ୍ରତ୍ୟହ ଛୋଟବଡ ଗଣ୍ଡଗୋଳ ଘଟୁଥିବା ନିତିଦିନିଆ ଘଟଣା ପାଲଟିଛି । ପ୍ରତିଦିନ ପରି ଶୁକ୍ରବାର ସକାଳେ ଶେରଗଡ ଥାନା ଅଞ୍ଚଳର ଜୈନିକା ଛାତ୍ରୀ ଏକ ଘରୋଇ ଯାତ୍ରୀବାହୀ ବସ୍ ଯୋଗେ ହିଞ୍ଜିଳିକାଟୁ କଲେଜକୁ ପାଠ ପଢିବାକୁ ଆସିଥିଲେ । ଶେରଗଡ ଥାନା କୁମାରପାଣି ଗ୍ରାମର ଜୈନିକ ଛାତ୍ର ଗତ କିଛି ଦିନ ଧରି ସଂପୃକ୍ତା ଛାତ୍ରୀଙ୍କୁ ଏକତରଫା ପ୍ରେମ କରିବା ସହ ବସ ଭିତରେ ଅଶ୍ଳୀଳ ଇଙ୍ଗିତ କରି ଆସୁଥିଲେ । ଶୁକ୍ରବାର ଛାତ୍ରୀ ଜଣଙ୍କ ହିଞ୍ଜିଳିକାଟୁ ବସ୍ ଟର୍ମିନାଲ ପରିସରରେ ଓହ୍ଲାଇବା ପରେ ଛାତ୍ର ଜଣଙ୍କ ଛାତ୍ରୀଙ୍କ ନିକଟକୁ ଯାଇ ତାଙ୍କୁ ପ୍ରେମ କରିବା ପାଇଁ ବାଧ୍ୟ କରିଥିଲେ । ଛାତ୍ରୀ ଜଣଙ୍କ ଏଥିରେ ରାଜି ନହେବାରୁ ଛାତ୍ର ଜଣଙ୍କ ଜୋର ଜବରଦସ୍ତ ଛାତ୍ରୀଙ୍କ ମୋବାଇଲ ଝାମ୍ପି ନେଇ ଯାଇଥିଲେ । ସଂପୃକ୍ତ ଛାତ୍ର ଜଣଙ୍କ ଛାତ୍ରୀଙ୍କୁ ପ୍ରେମ କରିବା ପାଇଁ ବାଧ୍ୟ କରିଥିଲେ, ନଚେତ୍ ମୋବାଇଲ ଦେବିନାହିଁ ବୋଲି ରୋକ୍ଠୋକ୍ ଜଣାଇଥିଲେ । ଛାତ୍ରୀ ଜଣଙ୍କ ପାଟି କରିବାରୁ ଉପସ୍ଥିତ ଲୋକେ ସଂପୃକ୍ତ ଛାତ୍ରଙ୍କୁ କାବୁ କରିବା ସହ ଉତ୍ତମ ମଧ୍ୟମ ଦେବା ପରେ ହିଞ୍ଜିଳି ପୁଲିସକୁ ଡାକି ଯୁବକଙ୍କୁ ଜିମା ଦେଇଥିଲେ । ଛାତ୍ରୀଙ୍କ ପରିବାର ସଦସ୍ୟଙ୍କୁ ଡାକି ଝିଅକୁ ଜିମା ଦିଆଯାଇଥିବା ବେଳେ ଏକତରଫା ପ୍ରେମ କରୁଥିବା ଯୁବକଙ୍କୁ ଥାନାରେ ପୁଲିସ ଅଟକ ରଖି ପଚରା ଉଚୁରା କରୁଥିବା ଜଣାପଡିଛି । ପ୍ରକାଶ ଥାଉକି, ମଙ୍ଗଳବାର ୨ଟି ବାଇକ୍ ଯୋଗେ ୬ ଜଣ ଯୁବକ ହିଞ୍ଜିଳିକାଟୁ ବସ୍ ଟର୍ମିନାଲ ପରିସରରେ ପହଞ୍ଚି କିଛି ଛାତ୍ରୀଙ୍କୁ କମେଣ୍ଟ ମାରୁଥିବା ବେଳେ ଉପସ୍ଥିତ ଲୋକେ ଜଣଙ୍କୁ କାବୁ କରି ମାଡ ମାରିବା ସହ ଥାନାରେ ଜିମା ଦେଇଥିଲେ । ଦୀର୍ଘ ଦିନ ଧରି ହିଞ୍ଜିଳିକାଟୁ ବସ୍ ଟର୍ମିନାଲ ପରିସରରେ ରୋଡ ରୋମିଓଙ୍କ ପାର୍ଦୁଭାବ ବୃଦ୍ଧି ପାଉଥିବା ବେଳେ ପୁଲିସ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନଥିବା ଦେଖିବାକୁ ମିଳିଛି । ବସ୍ ଟର୍ମିନାଲ ପରିସରରେ ଆବଶ୍ୟକ ପୁଲିସ କର୍ମଚାରୀ ନିୟୋଜିତ କରିବା ସହ ସିସିଟିଭି ସଂଯୋଗ କରିବାକୁ ସ୍ଥାନୀୟ ଅଞ୍ଚଳର ବୁଦ୍ଧିଜୀବି ମହଲରେ ଦାବି ହୋଇଛି । ପ୍ରକାଶ ଥାଉକି, ହିଞ୍ଜିଳିକାଟୁ ବସ୍ ଟର୍ମିନାଲ ପରିସର ଗତ କିଛି ମାସ ଧରି ଦିନରେ ରୋଡ ରୋମିଓଙ୍କ ଓ ରାତ୍ର ସମୟରେ ମଦ୍ୟପ ଓ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳି ପାଲଟିଥିବା ଦେଖିବାକୁ ମିଳିଛି ।
