ହାଇଦ୍ରାବାଦ: ତେଲେଙ୍ଗାନାର ମୁଖ୍ୟ ଶାସନ ସଚିବ ସୋମେଶ କୁମାରଙ୍କୁ ଏକ ବଡ଼ ଝଟକା ଲାଗିଛି | ଆଜି ତେଲେଙ୍ଗାନା ହାଇକୋର୍ଟ ତାଙ୍କ ତେଲେଙ୍ଗାନା କ୍ୟାଡରକୁ ବାତିଲ କରି ଆନ୍ଧ୍ରପ୍ରଦେଶକୁ ପଠାଇବାକୁ ନିର୍ଦ୍ଦେଶ ଦେଇଛନ୍ତି। କ୍ୟାଡର ପ୍ରସଙ୍ଗରେ ୨୦୧୭ ସେଣ୍ଟ୍ରାଲ୍ ଆଡମିନିଷ୍ଟ୍ରେଟିଭ୍ ଟ୍ରିବ୍ୟୁନାଲ୍ (କ୍ୟାଟ୍) ନିର୍ଦ୍ଦେଶକୁ ଚ୍ୟାଲେଞ୍ଜ କରି କେନ୍ଦ୍ରର ଆବେଦନକୁ ହାଇକୋର୍ଟ ଅନୁମତି ଦେଇଛନ୍ତି। ପିଏମଓ ଅଧୀନରେ ଥିବା ପର୍ସନାଲ ଆଣ୍ଡ ଟ୍ରେନିଂ ବିଭାଗ ହାଇକୋର୍ଟରେ ଆବେଦନ କରି କହିଥିଲା ଯେ କ୍ୟାଡର ପରିବର୍ତ୍ତନ ନିଷ୍ପତ୍ତି କ୍ୟାଟ ନେଇପାରିବ ନାହିଁ | ଏହାର ନିଷ୍ପତ୍ତି କେବଳ ପର୍ସନାଲ ଆଣ୍ଡ ଟ୍ରେନିଂ ବିଭାଗ ନେଇପାରିବ । ଏହି ପ୍ରସଙ୍ଗରେ ହସ୍ତକ୍ଷେପ କରିବାର ଅଧିକାର କ୍ୟାଟର ନାହିଁ |
ଆଉ ଏହାକୁ ନେଇ ପ୍ରଧାନ ବିଚାରପତି ଉଜଲ ଭୁୟାନ ଏବଂ ଜଷ୍ଟିସ ନନ୍ଦାଙ୍କ ଖଣ୍ଡପୀଠ କ୍ୟାଟର ଆଦେଶକୁ ଖାରଜ କରିଛନ୍ତି | ଏହି ଆଦେଶରେ କୁହାଯାଇଥିଲା ଯେ ଆନ୍ଧ୍ରପ୍ରଦେଶ କ୍ୟାଡରର ଅଧିକାରୀ ସୋମେଶ କୁମାର ତେଲେଙ୍ଗାନାର ମୁଖ୍ୟ ଶାସନ ସଚିବ ଭାବରେ କାର୍ଯ୍ୟଭାର ସମ୍ଭାଳିପାରିବେ | ବାସ୍ତବରେ ଆନ୍ଧ୍ରପ୍ରଦେଶ ବିଭାଜନ ସମୟରେ ସୋମେଶ କୁମାରଙ୍କୁ ଆନ୍ଧ୍ରପ୍ରଦେଶ କ୍ୟାଡର ଦିଆଯାଇଥିଲା | କିନ୍ତୁ ସେ କ୍ୟାଟରେ ଏକ ପିଟିସନ ଦାଖଲ କରିଥିଲେ, ଯାହା ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ଜାରି କରିଥିଲା ଏବଂ ତାଙ୍କୁ ତେଲେଙ୍ଗାନାରେ ରହିବାକୁ ଅନୁମତି ଦେଇଥିଲା। କ୍ୟାଟ ନିର୍ଦ୍ଦେଶକୁ ରଦ୍ଦ କରିବାକୁ କେନ୍ଦ୍ର ହାଇକୋର୍ଟଙ୍କ ନିକଟକୁ ଯାଇଥିଲା। ଆଉ ହାଇକୋର୍ଟ ଏହି ମାମଲାର ଶୁଣାଣି କରି କ୍ୟାଟ ନିର୍ଦ୍ଦେଶକୁ ରଦ୍ଦ କରିଛନ୍ତି | ତେବେ ହାଇକୋର୍ଟ ସୋମେଶ କୁମାରଙ୍କ ଓକିଲଙ୍କ ଅନୁରୋଧକୁ ସ୍ୱୀକାର କରି ମାମଲାକୁ ୩ ସପ୍ତାହ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି |
