‘ଯଦି ଆପଣ ଟଙ୍କା ପାଇଁ ଚିନ୍ତିତ ଅଛନ୍ତି। ଯଦି ଆପଣ ଲକ୍ଷପତି ହେବାକୁ ଚାହୁଁଛନ୍ତି ତେବେ ଏହି ଯୋଜନା ଆପଣଙ୍କ ପାଇଁ। ଆପଣଙ୍କୁ ଅଧିକ କିଛି କରିବାକୁ ପଡିବ ନାହିଁ। କେବଳ ଜଣେ ମହିଳାଙ୍କୁ ଗର୍ଭବତୀ କରିବାକୁ ପଡିବ। ଛୁଆ ଜନ୍ମ ହେବା ପରେ ଆପଣଙ୍କୁ ପୁରସ୍କାର ସ୍ୱରୂପ ୧୩ ଲକ୍ଷ ଟଙ୍କା ମିଳିବ। ଏଥିରେ ବିଫଳ ହେଲେ ଦିଆଯିବ ୫ ଲକ୍ଷ ଟଙ୍କା। ଅଲ୍ ଇଣ୍ଡିଆ ପ୍ରେଗ୍ନାଣ୍ଟ ଜବ୍ ଏଜେନ୍ସି ନାଁରେ ବିହାରର ନଓ୍ୱାଦ ଅଞ୍ଚଳର ଅଧିକାଂଶ ଯୁବକଙ୍କୁ ଏଭଳି କିଛି ଲୋଭନୀୟ ଅଫର୍ର ଦେଇ ଏକ ନୂଆ ଠକ ଗ୍ୟାଙ୍ଗ ଫାଶରେ ପକାଇ ଲକ୍ଷ ଲକ୍ଷ ଟଙ୍କା ଲୁଟିଥିବା ଅଭିଯୋଗ ହୋଇଛି।
ଏହି ଠକେଇ ଅଭିଯୋଗ ମିଳିବା ପରେ ଏସଆଇଟି ଜିଲାର ମୁଫାସିଲ ପୁଲିସ ଷ୍ଟେସନ ଅଞ୍ଚଳର ଗୁରୁମା ଗ୍ରାମରେ ଥିବା ମୁନ୍ନା କୁମାର ଓରଫ ଦୀପକଙ୍କ ଘରେ ପୁଲିସ ଚଢ଼ାଉ କରିଥିଲା। ମୁନ୍ନା କୁମାର ହେଉଛି ଏହି ଠକ ଗ୍ୟାଙ୍ଗର ମୁଖ୍ୟ। ପୁଲିସ ଏଠାରୁ ଆଠ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗ୍ୟାଙ୍ଗର ନେତା ମୁନ୍ନାଙ୍କ ସମେତ ଦୁଇ ଡଜନରୁ ଅଧିକ ଅଭିଯୁକ୍ତ ଫେରାର ଅଛନ୍ତି। ସେମାନଙ୍କୁ ଖୋଜା ଚାଲିଛି। ଚଢ଼ାଉ ସମୟରେ ପୁଲିସ ୯ ଟି ମୋବାଇଲ, ପ୍ରିଣ୍ଟର୍ ଏବଂ ବହୁ ମହିଳାଙ୍କ ତଥ୍ୟ ଜବତ କରିଛି।
ତଦନ୍ତରୁ ଜଣାପଡିଛି ଯେ, ଏହି ଗ୍ୟାଙ୍ଗରେ ମୋଟ ୨୫-୩୦ ଠକ ସମ୍ପୃକ୍ତ ଥିଲେ। ଏହି ଠକ ଗ୍ୟାଙ୍ଗ ଯୁବକମାନଙ୍କୁ ମହିଳାଙ୍କ ସହ ସମ୍ପର୍କ ରଖି ତାଙ୍କୁ ଗର୍ଭବତୀ କରାଇଲେ ପୁରସ୍କାର ସ୍ୱରୂପ ୧୩ ଲକ୍ଷ ଟଙ୍କା ଦେବାକୁ କହି ସେମାନଙ୍କୁ ଠକୁଥିଲେ। ସାଇବର ଠକମାନେ ଯୁବକଙ୍କ ଠାରୁ ଏହି ଆପ୍ରେ ରେଜିଷ୍ଟ୍ରସନ ବାବଦକୁ ୭୯୯ ଟଙ୍କା ନେଉଥିଲେ। ଏହାପରେ ଅନେକ ମହିଳାଙ୍କ ଫଟୋକୁ ଯୁବକଙ୍କ ଫୋନ୍କୁ ପଠାଉଥିଲେ। ଏହି ଫଟୋରୁ ସେମାନଙ୍କୁ ଚୟନ କରିବାକୁ କହୁଥିଲେ। ଏହା ସିକ୍ୟୁରିଟି ଡିପୋଜିଟ୍ ମାଗୁଥିଲେ। ସିକ୍ୟୁରିଟି ଡିପୋଜିଟ୍ ବାବଦକୁ ଯୁବକଙ୍କ ଠାରୁ ୫ରୁ ୨୦ ହଜାର ଟଙ୍କା ଯାଏଁ ନେଉଥିଲେ। ଏଭଳି କରି ଅନେକ ଯୁବକଙ୍କ ଠାରୁ ଏହି ସାଇବର ଠକମାନେ ଲକ୍ଷ ଲକ୍ଷ ଟଙ୍କା ଲୁଟି ନେଉଥିଲେ ବୋଲି ପୁଲିସ କହିଛି।
