ଭୁବନେଶ୍ୱର ମହାନଗର ନିଗମ ପକ୍ଷରୁ ଏହି ସମସ୍ୟାର ସମାଧାନ ପାଇଁ ବାରମ୍ବାର ଦାବି କରାଯାଇଥିଲେ ମଧ୍ୟ କୌଣସି ଠୋସ୍ ପଦକ୍ଷେପ ନିଆଯାଇନାହିଁ। ଡମ୍ପିଂଆର୍ଡରୁ ବାହାରୁଥିବା ଦୁର୍ଗନ୍ଧରେ ମଞ୍ଚେଶ୍ୱର, ଭିଏସ୍ଏସ୍ ନଗର, ସହିଦ ନଗର, ଆଚାର୍ୟ୍ୟ ବିହାର, ଡମଣା, ଚନ୍ଦ୍ରଶେଖରପୁର, ରଙ୍ଗମାଠିଆ ଆଦି ଅଞ୍ଚଳରେ ବାୟୁମଣ୍ଡଳ ଭରି ଯାଇଥାଏ। ଏହି ସବୁ ଅଞ୍ଚଳରେ ବୁଲୁଥିବା ଅଳିଆ ଟ୍ରକ ଗୁଡିକ ଲୋକଙ୍କ ସମସ୍ୟାକୁ ଆହୁରି ବଢାଇଦେଇଛି। ଡମ୍ପିଂଆର୍ଡ ସ୍ଥାନାନ୍ତର ପାଇଁ ବିଏମସି ଦେଇଥିବା ପ୍ରତିଶ୍ରୁତି ପୂରଣ ହୋଇନଥିବାରୁ ସ୍ଥାନୀୟ ଲୋକଙ୍କୁ ଅନେକ ହଇରାଣ ହେବାକୁ ପଡୁଛି।
ସ୍ଥାନୀୟ ଅଞ୍ଚଳର ଜଣେ ବ୍ୟକ୍ତି ଅଭିଯୋଗ କରିଛନ୍ତି ଯେ, ବିଏମସି ପକ୍ଷରୁ ସେମାନଙ୍କୁ ଠକି ଦିଆଯାଉଛି। ପ୍ରତିବାଦ ପରେ ବିଏମସି କର୍ତ୍ତୃପକ୍ଷ ତିନି ମାସ ମଧ୍ୟରେ ଡମ୍ପିଂଆର୍ଡ ସ୍ଥାନାନ୍ତର କରିବେ ବୋଲି ପ୍ରତିଶ୍ରୁତି ଦେଇଥିଲେ। ପରେ ସେମାନେ ଆଉ 6 ମାସ ସମୟ ମାଗିବା ସହ ଏବେ ଆଉ ଦେଢ଼ ବର୍ଷ ଅପେକ୍ଷା କରିବାକୁ କହୁଛନ୍ତି।
ଦୁର୍ଗନ୍ଧମୟ ପବନରେ ସହରବାସୀଙ୍କୁ ନିଶ୍ୱାସ ପ୍ରଶ୍ୱାସ ନେବାକୁ ପଡୁଛି, ଯାହା ଫଳରେ ସେମାନଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି। ଭୂତଳ ଜଳ ଧିରେ ଧିରେ ଦୂଷିତ ହେବାରେ ଲାଗିଛି ବୋଲି ଅଭିଯୋଗ ରହିଛି।
