ଅସ୍ତିତ୍ବ ବଞ୍ଚାଇବାକୁ ଚାହୁଥିଲେ ପ୍ରଭୁ ଶ୍ରୀରାମଙ୍କୁ ନେଇ ଭୁଲ ବିବୃତି ଦିଅ ନାହିଁ; ବିରୋଧୀ ଦଳକୁ କହିଲେ ବାବା ରାମଦେବ

ଲକ୍ଷ୍ନୌ: ଉତ୍ତରପ୍ରଦେଶର ଅଯୋଧ୍ୟାରେ ଏକ ବିଶାଳ ରାମ ମନ୍ଦିର ନିର୍ମାଣ କରାଯାଉଛି। ଜାନୁଆରି ୨୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଯୋଧ୍ୟାରେ ଭଗବାନ ଶ୍ରୀରାମଙ୍କ ମନ୍ଦିର ଉଦଘାଟନ କରିବେ। ଏହି ଉତ୍ସବ ପାଇଁ ଅନେକ ଭିଭିଆଇପିଙ୍କୁ ନିମନ୍ତ୍ରଣ କରାଯାଇଛି। ଏହା ବ୍ୟତୀତ ବିରୋଧୀଦଳର ନେତାମାନଙ୍କୁ ମଧ୍ୟ ନିମନ୍ତ୍ରଣ କରାଯାଇଛି। କିନ୍ତୁ ବିରୋଧୀମାନେ ରାମ ମନ୍ଦିର ପ୍ରସଙ୍ଗକୁ ନେଇ ସରକାରଙ୍କୁ ଟାର୍ଗେଟ କରୁଛନ୍ତି। ଲୋକସଭା ନିର୍ବାଚନର ଠିକ ପୂର୍ବରୁ ମନ୍ଦିରର ପ୍ରାଣ ପ୍ରତିଷ୍ଠା କରି ବିଜେପି ରାଜନୀତି କରୁଥିବା ଅଭିଯୋଗ କରିଛନ୍ତି ବିରୋଧୀ। ବର୍ତ୍ତମାନ ଯୋଗ ଗୁରୁ ବାବା ରାମଦେବ ଏହି ପ୍ରସଙ୍ଗକୁ ନେଇ ବିରୋଧୀଙ୍କୁ ପରାମର୍ଶ ଦେଇଛନ୍ତି।
ଗୁରୁବାର ଦିନ ବାବା ରାମଦେବ କହିଛନ୍ତି ଯେ, ପ୍ରଭୁ ଶ୍ରୀରାମ ପକ୍ଷ ଏବଂ ବିପକ୍ଷ ମଧ୍ୟରେ ନିରପେକ୍ଷ। ଶ୍ରୀରାମ ସମସ୍ତଙ୍କର। ଯେଉଁମାନେ ନିମନ୍ତ୍ରଣ ପାଇଛନ୍ତି ସେମାନେ ମଧ୍ୟ ରାମ ମନ୍ଦିରର ଉଦଘାଟନକୁ ଯିବା ଉଚିତ୍ ଏବଂ ଯେଉଁମାନେ ନିମନ୍ତ୍ରଣ ପାଇ ନାହାଁନ୍ତି ସେମାନେ ମଧ୍ୟ ଯିବା ଉଚିତ୍। ନିଜର ଅସ୍ତିତ୍ୱ ବଞ୍ଚାଇବାକୁ ଚାହୁଁଥିବା ରାଜନୈତିକ ଦଳ ଶ୍ରୀରାମଙ୍କ ବିଷୟରେ କୌଣସି ଭୁଲ ବିବୃତି ଦେବା ଉଚିତ୍ ନୁହେଁ, ନଚେତ୍ ସେମାନଙ୍କର ଅସ୍ତିତ୍ୱ ଶେଷ ହେବ।

ବାବା ରାମଦେବଙ୍କୁ ରାମ ମନ୍ଦିରର ପ୍ରାଣ ପ୍ରତିଷ୍ଠା ସମାରୋହକୁ ଯିବା ପାଇଁ ନିମନ୍ତ୍ରଣ ମିଳିବା ପରେ ସେ କହିଛନ୍ତି ଯେ, ମୁଁ ଗର୍ବିତ ଅନୁଭବ କରୁଛି ଯେ ମୁଁ ପ୍ରଭୁଙ୍କ ପ୍ରାଣ ପ୍ରତିଷ୍ଠା ସମାରୋହର ସାକ୍ଷୀ ରହିବି। ୫୦୦ବର୍ଷର ନିରନ୍ତର ସଂଘର୍ଷ ଏବଂ ୨୫ ପିଢ଼ିର ବଳିଦାନ ପରେ, ଜାନୁଆରି ୨୨ରେ ଅଯୋଧ୍ୟାରେ ପ୍ରଭୁ ରାମଙ୍କ ପ୍ରାଣ ପ୍ରତିଷ୍ଠା ସମାରୋହ ବିଶ୍ୱ ଇତିହାସର ପୃଷ୍ଠାରେ ଲିପିବଦ୍ଧ ହେବ।