ଉତ୍ତର ଭାରତର ମୁଗଲାଇ ଡିସ୍ ସାଙ୍ଗକୁ ଦକ୍ଷିଣ ଭାରତର ପରିଚୟ ବହନ କରୁଥିବା ସ୍ୱତନ୍ତ୍ର ଡିସ୍। ତା’ ସାଙ୍ଗକୁ ନୂଆ ଦିଲ୍ଲୀର ଭଳିକି ଭଳି ଚାଟ୍ । ଆସନ୍ତା G-୨୦ ସମ୍ମିଳନୀ ପାଇଁ ଭାରତ ଆସିବାକୁ ଥିବା ଅତିଥିଙ୍କୁ ଭାରତ ପରସିବ ଏଭଳି ଭଳିକି ଭଳି ଖାଦ୍ୟ । ଅତିଥିଙ୍କ ପ୍ଲେଟର ଚଟପଟା ଖାଦ୍ୟ ସାଙ୍ଗକୁ ସମ୍ଭ୍ରାନ୍ତ ଶ୍ରେଣୀୟ ଖାଦ୍ୟ ବି ସାମିଲ ହେବ ।
ଆସନ୍ତା ୯ ଓ ୧୦ ତାରିଖରେ ଜି-୨୦ ସମ୍ମିଳନୀ ଅନୁଷ୍ଠିତ ହେବ । ଏଥିପାଇଁ ନୂଆଦିଲ୍ଲୀସ୍ଥିତ ଭାରତ ମଣ୍ଡପମ୍ ସଜେଇ ହୋଇ ସାରିଥିବା ବେଳେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଆସନ୍ତାକାଲି ସୁଦ୍ଧା ପ୍ରାୟତଃ ସମସ୍ତ ବିଶ୍ୱସ୍ତରୀୟ ନେତା ଏହି ସମ୍ମିଳନୀ ନିମନ୍ତେ ଭାରତରେ ପହଞ୍ଚିଯିବେ।
କେନ୍ଦ୍ର ଓ ଦିଲ୍ଲୀ ସରକାର ମିଳିତ ଭାବେ ଦିଲ୍ଲୀକୁ ସୁନ୍ଦର ରୂପରେ ସଜେଇଛନ୍ତି। ଏଥିସହ ଦିଲ୍ଲୀ ଏକ ପ୍ରକାର ସୁରକ୍ଷା ଛାଉଣୀରେ ପରିଣତ ହୋଇଯାଇଛି। ଦେଶ ସମେତ ବିଭିନ୍ନ ଦେଶର ସୁରକ୍ଷା ଏଜେନ୍ସି କର୍ମୀ ବି ଭାରତରେ ଡେରା ପକାଇଛନ୍ତି।
