ପ୍ରଫେସନାଲ ଓ କଲେଜ ସ୍ପୋର୍ଟସ ଟିମ୍ ପାଇଁ ସେବା ପ୍ରଦାନ କରୁଥିବା ୟୁନାଇଟେଡ୍ ଏୟାରଲାଇନ୍ସ ବିରୋଧରେ ଆସିଛି ବର୍ଣ୍ଣବୈଷମ୍ୟ ଅଭିଯୋଗ। ଫ୍ଲାଇଟ୍ ଆଣ୍ଟେଣ୍ଡାଣ୍ଟ ପଦବୀ ପାଇଁ ଏୟାରଲାଇନ୍ସ କେବଳ ପତଳା, ସୁନ୍ଦରୀ, ଗୋରୀ ଝିଅଙ୍କୁ ପ୍ରଥମିକତା ଦେଉଛି। କଳା ଓ ମୋଟା ଝିଅଙ୍କୁ ଏଠି କୌଣସି ସୁଯୋଗ ମିଳୁନି। ଏନେଇ ଦୁଇଜଣ କ୍ରୁ ସଦସ୍ୟ ୟୁନାଇଟେଡ୍ ଏୟାରଲାଇନ୍ସ ବିରୋଧରେ ମାମଲା ରୁଜୁ କରିଛନ୍ତି।
ଲସ୍ ଏଞ୍ଜଲିସ୍ର ଡୋଜର୍ସ ବେସ୍ବଲ୍ ଟିମ୍ର ଚାର୍ଟାର୍ଡ ଫ୍ଲାଇଟ୍ରୁ ୫୦ ବର୍ଷୀୟ ଡନ୍ ଟୋଡ୍ ଓ ୪୪ ବର୍ଷୀୟ ଡାର୍ବି କ୍ୟୁଜାଦାଙ୍କୁ ବାହାର କରିଦିଆଯାଇଛି। ଖେଳାଳିମାନେ କେବଳ ଗୋରୀ, କମ୍ ବୟସ୍କା, ତନୁ ପାତଳି ଓ ନୀଳ ନୟନା ମହିଳାଙ୍କୁ ପସନ୍ଦ କରୁଛନ୍ତି। ତେଣୁ ଯୁବ ଓ ପତଳା ମହିଳା ସହକର୍ମୀଙ୍କୁ ପ୍ରାଥମିକତା ଦେଇ ଏୟାରଲାଇନ୍ସ ତାଙ୍କୁ ଅଣଦେଖା କରିଥିବା ଉଭୟ ଅଭିଯୋଗ କରିଛନ୍ତି। ଏନେଇ ଲସ୍ ଏଞ୍ଜଲିସର କାଉଣ୍ଟି ସୁପିରିୟର୍ କୋର୍ଟରେ ୟୁନାଇଟେଡ୍ ଏୟାରଲାଇନ୍ସ ବିରୋଧରେ ବର୍ଣ୍ଣବୈଷମ୍ୟ, ଧର୍ମ, ବୟସ ଆଧାରେ ଉତ୍ପୀଡନ ଓ ଭେଦଭାବ ଅଭିଯୋଗରେ ମାମଲା ରୁଜୁ ହୋଇଛି।
ଟୋଡ୍ ଓ କ୍ୟୁଜାଦା ୧୫ ବର୍ଷରୁ ଅଧିକ ସମୟ ହେବ ‘ୟୁନାଇଟେଡ୍ ଏୟାର୍ଲାଇନ୍ସ୍’ରେ କାମ କରୁଥିଲେ। ‘ଡଜର୍ସ ଫ୍ଲାଇଟ୍’ରେ (ଖେଳାଳି ଟିମ୍ ନେଉଥିବା ବିମାନ) କାମ କରିବାକୁ ପ୍ରାୟ ୧୦ ବର୍ଷ ହେବ ଉଦ୍ୟମ କରି ସେମାନେ ବିଫଳ ହୋଇଛନ୍ତି। ଏଥିରେ କାମ କରୁଥିବା ‘କ୍ରୁ’ମାନଙ୍କୁ ଅଧିକ ପାରିଶ୍ରମିକ ମିଳେ। କାରଣ ଏହି ବିମାନର ଯାତ୍ରା ସମୟ ଖୁବ୍ ଦୀର୍ଘ। ଏଥିସହ ଏଠି ଅନ୍ୟାନ୍ୟ ଖର୍ଚ୍ଚ ମିଳୁଥିବାରୁ ସାଧାରଣ ବିମାନରେ ମିଳୁଥିବା ପାରିଶ୍ରମିକଠାରୁ ତାହାର ପାରିଶ୍ରମିକ ଅଧିକ ହୋଇଥାଏ।
