ଚୌଦ୍ୱାର: ନିଜେ ଚଳାଉଥିବା ଗାଡ଼ିରୁ ଟଙ୍କା ଲୁଟ କରିଥିବା ଡ୍ରାଇଭର ଓ ତାର ୩ଜଣ ସହଯୋଗୀଙ୍କୁ ଚୌଦ୍ୱାର ପୁଲିସ ଗିରଫ କରିବାରେ ସଫଳ ହୋଇଛି । ଗିରଫ ଅଭିଯୁକ୍ତମାନେ ହେଲେ ଡ୍ରାଇଭର ଗୁରୁଡ଼ିଝାଟିଆ ଥାନା ବଳିପୁର ଗ୍ରାମର ରବୀନ୍ଦ୍ର ସ୍ୱାଇଁ(୨୨) ଓ ଶଂକର୍ଷଣ ସ୍ୱାଇଁ(୧୯), ନୟାଗଡ଼ ଜିଲ୍ଳା ହରିସୁବୁଦ୍ଧିପାଟଣା ଗ୍ରାମର ଲିଜୁନ୍ ନାଏକ (୧୭) ଏବଂ ରାଜୁ ନାୟକ(୧୯) ।
ଚୋରି ହୋଇଥିବା ମୋଟ ୪୬ ହଜାର ୨୬୦ ନଗଦ ଟଙ୍କା ଓ ଗୋଟିଏ ହଂକ ବାଇକ୍ ସେମାନଙ୍କ ନିକଟରୁ ଜବତ କରାଯାଇଛି । ଚୌଦ୍ୱାର ଆଇଆଇସି ବିରଞ୍ଚି ନାରାୟଣ ପତିଙ୍କ କହିବା ଅନୁଯାୟୀ ଜଗତପୁର ସ୍ଥିତ ଏକ ଆଇସ୍କ୍ରିମ୍ କାରଖାନା ମାଲିକ ତଥା ମାଲଗୋଦାମ ଥାନା କଲେଜ ଛକ ଅଞ୍ଚଳ ବାସିନ୍ଦା ଅଦିଲ କରିମ୍ ଗୁରୁବାର ଦିନ ଚୌଦ୍ୱାର ଥାନାରେ ଏନେଇ ଲିଖିତ ଅଭିଯୋଗ କରିଥିଲେ । ସେ ଗତ ମଙ୍ଗଳବାର ଦିନ ଓଡି ୦୫ ଏଲ୍ ୪୦୧୭ ନମ୍ବର ଯୁକ୍ତ ଏକ ଭଡ଼ା ଗାଡ଼ିରେ ଆଇସ୍କ୍ରିମ୍ ଲୋଡ଼ କରି ପଶ୍ମିମ ଓଡ଼ିଶାରେ ଥିବା ବିଭିନ୍ନ ଦୋକାନରେ ବିକ୍ରି ପାଇଁ ପଠାଇଥିଲେ ।
ଗାଡ଼ିର ଡ୍ରାଇଭର ରବୀନ୍ଦ୍ର ସହିତ ତାଙ୍କ କାରଖାନାର କର୍ମଚାରୀ କାଶୀନାଥ ରାଉଳ ଗାଡ଼ିନେଇ ଆଇସ୍କ୍ରିମ୍ ଯୋଗାଣ ପାଇଁ ଯାଇଥିଲେ । ହେଲେ ମଙ୍ଗଳବାର ଭୋର ସମୟରେ ଉକ୍ତ ଗାଡ଼ିର ମାଲିକ ବିଚିତ୍ର ସାହୁ ଆଦିଲ କରିମ୍ଙ୍କୁ ଫୋନ୍ କରି ଜଣାଇଥିଲେ ଯେ କଟକ ଧବଳେଶ୍ୱର ନିକଟ ଏକ ପେଟ୍ରୋଲ ପମ୍ପ ନିକଟରେ ୩ଜଣ ଦୁର୍ବୃତ୍ତ ଗାଡ଼ିକୁ ଅଟକାଇ ଡ୍ରାଇଭର ରବୀନ୍ଦ୍ର ଓ କାଣୀନାଥକୁ ମାଡ଼ମାରି ସେମାନଙ୍କ ଠାରୁ ୪୬ ହଜାର ୨୬୦ଟଙ୍କା ଲୁଟି ନେଇଛନ୍ତି । କରିମ୍ଙ୍କ ଠାରୁ ଅଭିଯୋଗ ପାଇ ଚୌଦ୍ୱାର ଥାନା ଏସ୍ଆଇ ରଞ୍ଜନ କୁମାର ନାୟକ ସଦଳବଲେ ଘଟଣାସ୍ଥଳରେ ତଦନ୍ତ କରିବା ସହିତ ଡ୍ରାଇଭର ରବୀନ୍ଦ୍ରକୁ ଥାନାକୁ ଆଣି ପଚରାଉଚରା କରିଥିଲା । ପଚରାଉଚରା କରିବା ପରେ ସେ ଓ ତା ଭାଇ ଶଙ୍କର୍ଷଣ ଏହି ଟଙ୍କା ଲୁଟ କରିଥିବା ମାନିଥିଲା । ଅନ୍ୟ ଦୁଇଜଣ ସେମାନଙ୍କୁ ସହଯୋଗ କରିଥିବା ମଧ୍ୟ ସେ ସ୍ୱୀକାର କରିଥିଲା । ପୁଲିସ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ।
