ବ୍ରିଟେନ ଗୃହମନ୍ତ୍ରୀ ସୁଏଲା ବ୍ରେଭରମ୍ୟାନ୍ଙ୍କ ନୂଆ ନିୟମ ଲକ୍ଷ ଲକ୍ଷ ଭାରତୀୟ ଛାତ୍ରଛାତ୍ରୀଙ୍କୁ କରିବ ପ୍ରଭାବିତ
ଲଣ୍ଡନ: ବ୍ରିଟେନରେ ପାଠ ପଢୁଥିବା ଭାରତୀୟ ଛାତ୍ରଛାତ୍ରୀମାନଙ୍କ ପାଇଁ ଏକ ଖରାପ ଖବର। ନିଜ ପରିବାରକୁ ଆଉ ବ୍ରିଟେନକୁ ନେଇ ପାରିବେ ନାହିଁ ଛାତ୍ରଛାତ୍ରୀ। ଏନେଇ ବ୍ରିଟିଶ ସରକାର ଏକ ନୂଆ କଟକଣା ଘୋଷଣା କରିଛନ୍ତି। ସରକାର ସମସ୍ତ ବିଦେଶୀ ଛାତ୍ରଛାତ୍ରୀଙ୍କ ଉପରେ ଏଇ ଇମିଗ୍ରେସନ କଟକଣା ଘୋଷଣା କରିଛନ୍ତି। ଏହି କଟକଣା ହଜାର ହଜାର ଭାରତୀୟ ଛାତ୍ରଛାତ୍ରୀଙ୍କୁ ପ୍ରଭାବିତ କରିପାରେ। ସେମାନଙ୍କ ପରିବାର ସଦସ୍ୟଙ୍କ ଭିସା ପ୍ରଭାବିତ ହୋଇପାରେ। ବ୍ରିଟେନ ଗୃହମନ୍ତ୍ରୀ ସୁଏଲା ବ୍ରେଭରମ୍ୟାନ୍ ହାଉସ ଅଫ୍ କମନ୍ସକୁ ଏକ ଲିଖିତ ବିବୃତିରେ କହିଛନ୍ତି ଯେ ବର୍ତ୍ତମାନ ଗବେଷଣା ଓ ସ୍ନାତକୋତ୍ତର ପଢୁଥିବା ଅନ୍ତର୍ଜାତୀୟ ଛାତ୍ରଛାତ୍ରୀମାନଙ୍କର ଶିଶୁ ଓ ବୃଦ୍ଧ ପିତାମାତାଙ୍କୁ ଆଣିବାକୁ ଅନୁମତି ଅଛି। ସେପଟେ ଡିସେମ୍ବର ୨୦୨୨ରେ ଶେଷ ବର୍ଷରେ ପଢୁଥିବା ଛାତ୍ରଛାତ୍ରୀଙ୍କ ପରିବାରଙ୍କୁ ପ୍ରାୟ ୧,୩୬,୦୦୦ ଭିସା ଦିଆଯିବା ପରେ ନୂଆ ବ୍ୟବସ୍ଥା ଜରୁରୀ ଥିଲା ବୋଲି ଭାରତୀୟ ବଂଶୋଦ୍ଭବ ଗୃହମନ୍ତ୍ରୀ ସୁଏଲା କହିଛନ୍ତି।
ସେ ଆହୁରି କହିଛନ୍ତି ଯେ ୨୦୧୯ ତୁଳନାରେ ୨୦୨୨ରେ ସେମାନଙ୍କ ସଂଖ୍ୟା ୧୬,୦୦୦ରୁ ଆଠ ଗୁଣ ଅଧିକ। ଏକ୍ଷେତ୍ରରେ ସାମିଲ ଥିବା ‘ଅସାଧୁ’ ଶିକ୍ଷା ଏଜେଣ୍ଟମାନଙ୍କ ଉପରେ ଉଚିତ୍ ପଦକ୍ଷେପ ନେବାକୁ ମନ୍ତ୍ରୀ ଦାବି କରିଛନ୍ତି ଏବଂ କହିଛନ୍ତି ଯେ ଶିକ୍ଷା ବଦଳରେ ଇମିଗ୍ରେସନ ବିକ୍ରୟ କରିବା ଭଳି ଅନ୍ୟାୟ ଉପାୟ ବନ୍ଦ କରାଯାଇପାରିବ। ଶିକ୍ଷା କ୍ଷେତ୍ର ତଥା ପ୍ରମୁଖ ହିତାଧିକାରୀଙ୍କ ସହ ପରାମର୍ଶ ପରେ ଏହି ନୂତନ ପ୍ରତିବନ୍ଧକ ‘ଶୀଘ୍ର’ କାର୍ଯ୍ୟକାରୀ ହେବ ବୋଲି ଆଶା କରାଯାଉଛି।
ବ୍ରିଟେନର ଗୃହମନ୍ତ୍ରୀ ସୁଏଲା ଭାରତୀୟ ବଂଶୋଦ୍ଭବ ଏବଂ ତାଙ୍କ ନିଷ୍ପତ୍ତି ଭାରତୀୟ ଛାତ୍ରମାନଙ୍କ ଉପରେ ସବୁଠାରୁ ଅଧିକ ପ୍ରଭାବ ପକାଇବ। ବ୍ରିଟେନର ଉଚ୍ଚଶିକ୍ଷା ପ୍ରତିଷ୍ଠାନଗୁଡିକର ଏକ ରିପୋର୍ଟ ଅନୁଯାୟୀ, ବିଦେଶୀ ଛାତ୍ରମାନେ ବ୍ରିଟେନର ଅର୍ଥନୀତିରେ ସୁବିଧା ନେବା ଅପେକ୍ଷା ୧୦ ଗୁଣ ଅଧିକ ଯୋଗଦାନ କରନ୍ତି ଏବଂ ସେମାନଙ୍କ ମଧ୍ୟରେ ଭାରତୀୟ ଛାତ୍ରଛାତ୍ରୀ ବହୁ ସଂଖ୍ୟାରେ ଅଛନ୍ତି।
ବ୍ରିଟେନରୁ ଷ୍ଟଡିଭିସା ପାଇବାରେ ଚୀନ୍କୁ ପଛରେ ପକାଇଛି ଭାରତ। ତେବେ ୨୦୨୦-୨୧ ପାଇଁ ସରକାରୀ ତଥ୍ୟ ଅନୁଯାୟୀ ଏହି ଭିସା ପାଇଥିବା ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟା ହେଉଛି ୮୭,୦୪୫ । ଚୀନ୍ ଛାତ୍ରଛାତ୍ରୀଙ୍କ ସଂଖ୍ୟା ୯୯,୯୬୫ ଠାରୁ କମ୍ ଏବଂ ନାଇଜେରିଆ ଛାତ୍ରଛାତ୍ରୀଙ୍କ ସଂଖ୍ୟା ୩୨,୯୪୫ ଠାରୁ କମ୍ ଥିଲା। ଗଣମାଧ୍ୟମର ରିପୋର୍ଟ ଅନୁଯାୟୀ, ବ୍ରିଟେନରେ ଅଧିକାଂଶ ନାଇଜେରିଆ ଏବଂ ଭାରତରୁ ଛାତ୍ରଛାତ୍ରୀ ଆସିଛନ୍ତି। ୨୦୨୨ ମସିହାରେ ୧୩୫,୭୮୮ ଛାତ୍ରଛାତ୍ରୀଙ୍କୁ ଭିସା ପ୍ରଦାନ କରାଯାଇଛି, ଯାହା ୨୦୧୯ ଠାରୁ ୧୬,୦୪୭ ଅଧିକ । ଛାତ୍ରଛାତ୍ରୀମାନଙ୍କ ସହିତ ଆସୁଥିବା ପରିବାର ଲୋକଙ୍କ ସଂଖ୍ୟା ଅନୁଯାୟୀ, ନାଇଜେରିଆ ଛାତ୍ରମାନେ ପ୍ରଥମ ଏବଂ ଭାରତୀୟମାନେ ଦ୍ୱିତୀୟ ସ୍ଥାନରେ ଅଛନ୍ତି।
