ମାଲକାନଗିରି : ସୀମାନ୍ତ ଛତିଶଗଡର କୋଣ୍ଡାଗାଓଁ ଜିଲ୍ଲାର ଧନୋରା ଥାନା ଅଞ୍ଚଳରେ ବିବାହ ଉତ୍ସବରୁ ଫେରୁଥିବା ଜଣେ ଯୁବକଙ୍କୁ ମାଓବାଦୀମାନେ ଗୁଳି କରି ହତ୍ୟା କରିଥିବା ଜଣାପଡିଛି l ଘଟଣା ପରେ ଉକ୍ତ ଅଞ୍ଚଳରେ ଉତ୍ତେଜନା ଦେଖାଦେଇଥିଲା l ମିଳିଥିବା ସୂଚନା ଅନୁଯାଇ ତିମଡି ସ୍କୁଲପାରା ବାସିନ୍ଦା ଦୀନେଶ ମାଣ୍ଡାଭି(33)ବର୍ଷ ଶୁକ୍ରବାର ରାତିରେ ସେହି ଗାଁର ଏକ ବିବାହ ଉତ୍ସବରେ ଯୋଗଦେଇ ଫେରିବା ସମୟରେ କିଛି ଶସସ୍ତ୍ର ମାଓବାଦୀ ଆସି ଦୀନେଶଙ୍କୁ ଗୁଳି କରିଥିଲେ l ଏହି ବିଷୟରେ ସେଠାରେ ଉପସ୍ଥିତ ଲୋକେ ପରିବାର ସଦସ୍ୟ ପୁଲିସକୁ ସୂଚନା ଦେଇଥିଲେ l ତାଙ୍କ ସମ୍ପର୍କୀୟ ଲୋକେ ଦିନେଶଙ୍କୁ ଚିକିତ୍ସା ପାଇଁ କେଶକଲ ଡାକ୍ତରଖାନାକୁ ନେଇଥିଲେ ଯେଉଁଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ l ଯୁବକ ଜଣଙ୍କ ମୃତ୍ୟୁ ଖବର ଜାଣିବା ପରେ ଘରେ ଶୋକର ଲହରୀ ଖେଳିଯାଛି l ଏହି ଘଟଣା ପରେ ଦୀନେଶଙ୍କୁ କାହିଁକି ହତ୍ୟା କରାଯାଇଥିଲା ସେନେଇ ମାଓବାଦୀ ତରଫରୁ କୌଣସି ସୂଚନା ମିଳିନଥିବା ବେଳେ ଏହି ଘଟଣା ସମ୍ପର୍କରେ ପୁଲିସ ସୂଚନା ପାଇବା ମାତ୍ରେ ଘଟଣାସ୍ଥଳରେ ପହଞ୍ଚି ତଦନ୍ତ ପ୍ରକ୍ରିୟା ଆରମ୍ଭ କରିଥିବା ଜଣାପଡିଛି l
