ଭୁବନେଶ୍ୱର: କଳିଙ୍ଗ ଷ୍ଟାଡିୟମରେ ଚାଲିଥିବା ହକି ବିଶ୍ୱକପ୍ ଦେଖିବାକୁ ସମସ୍ତଙ୍କ ମନରେ ଉତ୍କଣ୍ଠା ରହିଛି। ହେଲେ ଟିକେଟ ମିଳୁ ନ ଥିବାରୁ ଅନେକ ନିରାଶ ହୋଇଛନ୍ତି। ଏପରି ସ୍ଥିତିରେ ଦଲାଲଙ୍କ ହାତରେ ପୁଳାପୁଳା ଟିକେଟ ଦେଖିବାକୁ ମିଳୁଛି। ସେମାନେ ଟିକେଟ ବ୍ଲାକ୍ରେ ବିକି ମାଲାମାଲ୍ ହେଉଛନ୍ତି। ହକି ଟିକେଟ କଳାବଜାର କରୁଥିବା ଏକ ର଼୍ୟାକେଟକୁ ବୁଧବାର ଶହୀଦନଗର ଥାନା ପୋଲିସ ଧରିବା ସହ ୫ଜଣଙ୍କୁ ଗିରଫ କରିଥିଲା। ଗୁରୁବାର ନୟାପଲ୍ଲୀ ଥାନା ପୋଲିସ ଆଉ ଏକ ଗ୍ୟାଙ୍ଗକୁ ଧରିବା ସହ ସମ୍ପୃକ୍ତ ୪ଜଣ ଦଲାଲଙ୍କୁ ଗିରଫ କରିଛି।
ସେମାନେ ହେଲେ କେନ୍ଦୁଝର ଜିଲା ନାରଣପୁର ଗ୍ରାମର ଦୀପକ କୁମାର ବେହେରା, କଟକ ଜିଲା ସାଲେପୁର ଥାନା ଅଞ୍ଚଳର ସୟଦ ଅମିରୁଲ୍ କାଲାମ ଓ ସୟଦ ଏହେତଶାମ ଉଦ୍ଦିନ ଏବଂ ଅନ୍ୟ ଜଣେ ହେଉଛନ୍ତି ପଶ୍ଚିମବଙ୍ଗର ମହଶେନ ଲାସ୍କର। ସେମାନଙ୍କଠାରୁ ୮ ହକି ଟିକେଟ, ୪ ମୋବାଇଲ ଫୋନ୍ ଓ ନଗଦ ୫ ହଜାର ଟଙ୍କା ଜବତ କରାଯାଇଛି। ଏମାନେ ୨୦୦ ଟଙ୍କାର ଟିକେଟକୁ ୧୨୦୦ ଟଙ୍କାରେ ବ୍ଲାକ୍ କରୁଥିଲେ। ଗୁରୁବାର କଳିଙ୍ଗ ଷ୍ଟାଡିୟମରେ ମ୍ୟାଚ୍ ଖେଳାଯାଇଥିଲା। ହେଲେ ମ୍ୟାଚ ପୂର୍ବରୁ ଅଭିଯୁକ୍ତମାନେ କୌଣସିମତେ ଟିକେଟ ହାତେଇ ଏହାକୁ ପ୍ରକୃତ ମୂଲ୍ୟଠାରୁ ଅଧିକ ଦରରେ ବିକ୍ରି କରୁଥିଲେ। ନୟାପଲ୍ଲୀ ଥାନା ପୋଲିସ ବିଶେଷ ସୂତ୍ରରୁ ଖବର ପାଇ ଷ୍ଟାଡିୟମର ୨ ନମ୍ବର ଗେଟ ନିକଟରେ ଚଢାଉ କରି ୪ଜଣଙ୍କୁ କାବୁ କରି ଥାନାକୁ ଆଣିଥିଲା। ପଚରାଉଚରା ପରେ ସେମାନେ ଲାଭ ଆଶାରେ ଟିକେଟକୁ ଅଧିକ ଦରରେ ବିକ୍ରି କରୁଥିବା ସ୍ବୀକାର କରିଥିଲେ।
