ଓଡିଶାରେ ମଦ ମାଫିଆଙ୍କ ଆଡ୍ଡା ଉପରେ ଆୟକର ବିଭାଗ ଦ୍ୱାରା ଚଢାଉରେ ବିପୁଳ କଳାଟଙ୍କା ଜବତ ଘଟଣାରେ ବିଜେଡିକୁ କଡା ସମାଲୋଚନା କରିଛି ବିଜେପି । ଆଜି ଏକ ସାମ୍ବାଦିକ୍ ସମ୍ମିଳନୀରେ ବିଜେପି ରାଜ୍ୟ ପ୍ରବକ୍ତା ଅନିଲ ବିଶ୍ୱାଳ କହିଛନ୍ତି, ଯେଉଁ କମ୍ପାନୀ ଏହି ମଦ ଭାଟି ସବୁ ଚଲାଉଥିଲା ସେହି କମ୍ପାନୀ ସହିତ ସରକାରଙ୍କର କି ସର୍ମ୍ପକ ଅଛି ? ସରକାର ସାଧାରଣ ଲୋକଙ୍କୁ ପିଇବା ପାଇଁ ପାଣି ଦେଇପାରୁନଥିବା ବେଳେ ମଦ କାରଖାନାକୁ ମହାନଦୀରୁ ପାଣି କେଉଁ ସ୍ୱାର୍ଥରେ ଦିଆଯାଉଛି ବୋଲି ପ୍ରଶ୍ନ କରିବା ସହ ସ୍ପଷ୍ଟୀକରଣ ମାଗିଛି ବିଜେପି ।
ଶ୍ରୀ ବିଶ୍ୱାଳ କହିଛନ୍ତି ଯେ, ସମ୍ବିଧାନର ୭ତମ ଅନୁଛେଦ ଅନୁସାରେ ମଦ ବିକ୍ରି ସମ୍ପର୍କିତ ସମସ୍ତ ବିଷୟ ହେଉଛି ରାଜ୍ୟ ସରକାରଙ୍କ ବ୍ୟାପାର । ହେଲେ ସାରା ଦେଶ ଏବେ ଓଡିଶାର ମଦ ଭାଟି ଉପରେ ହୋଇଥିବା ଚଢାଉକୁ ନେଇ ହଲଚଲ ହେଉଥିବା ବେଳେ ମୁଖ୍ୟମନ୍ତ୍ରୀ ପାଟି ନଖୋଲିବା ବଡ ଆଶ୍ଚର୍ଯ୍ୟର ବିଷୟ । “ମେକ ଇନ ଓଡିଶା”ରେ କିଭଳି ଓ କେଉଁ ପରିସ୍ଥିତିରେ ଏହି କମ୍ପାନୀକୁ ସାମିଲ କରାଯାଇଥିଲା ତାହା ମଧ୍ୟ ଆଉ ଏକ ବଡ ପ୍ରସଙ୍ଗ । ଓଡିଶାରେ ସରକାରଙ୍କର ଆଳୁ ମିଶନ, ପିଆଜ ମିଶନ ଆଦି ଫେଲ ହୋଇଥିଲା ବେଳେ ମଦ ମିଶନ କିନ୍ତୁ ବେଶ ସଫଳ ହୋଇଛି ।
ବିବାଦ ଭିତରେ ଥିବା ବୌଦ୍ଧ ଡିଷ୍ଟିଲାରିର ଓଡିଶାରେ ଦେଶି ମଦ ବେପାରରେ ଏକ ଚାଟିଆ ଆଧିପତ୍ୟ ରହିଛି । ଏହା ପଛରେ ସରକାରଙ୍କ ଅବକାରୀ ନୀତି ଦାୟୀ ବୋଲି ଅଭିଯୋଗ ଆଣିଛି ବିଜେପି।
ବିଜେପି କହିଛି, ଓଡିଶାରେ ଆଜି “ମଦର ମହାନଦୀ” ସୃଷ୍ଟି ହୋଇଛି । କେବଳ ବଲାଙ୍ଗିର ଜିଲ୍ଲାରେ ଅଛି ମୋଟ ୬୨ଟା ମଦ ଭାଟି । ଦିନକୁ ୮ ଲକ୍ଷ ଲିଟର ମଦ ବିକ୍ରି ହେଉଛି ଓଡିଶାରେ । “ନ୍ୟାସନାଲ ଫ୍ୟାମିଲ ହେଲ୍ଥ ସର୍ଭେ” ଅନୁସାରେ ଗ୍ରାମାଂଚଳରେ ୩୦ ପ୍ରତିଶତ ଲୋକ ମଦ ପିଉଛନ୍ତି । ବିଜେଡି ବର୍ତମାନ ସମସ୍ତ ଆଂଚଳିକ ଦଳ ଭିତରେ ସବୁଠାରୁ ଧନି ଦଳ । ସେହି ଦଳ ପାଖରେ ଏତେ ପଇସା ଆସିଲା କେଉଁଠୁ? ଏହା କେଉଁ ମଦ ମାଫିଆଙ୍କ ଅର୍ଥ କି ବୋଲି ଶ୍ରୀ ବିଶ୍ୱାଳ ପ୍ରଶ୍ନ କରିଛନ୍ତି ।
