ଫୁଲବାଣୀ : ବାଲିଗୁଡ଼ାରେ ଏକ ଜନ୍ମଦିନ ପାର୍ଟିରେ ଖାଦ୍ୟ ଖାଇ ୩୦ରୁ ଅଧିକ ଅସୁସ୍ଥ ହୋଇପଡ଼ିଛନ୍ତି। ଯାହା ଉତ୍ସବମୁଖର ପରିସ୍ଥିତିକୁ ଫିକା କରି ଦେଇଛି। ଶୁକ୍ରବାର କଲ୍ୟାଣ ମଣ୍ଡପରେ ଏକ ଭୋଜିର ଆୟୋଜନ କରାଯାଇଥିଲା।
ପାର୍ଟିର କିଛି ଘଣ୍ଟା ପରେ, ଅନେକ ଅତିଥି ଫୁଡ୍ ପଏଜନିଂର ଲକ୍ଷଣ ଅନୁଭବ କରିବା ଆରମ୍ଭ କରିଥିଲେ। ଯେଉଁଥିରେ ପତଳା ଝାଡା, ବାନ୍ତି, ପେଟ ଯନ୍ତ୍ରଣା ଏବଂ ଜ୍ୱର ଆଦି ଅନ୍ତର୍ଭୁକ୍ତ ଥିଲା । ପରିବାର ଲୋକେ ଅସୁସ୍ଥମାନଙ୍କୁ ନିକଟସ୍ଥ ବାଲିଗୁଡା ଡାକ୍ତରଖାନାରେ ଭର୍ତ୍ତି କରିଥିଲେ।
ହସ୍ପିଟାଲରେ ଚିକିତ୍ସିତ ହେଉଥିବା ଅନ୍ୟତମ ଆକ୍ରାନ୍ତ ସବିତାରାଣୀ ପାଲ ନିଜର ଅନୁଭୂତି ବଖାଣିଛନ୍ତି। ସେ କହିଛନ୍ତି, ଆମେ ପାର୍ଟିରେ ମଟନ୍ ଓ ଚିଙ୍ଗୁଡ଼ି ତରକାରୀ ଖାଇଥିଲୁ। ଏହାର କିଛି ଘଣ୍ଟା ପରେ ପେଟରେ ଯନ୍ତ୍ରଣା ହେବା ସହ ଜ୍ୱର ଓ ସାମାନ୍ୟ ଦୁର୍ବଳ ଅନୁଭବ ହୋଇଥିଲା।
ଡାକ୍ତରଖାନାରେ ଭର୍ତ୍ତି ହୋଇଥିବା ଅନ୍ୟ ଜଣେ ସଂକ୍ରମିତ ଯୁବକ ରୋହିତ ପାଲ୍ ହଠାତ୍ ଲକ୍ଷଣ ଦେଖାଦେବା କଥା ବର୍ଣ୍ଣନା କରିଛନ୍ତି। “ଖାଦ୍ୟ ଖାଇବାର ମାତ୍ର କିଛି ଘଣ୍ଟା ପରେ ଆମେ ସମସ୍ତେ ଅସୁସ୍ଥ ହୋଇପଡ଼ିଥିଲୁ। ବର୍ତ୍ତମାନ ଆମ ୱାର୍ଡର ପ୍ରାୟ ୩୦ ଜଣ ଏହି ହସ୍ପିଟାଲରେ ଚିକିତ୍ସିତ ହେଉଛନ୍ତି। ଖାଦ୍ୟ ବିଷାକ୍ତରୁ ଏପରି ପରିସ୍ଥିତି ଉପୁଜି ଥାଇପାରେ ବୋଲି ସ୍ଥାନୀୟ ବାସିନ୍ଦା ସନ୍ଦେହ କରୁଛନ୍ତି।
