ନୂଆଦିଲ୍ଲୀ: ଇନଷ୍ଟିଚ୍ୟୁଟ୍ ଅଫ୍ ହ୍ୟୁମାନ୍ ଡେଭଲପମେଣ୍ଟ (ଆଇଏଚଡି) ସହଯୋଗରେ ଆନ୍ତର୍ଜାତୀୟ ଶ୍ରମ ସଂଗଠନ (ଆଇଏଲ୍ଏ) ଦ୍ୱାରା ପ୍ରକାଶିତ ରିପୋର୍ଟ ଅନୁଯାୟୀ ଦେଶରେ ବଢିଛି ବେକାରି ସମସ୍ୟା। ଏଥିରେ ଅଧିକାଂଶ ବେକାର ଯୁବକ ଶିକ୍ଷିତ, ଯେଉଁମାନେ ଚାକିରି ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ଲୋକ କୌଶଳ ଅଭାବ ହେତୁ ଚାକିରି କରିବାକୁ ସକ୍ଷମ ନୁହଁନ୍ତି। ଆନ୍ତର୍ଜାତୀୟ ସ୍ତରର ସଂଗଠନ ଏବଂ ମାନବ ବିକାଶ ପ୍ରତିଷ୍ଠାନ ମିଳିତ ଭାବେ ଭାରତରେ ବେକାରି ହାର ସମ୍ପର୍କରେ ଏକ ରିପୋର୍ଟ ଉପସ୍ଥାପନ କରିଛନ୍ତି। ଏହି ରିପୋର୍ଟକୁ ଭାରତ ରୋଜଗାର ରିପୋର୍ଟ ୨୦୨୪ ରଖାଯାଇଛି। ଯାହା ଅନୁଯାୟୀ ଭାରତର ଯୁବକମାନେ ବେକାରି ସମସ୍ୟା ସହ ସଂଘର୍ଷ କରୁଛନ୍ତି। ଦେଶରେ ବେକାର ଯୁବକଙ୍କ ସଂଖ୍ୟା ୮୩ ପ୍ରତିଶତ, ଯାହା ଚିନ୍ତାର ବିଷୟ।
ତେବେ ଏହି ରିପୋର୍ଟ ଅନୁଯାୟୀ ଦେଶରେ ସବୁଠାରୁ ଅଧିକ ବେରୋଜଗାର ଓଡ଼ିଶାରେ। ଓଡ଼ିଶାରୁ ଦାଦନ ଶ୍ରମିକ ବାହାର ରାଜ୍ୟକୁ କାମ କରିବାକୁ ଯାଉଛନ୍ତି । ୩୦ଲକ୍ଷ ଲୋକ କାମ କରିବାକୁ ବାହାରକୁ ଯାଉଛନ୍ତି । ରିପୋର୍ଟ ଅନୁଯାୟୀ, ୨୦୦୦ ମସିହାରୁ ଦେଶରେ ଶିକ୍ଷିତ ବେକାରଙ୍କ ସଂଖ୍ୟା ୩୫.୨ ପ୍ରତିଶତ ଥିଲା, ଯାହା ବର୍ତ୍ତମାନ ଦ୍ୱିଗୁଣିତ ହୋଇଛି। ୨୦୨୨ ମସିହାରେ ଶିକ୍ଷିତ ବେକାରଙ୍କ ସଂଖ୍ୟା ୬୫.୭ ପ୍ରତିଶତକୁ ବୃଦ୍ଧି ପାଇଛି। ଶିକ୍ଷିତ ଲୋକମାନଙ୍କ ମଧ୍ୟରେ ଯେଉଁମାନେ ଅନ୍ତତଃ ଦଶମ ଶ୍ରେଣୀ ପର୍ଯ୍ୟନ୍ତ ଅଧ୍ୟୟନ କରିଛନ୍ତି, ସେହି ଯୁବକ-ଯୁବତୀଙ୍କ ବେକାର ସମସ୍ୟା ଅଧିକ। ବେକାରି ସମସ୍ୟା ମଧ୍ୟରେ ବିହାର, ମଧ୍ୟପ୍ରଦେଶ, ଉତ୍ତରପ୍ରଦେଶ,ଝାଡ଼ଖଣ୍ଡ, ଛତିଶଗଡ଼ ମଧ୍ୟ ସାମିଲ ରହିଛି।
ଓଡ଼ିଶାରେ ବେକାରିଙ୍କ ସଂଖ୍ୟା ହୁ ହୁ ହୋଇ ବଢିବାରେ ଲାଗିଛି। ରାଜ୍ୟ ଜନସଂଖ୍ୟା ତୁଳନାରେ ଏହା ପାଖାପାଖି ୩୨ ପ୍ରତିଶତ। କେବଳ ଉତ୍ତର ପ୍ରଦେଶକୁ ଛାଡ଼ିଦେଲେ ଆଉ କୌଣସି ରାଜ୍ୟ ଆମ ରାଜ୍ୟଠୁ ଏକ୍ଷେତ୍ରରେ ଅଧିକ ନୁହେଁ। ଶ୍ରମ ମନ୍ତ୍ରଣାଳୟର ଷ୍ଟାଣ୍ଡିଂ କମିଟି ପକ୍ଷରୁ ୨୦୨୩ ବର୍ଷରେ ଲୋକସଭାରେ ଉପସ୍ଥାପିତ ହୋଇଥିବା ଏକ ରିପୋର୍ଟରେ ଦର୍ଶାଯାଇଛି। ଏହି ରିପୋର୍ଟ ଅନୁସାରେ ଓଡ଼ିଶାରେ ୬୧ ହଜାରରୁ ଅଧିକ ହେଉଛନ୍ତି ଶିକ୍ଷିତ ବେକାର। ବିଭିନ୍ନ କ୍ୟାରିୟର ସେଣ୍ଟରରେ ଏମାନେ ପଞ୍ଜିକରଣ କରି ସରକାରଙ୍କୁ ଚାକିରିଟିଏ ପାଇଁ ନିବେଦନ କରିଥିଲେ ମଧ୍ୟ ଫଳ କିଛି ମିଳିନାହିଁ।
ବେରୋଜଗାର ସଂଖ୍ୟା ବୃଦ୍ଧି ହେବାର କାରଣ ଯୁବକମାନଙ୍କ ମଧ୍ୟରେ କୌଶଳ ଅଭାବ। ଏହି ଡିଜିଟାଲ୍ ଯୁଗରେ ମଧ୍ୟ ଅନେକ ଲୋକଙ୍କ ପାଖରେ ସାଧାରଣ ସୂଚନା ମଧ୍ୟ ନାହିଁ। ଯେଉଁଥିପାଇଁ ସେମାନେ ବେରୋଜଗାରର ସମ୍ମୁଖୀନ ହେଉଛନ୍ତି। ରିପୋର୍ଟରେ ଏହା ମଧ୍ୟ ପ୍ରକାଶ ପାଇଛି ଯେ ୨୦୧୯ ବର୍ଷ ପରେ ସ୍ୱୟଂ ନିଯୁକ୍ତ ଏବଂ ନିୟମିତ କର୍ମଚାରୀଙ୍କ ଆୟରେ ହ୍ରାସ ଘଟିଛି। ସର୍ବନିମ୍ନ ମଜୁରୀ ଅର୍ଜନ କରୁଥିବା କାଜୁଆଲ୍ ଶ୍ରମିକମାନଙ୍କର ଯେଉଁମାନଙ୍କର କୌଣସି ଦକ୍ଷତା ନାହିଁ, ସେମାନେ ୨୦୨୨ ବର୍ଷରେ ମଜୁରୀ ପାଇବେ ନାହିଁ। କରୋନା ଅବଧିରେ ମଧ୍ୟ ବେକାରୀ ହାରରେ ତୀବ୍ର ବୃଦ୍ଧି ଘଟିଥିଲା । ଅନେକ ଲୋକ ଚାକିରି ହରାଇଥିଲେ। କମ୍ ଶିକ୍ଷିତ ଲୋକଙ୍କ ଅପେକ୍ଷା ଅଧିକ ଶିକ୍ଷିତ ବ୍ୟକ୍ତି ଏହି ସମୟ ମଧ୍ୟରେ ଚାକିରି ହରାଇଲେ।
