ହିଞ୍ଜିଳିକାଟୁ (୧୬/୧୦) : ହିଞ୍ଜିଳି ଥାନା ରାଳବ ଗ୍ରାମରେ ଜଣେ ଯୁବକଙ୍କୁ ସେହି ଗ୍ରାମର ୨ ଜଣ ଆକ୍ରମଣ କରିଛନ୍ତି । ଆକ୍ରମଣରେ ଯୁବକ ଜଣଙ୍କ ଗୁରୁତର ଆହତ ହୋଇଛନ୍ତି। ଆହତ ଜଣଙ୍କ ହେଲେ ହିଞ୍ଜିଳି ଥାନା ରାଳବ ଗ୍ରାମର ସଞ୍ଜୟ ପରିଡା (୪୨) । ପ୍ରକାଶ ଯେ ସଞ୍ଜୟ ସୋମବାର ଅପରାହ୍ନରେ କୌଣସି କାମରେ ଅନ୍ତରିଗାଁରୁ କାମ ସାରି ଘରକୁ ଫେରୁଥିବା ବେଳେ ଗ୍ରାମ ନିକଟରେ ସେହି ଗ୍ରାମର ୨ ଜଣ ଯୁବକ ଆକ୍ରମଣ କରିବା ଉଦ୍ଧେଶ୍ୟରେ ଛକି ରହିଥିଲେ । ସଞ୍ଜୟଙ୍କୁ ଦେଖି ୨ ଯୁବକ ଧରିଥିବା ଠେଙ୍ଗାରେ ସଞ୍ଜୟଙ୍କ ମୁଣ୍ଡକୁ ଆକ୍ରମଣ କରିଥିଲେ।
ଆକ୍ରମଣରେ ଯୁବକ ଜଣଙ୍କ ଗୁରୁତର ଆହତ ହୋଇ ଅଚେତ ହୋଇ ଘଟଣା ସ୍ଥଳରେ ପଡି ଯାଇଥିଲେ । ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ଅବସ୍ଥା ଗୁରୁତର ହେବାରୁ ତାଙ୍କୁ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ଖବର ଲେଖା ହେବା ସୁଦ୍ଧା ଘଟଣା ନେଇ ଥାନାରେ କୌଣସି ମାମଲା ରୁଜୁ ହୋଇନଥିବା ଥାନା ସୂତ୍ରରୁ ପ୍ରକାଶ ।
