ନୂଆଦିଲ୍ଲୀ : ଇସ୍ଲାମିକ ଷ୍ଟେଟ୍ ଖୁରାସାନ ଉପରେ ବଡ଼ ଆକ୍ସନ ନେଇଛି ଆଫଗାନିସ୍ତାନର ତାଲିବାନ ସରକାର। ISKPର ମିନିଷ୍ଟର ଅଫ୍ ୱାର ତଥା ମିଲିଟାରୀ ଚିଫ୍ କାରୀ ଫତେହକୁ ହତ୍ୟା କରିଛି ତାଲିବାନ୍। କାରୀ ଫତେହକୁ ୟୁଏନ୍ଏସ୍ସି ମନିଟରିଂ ଟିମ୍ ମେ’ ୨୦୨୨ରେ ISKPର ମିଲିଟାରୀ ଚିଫ କରିଥିଲା।
ତାଲିବାନ ସରକାରଙ୍କ ମୁଖପାତ୍ର ଜବିହୁଲ୍ଲାହ ମୁଜାହିଦଙ୍କ କହିବା ମୁତାବକ, ସୋମବାର କାବୁଲରେ ହୋଇଥିବା ଅପରେସନ୍ରେ କାରୀ ଫତେହକୁୁ ହତ୍ୟା କରାଯାଇଛି। ତା’ ସହ ଖୁରାସାନର ଆଉ କିଛି କର୍ମୀଙ୍କୁ ମଧ୍ୟ ହତ୍ୟା କରାଯାଇଥିବା ତାଲିବାନ୍ ପକ୍ଷରୁ ସ୍ପଷ୍ଟ କରାଯାଇଛି।
ଆଇଏସ୍କେପି ହେଉଛି ଇସଲାମିକ୍ ଷ୍ଟେଟର ଆଫଗାନିସ୍ତାନ ସହଯୋଗୀ ତଥା ତାଲିବାନର ଏକ ପ୍ରମୁଖ ବିରୋଧୀ। କାବୁଲରେ କାରୀ ଫତେହ ହେଉଛି ଆଇଏସ୍କେପିର ଜଣେ ମୁଖ୍ୟ ରଣନୀତିଜ୍ଞ। ସେ ରୁଷ୍, ଚୀନ, ପାକିସ୍ତାନ ବିରୋଧରେ ହୋଇଥିବା ଅନେକ ଆକ୍ରମଣର ଯୋଜନା କରିଥିଲା।
ତାଲିବାନ ସରକାରର ଏହି ଆକ୍ସନ ଏଭଳି ଏକ ସମୟରେ ହୋଇଛି, ଯେତେବେଳେ ନିକଟରେ ଜାତିସଂଘର ଏକ ରିପୋର୍ଟରେ କୁହାଯାଇଥିଲା ଯେ ଇସଲାମିକ୍ ଷ୍ଟେଟ୍ ଇନ୍ ଇରାକ୍ ଆଣ୍ଡ ଖୁରାସାନ ଆଫଗାନିସ୍ତାନରେ ଭାରତ, ଚୀନ୍ ଏବଂ ଇରାନର ଦୂତାବାସ ଉପରେ ଆତଙ୍କବାଦୀ ଆକ୍ରମଣର ଧମକ ଦେଇଛି। ଜାତିସଂଘ ଦାବି କରିଛି ଯେ ISIL-K ପାଖରେ ୧୦୦୦ରୁ ୩୦୦୦ ଯୁଦ୍ଧବିମାନ ଅଛି।
