ଲଦାଖ : ବୈଜ୍ଞାନିକମାନଙ୍କ ଗବେଷଣା କ୍ଷେତ୍ରରେ ଅଧିକ ଶକ୍ତି ଯୋଗାଇବା ଲାଗି ଲଦାଖରେ ଏସିଆର ସବୁଠୁ ବଡ଼ ଦୂରବୀକ୍ଷଣ ଯନ୍ତ୍ରର ଉଦ୍ଘାଟନ କରାଯାଇଛି। ଏହାର ନାମ ହେଉଛି ଏମଏସିଇ ବା ମେଜର ଆଟମୋସ୍ଫେରିକ ଚେରେନକୋଭ ଏକ୍ସପେରିମେଣ୍ଟ। ପରମାଣୁ ଶକ୍ତି ବିଭାଗ (ଡିଏଇ) ସଚିବ ଅଜିତ କୁମାର ମହାନ୍ତି ଲଦାଖର ହାନଲିଠାରେ ବୁଧବାର ଏହାକୁ ଉଦଘାଟନ କରିଛନ୍ତି। ମୁମ୍ବାଇସ୍ଥିତ ଭାବା ପରମାଣୁ ଗବେଷଣା କେନ୍ଦ୍ର(ବିଏଆରସି) ଇଲେକ୍ଟ୍ରୋନିକ୍ସ କର୍ପୋରେସନ ଅଫ ଇଣ୍ଡିଆ ଲିମିଟେଡ(ଇସିଆଇଏଲ) ଏବଂ ଅନ୍ୟ ଭାରତୀୟ ଉଦ୍ୟୋଗୀଙ୍କ ସହାୟତାରେ ସମ୍ପୂର୍ଣ୍ଣ ସ୍ଵଦେଶୀ ଜ୍ଞାନକୌଶଳରେ ନିର୍ମାଣ କରିଛି।
ଉଦଘାଟନ ପରଠାରୁ ଏହି ଦୂରବୀକ୍ଷଣ ଯନ୍ତ୍ରକୁ ନେଇ ଚର୍ଚ୍ଚା ଆରମ୍ଭ ହୋଇଛି। ୪୩୦୦ ମିଟର ଉଚ୍ଚତାରେ ଅବସ୍ଥାପିତ ଏହି ଯନ୍ତ୍ର ବୈଜ୍ଞାନିକମାନଙ୍କୁ ଗବେଷଣା କ୍ଷେତ୍ରରେ ବେଶ୍ ସହାୟତା ଯୋଗାଇବ। ଡିଏଇ ସଚିବ ଅଜିତ କହିଛନ୍ତି, ଏହି ଦୂରବୀକ୍ଷଣ ଯନ୍ତ୍ର ଭାରତ ପାଇଁ ବଡ଼ ଉପଲବ୍ଧି। ବ୍ରହ୍ମାଣ୍ଡର ବିଭିନ୍ନ ରଶ୍ମୀ ବିଶେଷକରି ଗାମା ରଶ୍ମୀ ସମ୍ପର୍କରେ ଗବେଷଣା ଦିଗରେ ଏହା ବିଶ୍ଵସ୍ତରରେ ଭାରତକୁ ଆଗରେ ରଖିବ।
