ବାଂସୱାଡା: କଂଗ୍ରେସ ନେତା ରାହୁଲ ଗାନ୍ଧୀ ଗୁରୁବାର ଦିନ ଭାରତ ଯୋଡୋ ନ୍ୟାୟ ଯାତ୍ରା ରେ ରାଜସ୍ଥାନରେ ବାଂସୱାଡାରେ ଏକ ରାଲିରେ ଯୁବବର୍ଗଙ୍କୁ ପ୍ରଥମ ଚାକିରି ତଥା ସାମାଜିକ ସୁରକ୍ଷା ନିଶ୍ଚିତ କରିବାକୁ ପ୍ରତିଶ୍ରୁତିର ୫ ଗ୍ୟାରେଣ୍ଟି ଦେଇଛନ୍ତି। ସେ କହିଛନ୍ତି ଯେ ଯଦି ଆସନ୍ତା ଲୋକସଭା ନିର୍ବାଚନରେ କଂଗ୍ରେସ କ୍ଷମତାକୁ ଆସିବ ତେବେ ଖାଲିଥିବା ୩୦ ଲକ୍ଷ ସରକାରୀ ଚାକିରି ପୂରଣ ହେବ। ଡିପ୍ଲୋମା ଧାରକ ଏବଂ ୨୫ ବର୍ଷରୁ କମ୍ କଲେଜ ସ୍ନାତକମାନଙ୍କ ପାଇଁ କଂଗ୍ରେସ ଏକ ବର୍ଷର ଶିକ୍ଷାଦାନ କରିବ ଯେଉଁଥିରେ ସେମାନଙ୍କୁ ବର୍ଷକୁ ୧ ଲକ୍ଷ ଟଙ୍କା ଦିଆଯିବ।
କଂଗ୍ରେସ ରୋଜଗାରର ଅଧିକାର ପ୍ରଦାନ କରିବ ବୋଲି ସେ କହିଛନ୍ତି। ସେ କହିଛନ୍ତି ଯେ ଦେଶର ପ୍ରତ୍ୟେକ ଯୁବ ଡିପ୍ଲୋମା ଏବଂ ଡିଗ୍ରୀଧାରୀ ଘରୋଇ ଓ ସରକାରୀ କ୍ଷେତ୍ରରେ ଶିକ୍ଷାଦାନ କରିବାର ଅଧିକାର ପାଇବେ।
ଏକ୍ସରେ ଏକ ପୋଷ୍ଟରେ ଗାନ୍ଧୀ କହିଛନ୍ତି, ‘ଆପ୍ରେଣ୍ଟିସ୍ ରାଇଟ୍ ’ପ୍ରଣୟନ କରି କଂଗ୍ରେସ ସରକାର ୨୫ ବର୍ଷରୁ କମ୍ ପ୍ରତ୍ୟେକ ସ୍ନାତକ ଏବଂ ଡିପ୍ଲୋମା ଧାରକଙ୍କୁ ସରକାରୀ କିମ୍ବା ବେସରକାରୀ ଅନୁଷ୍ଠାନରେ ଏକ ବର୍ଷ ଆପ୍ରେଣ୍ଟିସସିପ କରିବାର ସୁଯୋଗ ଦିଆଯିବ। ସେମାନଙ୍କୁ ମାସ ପିଛା ୮,୫୦୦ ଟଙ୍କା ହିସାବରେ ପ୍ରତିବର୍ଷ ୧ ଲକ୍ଷ ଟଙ୍କା ଷ୍ଟାଇପେଣ୍ଡ ଦିଆଯିବ।
ମନରେଗା ଭଳି ଆପ୍ରେଣ୍ଟିସସିପ ମଧ୍ୟ ଏକ ଅଧିକାର ହେବ। ସରକାରୀ ନିଯୁକ୍ତି ପରୀକ୍ଷାରେ ପେପର ଲିକ୍ ରୋକିବା ପାଇଁ ଏକ ଆଇନ ପ୍ରଣୟନ କରାଯିବ ବୋଲି ସେ କହିଛନ୍ତି। ସରକାରୀ ନିଯୁକ୍ତି ପରୀକ୍ଷା ପ୍ରକ୍ରିୟାକୁ ମାନକ କରାଯିବ ଏବଂ ଏହାର ଆଉଟସୋର୍ସିଂ ବନ୍ଦ ହେବ। କୃଷକମାନଙ୍କୁ ଫସଲର ସର୍ବନିମ୍ନ ସହାୟକ ମୂଲ୍ୟ ପାଇଁ ସେ ଏକ ଗ୍ୟାରେଣ୍ଟି ଦେଇଛନ୍ତି। ସେ ଗିଗ୍ ଇକୋନୋମି ପାଇଁ ସାମାଜିକ ସୁରକ୍ଷା ଏବଂ ଷ୍ଟାର୍ଟଅପ୍ ଲାଗି ୫,୦୦୦ କୋଟି ଟଙ୍କାର‘ଯୁବ ରୋଶନି’ ପାଣ୍ଠି ଗଠନ କରାଯିବ ବୋଲି ସେ କହିଛନ୍ତି। ଏହା ଦ୍ବାରା ୪୦ ବର୍ଷରୁ କମ୍ ଯୁବବର୍ଗଙ୍କୁ ବ୍ୟବସାୟ ଏବଂ ଷ୍ଟାର୍ଟଅପ୍ ଲାଗି ଆର୍ଥିକ ସହାୟତା ପ୍ରଦାନ କରାଯିବ।
