ଭୁବନେଶ୍ବର: ତୃପ୍ତି-ବାବୁସାନଙ୍କ ପାରିବାରିକ ବିବାଦ ପ୍ରକୃତିଙ୍କୁ ମହଙ୍ଗା ପଡ଼ିବାରେ ଲାଗିଛି । ବାବୁସାନଙ୍କ ସହ ପ୍ରକୃତିଙ୍କ ସମ୍ପର୍କକୁ ନେଇ ପତ୍ନୀ ତୃପ୍ତି ଆଣିଥିବା ଅଭିଯୋଗ ତାଙ୍କ କ୍ୟାରିୟର ଉପରେ ପ୍ରଭାବ ପକାଇବାରେ ଲାଗିଛି । ଜୁଏଲରୀ ବ୍ରାଣ୍ଡ ତନିଷ୍କ ନିଜ ବିଜ୍ଞାପନରୁ ପ୍ରକୃତିଙ୍କୁ ହଟାଇ ଦେଇଛି ।
ସୂଚନାଯୋଗ୍ୟ, ଗତ ୨୩ ତାରିଖରେ ରାଜଧାନୀରେ ଦେଖିବାକୁ ମିଳିଥିଲା ହାଇ ଡ୍ରାମା । ପ୍ରକୃତି ଓ ବାବୁସାନ ଏକ କାରରେ ଥିବା ବେଳେ ସେଠାରେ ପହଞ୍ଚି ଥିଲା ବାବୁସାନଙ୍କ ପତ୍ନୀ ତୃପ୍ତି ଶତପଥି । ଉଭୟଙ୍କୁ ଗାଡ଼ି ଭିତରେ ଦେଖି ତୃପ୍ତିଙ୍କ ରାଗ ପଞ୍ଚମ ହୋଇ ଯାଇଥିଲା । ବିଚ୍ ରାସ୍ତାରେ ତୃପ୍ତି ଉଭୟ ବାବୁସାନ ଓ ପ୍ରକୃତିଙ୍କୁ ଟଣାଓଟରା କରିଥିଲେ । ଏହି ସମୟରେ ପ୍ରକୃତି କାରରୁ ବାହାରି ରାସ୍ତାରେ ଦୌଡ଼ିବାକୁ ଲାଗିଥିଲେ ଓ ଜୀବନ ବଞ୍ଚାଇବାକୁ ଉପସ୍ଥିତ ଲୋକଙ୍କୁ ନେହୁରା ହୋଇଥିଲେ । ହେଲେ ତୃପ୍ତି ତାଙ୍କ ପିଛା ଛାଡି ନଥିଲେ । ପ୍ରକୃତିଙ୍କୁ ଗୋଡାଇ ଗୋଡାଇ ଧକ୍କା ପରେ ଧକ୍କା ମାରିବା ସହ ଚୁଟି ଟାଣିଥିଲେ ଓ ଏ ମୋ ଘର ଭାଙ୍ଗି ଦେଲା ବୋଲି ଚିତ୍କାର କରି କହିଥିଲେ । ଏହାପରେ ପ୍ରକୃତି ଓ ବାବୁସାନ ଚେନ୍ନାଇ ଚାଲି ଯାଇଥିଲେ ।
ଷ୍ଟାର ପରିବାରର ଏହି ରୋଡ଼ ଶୋ’ ଭାଇରାଲ ହେବା ପରେ ପ୍ରକୃତିଙ୍କ ପରିବାର ପକ୍ଷରୁ ତୃପ୍ତି ଓ ତାଙ୍କ ବାପାଙ୍କ ବିରୋଧରେ ଥାନାରେ ଅଭିଯୋଗ କରାଯାଇଥିଲା । ପରେ ବାବୁସାନଙ୍କ ମାଆ ତଥା ଓଲିଉଡର ଏଭରଗ୍ରୀନ ଅଭିନେତ୍ରୀ ଅପରାଜିତା ମହାନ୍ତି ତୃପ୍ତିଙ୍କୁ ଧରି ଥାନାରେ ପହଞ୍ଚି ଥିଲେ ଓ ତୃପ୍ତି ପତି ବାବୁସାନ ଏବଂ ପ୍ରକୃତିଙ୍କ ବିରୋଧରେ ଥାନାରେ ଏତଲା ଦେଇଥିଲେ ।
